TBC Capital-ი განახლებულ პუბლიკაციას ,,მომხმარებლის დანახარჯების დინამიკა - ივნისი 2026”-ს აქვეყნებს. დოკუმენტის თანახმად, 2026 წლის ივნისში თიბისი ბანკის არხებით გაწეული მომხმარებელთა უნაღდო დანახარჯები და ტრანზაქციების რაოდენობა წლიურ ზრდას განაგრძობს. უნაღდო დანახარჯები სასტუმროებში წლიურ ჭრილში 21%-ით გაიზარდა. 2026 წლის ივნისში რესტორნებში უნაღდო დანახარჯები წლიურად 21%-ით გაიზარდა, ხოლო საშუალო დანახარჯი ერთ ტრანზაქციაზე 33 ლარს გაუტოლდა. ამავე თვეში ტანსაცმელსა და აქსესუარებზე უნაღდო დანახარჯები წლიურ ჭრილში 23%-ით გაიზარდა.

,,ჯამური უნაღდო დანახარჯების წლიური ზრდა დადებითია. 2026 წლის ივნისში, თიბისი ბანკის არხებით, ჯამური უნაღდო დანახარჯები და უნაღდო ტრანზაქციების რაოდენობა წლიურად 18%-ით გაიზარდა. ამავე პერიოდში თიბისი ბანკის არხებით გაწეული ჯამურ უნაღდო დანახარჯები რეზიდენტებსა და არარეზიდენტებს შორის, შესაბამისად, 84% და 16%-ად განაწილდა. ჯამური უნაღდო დანახარჯების ყველაზე დიდი წილი სურსათს უკავია - 2026 წლის ივნისში თიბისი ბანკის არხებით გაწეულ ჯამური უნაღდო დანახარჯებში სურსათზე გაწეულმა ხარჯებმა 27%-იანი, ხოლო რესტორნებში გაწეულმა დანახარჯებმა 16%-იანი წილი დაიკავა. ამავე პერიოდში სურსათზე უნაღდო დანახარჯები წლიურად 19%-ით გაიზარდა, ხოლო საშუალო დანახარჯი ერთ ტრანზაქციაზე 16 ლარი დაფიქსირდა. სურსათსა და უალკოჰოლო სასმელებზე ინფლაციამ 6% შეადგინა”, - წერს TBC Capital-ი.

ამასთან, დოკუმენტის თანახმად, საწვავზე უნაღდო დანახარჯების დინამიკა მზარდია - 2026 წლის ივნისში, თიბისი ბანკის არხებით, საწვავზე უნაღდო დანახარჯები წლიურად 29%-ით გაიზარდა, ხოლო საშუალო დანახარჯმა ერთ ტრანზაქციაზ 57 ლარი შეადგინა. ამავე თვეში მანქანის შეკეთებასთან დაკავშირებულ უნაღდო დანახარჯებში წლიური 7%-იანი ზრდა დაფიქსირდა. საშუალო დანახარჯი 36 ლარს გაუტოლდა. აქვე აღნიშნულია ისიც, რომ უნაღდო დანახარჯები სამშენებლო მასალებზე წლიურად 9% -ით გაიზარდა - 2026 წლის ივნისში თიბისი ბანკის არხებით სამშენებლო მასალებზე გაწეული უნაღდო დანახარჯები წლიურ ჭრილში 9%-ით გაიზარდა.