ყაზახეთი შუა დერეფნის გამტარუნარიანობის 20 მილიონ ტონამდე გაზრდას გეგმავს
ყაზახეთი შუა დერეფნის გამტარუნარიანობის წელიწადში 20 მილიონ ტონა ტვირთამდე გაზრდას გეგმავს. ამის შესახებ ყაზახეთის პრეზიდენტმა, ცენტრალური აზია-კორეის რესპუბლიკის პირველ სამიტზე განაცხადა.
მისი თქმით, გლობალურ მიწოდების ჯაჭვებში მიმდინარე ცვლილებების ფონზე, ცენტრალური აზიის, როგორც აღმოსავლეთსა და დასავლეთს შორის მნიშვნელოვანი დამაკავშირებელი რგოლის, როლი იზრდება.
მისივე განცხადებით, ყაზახეთი მიზნად ისახავს, ქვეყნის ტერიტორიაზე გამავალი სატრანზიტო ტვირთების საერთო მოცულობა წელიწადში 100 მილიონ ტონამდე გაზარდოს. ამ კონტექსტში, ქვეყანა განსაკუთრებულ ყურადღებას უთმობს შუა დერეფნის, იგივე ტრანსკასპიური საერთაშორისო სატრანსპორტო მარშრუტის, განვითარებას.
„ბოლო ექვსი წლის განმავლობაში ამ მარშრუტზე ტვირთბრუნვის მოცულობა ხუთჯერ გაიზარდა. უახლოეს მომავალში მისი გამტარუნარიანობის წელიწადში 20 მილიონ ტონამდე გაზრდას ვგეგმავთ“, – განაცხადა პრეზიდენტმა.
მისივე თქმით, შუა დერეფნის ინტეგრირება შესაძლებელია TRIPP-ის სატრანსპორტო ინიციატივასთან, რომელსაც ასევე „ტრამპის მარშრუტის“ სახელით მოიხსენიებენ.
მან აღნიშნული მარშრუტების პოტენციალის გაერთიანება და სამხრეთ კორეას, ცენტრალურ აზიასა და ევროპას შორის უწყვეტი სატრანსპორტო-ლოგისტიკური ჯაჭვის შექმნა შესთავაზა.
შუა დერეფანი ჩინეთს ევროპულ ქვეყნებთან ყაზახეთის, კასპიის ზღვის, აზერბაიჯანისა და საქართველოს გავლით აკავშირებს.
ყაზახური მხარის ინფორმაციით, 2025 წელს მარშრუტზე ტვირთების გადაზიდვის მოცულობა 62%-ით გაიზარდა, ხოლო კონტეინერების გადაზიდვა 2.7-ჯერ, 56 500 კონტეინერამდე, გაიზარდა.
ამჟამად შუა დერეფნის გამტარუნარიანობა დაახლოებით 6 მილიონ ტონა ტვირთსა და წელიწადში 182 000-მდე კონტეინერს შეადგენს. ყაზახეთი 2030 წლისთვის აღნიშნული მარშრუტის გამტარუნარიანობის წელიწადში 10 მილიონ ტონამდე გაზრდას გეგმავს.
სხვა სიახლეები
ერთი დოლარის ოფიციალური ღირებულება 2.5933 ლარია
19.11.2026.17:03
1 ევროს ოფიციალური ღირებულება 2.8547 ლარი გახდა, ხოლო 1 აშშ დოლარის 2.5933 ლარი.
სებ-ის საიტზე გამოქვეყნებული მონაცემების თანახმად, დღევანდელი ვაჭრობის შედეგად 1 აშშ დოლარის 2.5933 ლარით განისაზღვრა. კურსი, რომელიც დღეს მოქმედებდა 2.5927 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0006 ლარი შეადგინა.
რაც შეეხება ევროს, მისი ღირებულება 2.8547 ლარია მაშინ, როცა დღეს მოქმედი კურსი 2.8447 ლარს შეადგენდა. შესაბამისად, ევროს ცვლილებამ 0.01 ლარი შეადგინა.