კორპორაცია შექმნის ფაქტორინგის პლატფორმას, რომელსაც წლის დასაწყისში კერძო სექტორს შევთავაზებთ, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ეკონომიკის განვითარების კორპორაციის ხელმძღვანელმა, ირაკლი გაბრიაძემ განაცხადა.

„როგორც აღვნიშნე, რჩება ის მექანიზმები, რომლებიც აქამდეც გვქონდა. ეს არის სესხის პროცენტის სუბსიდირების მექანიზმი, საკრედიტო საგარანტიო სქემა და მიკროსესხების პროგრამა, რომელიც ძალიან პოპულარულია, განსაკუთრებით რეგიონებში. გრძელდება გაფართოებული ფორმატით და მანდატით და ემატება ახალი ინსტრუმენტები.

ახალი ინსტრუმენტების მიმართულებით გვაქვს კონკრეტული გეგმები და უკვე დავიწყეთ კონკრეტული ნაბიჯების გადადგმა. პირველი, მოდი, აღვნიშნოთ ექსპორტის მიმართულებით ახალი ინსტრუმენტები, რომ უფრო მეტად შევუწყოთ ხელი და წავახალისოთ ქვეყნიდან ექსპორტი.

ამ კუთხით ჩვენ წინა თვეში დავამტკიცეთ ახალი პროგრამა. საქართველოს მთავრობამ დაამტკიცა ახალი პროგრამა, რომელიც ითვალისწინებს ლოჯისტიკასთან დაკავშირებული ხარჯების თანადაფინანსებას. ეს არის ტრანსპორტირება საექსპორტო ბაზრებზე და საექსპორტო ბაზრებზე დასაწყობება. 50%-იან თანადაფინანსებას ვთავაზობთ მეწარმეებს კონკრეტული ტვირთის გადაზიდვის დროს და ეს უკვე პირველი გადადგმული ნაბიჯია. მეწარმეებს შეუძლიათ ისარგებლონ ამ პროგრამით.

რაც შეეხება მეორე პროგრამას, რომელიც ასევე აღსანიშნავია და თქვენც თქვენს შესავალში ახსენეთ, კაპიტალის ბაზრების განვითარების მიმართულებას, აქ ვიწყებთ საინვესტიციო ფონდების მხარდაჭერას. ეს პროგრამაც უკვე დამტკიცდა მიმდინარე თვის დასაწყისში და ჩვენ უკვე შემდეგი თვის შუა რიცხვებში გამოვაცხადებთ კონკურსს, იმისთვის, რომ შევარჩიოთ საინვესტიციო ფონდი და ფონდის მენეჯერი, რათა განვახორციელოთ ინვესტიცია აღნიშნულ ფონდებში.

ძირითადი მიზანია, რომ ფონდმა წილობრივი მონაწილეობის გზით დაეხმაროს მცირე და საშუალო ბიზნესს და არამხოლოდ, რათა განავითარონ საკუთარი წარმოება და გაზარდონ საკუთარი წარმოება.

ასევე, ჩვენ გვაქვს სხვადასხვა ინიციატივა კაპიტალის ბაზრების მიმართულებით, ალტერნატიული დაფინანსების წყაროების განვითარების კუთხით. მათ შორის, ეკონომიკის განვითარების კორპორაცია შექმნის ფაქტორინგის პლატფორმას და წლის დასაწყისში, კანონის ამოქმედებასთან ერთად, შევთავაზებთ კერძო სექტორს ფაქტორინგის პლატფორმას.

ეს პლატფორმა კომპანიებს გაუმარტივებს ფაქტორინგის, როგორც პროდუქტის, გამოყენებას და ასევე ხელს შეუწყობს ფაქტორინგული კომპანიების ჩამოყალიბებასა და ბაზარზე შესვლის ხარჯების შემცირებას, რაც კიდევ ერთხელ მოახდენს იმ წყაროების დივერსიფიცირებას, რომლებსაც ბიზნესი იყენებს.

დაფინანსების მექანიზმების მრავალფეროვნება არის მიზანი და ამ მიმართულებით უნდა ვახსენოთ პირდაპირი სესხები, სინდიცირებული სესხები და პირდაპირი წილობრივი მონაწილეობა, რომლებსაც კორპორაცია შესთავაზებს კერძო სექტორს, იმისათვის, რომ განხორციელდეს პროექტები - ისეთი პროექტები, რომლებსაც აქვთ მაღალი საექსპორტო პოტენციალი, რომლებიც არიან ინოვაციურები, ქმნიან მაღალ დამატებულ ღირებულებას ქვეყანაში და აღრმავებენ ღირებულებათა ჯაჭვს, რომელიც გვაქვს ქვეყანაში.

რაც მთავარია, ეს ყველაფერი შემდეგ ითარგმნება სამუშაო ადგილებში, მაღალანაზღაურებად სამუშაო ადგილებში და იმ კეთილდღეობაში, რომელიც იზრდება მთელი ქვეყნის მასშტაბით“, - აცხადებს ირაკლი გაბრიაძე.