მცირე და საშუალო ჰესების ასოციაციის თავმჯდომარის განმარტებით, მცირე და საშუალო ჰესების მშენებლობა ერთდროულად აძლიერებს ქვეყნის ენერგოუსაფრთხოებას და რეგიონების ეკონომიკურ განვითარებას. გიორგი მარგებაძის თქმით, ახალი ჰიდროელექტროსადგურები ელექტროენერგიის წარმოების ზრდასთან ერთად ქმნის სამუშაო ადგილებს, ახალ ეკონომიკურ შესაძლებლობებს და ხელს უშლის მაღალმთიანი სოფლების დაცლას.

„ყოველი ახალი სადგური და ყოველი ახალი მცირე ჰესი ნიშნავს ელექტროენერგიის დამატებით გამომუშავებას და, შესაბამისად, ჩვენი დამოკიდებულების შემცირებას. ეს ერთი.

მეორე, რაც ძალიან მნიშვნელოვანია, ჩვენი მცირე და საშუალო ჰიდროელექტროსადგურები აბსოლუტურად ყველა რეგიონში, მათ შორის მაღალმთიან ზონებშია მოფენილი. მაგალითად, ორ სოფელში, სადაც უკვე აღარც გვახსოვს, ბოლოს როდის იყო რაიმე ეკონომიკური აქტივობა, 2.5-მეგავატიანი სადგურის მშენებლობას ვაპირებთ, რომელიც 5 მილიონი დოლარი ჯდება. იქ უკვე დაიწყო ეკონომიკური გამოცოცხლება, სამუშაო ადგილების შექმნა, დასაქმების, კონკრეტული სოციალური და ინფრასტრუქტურული პროგრამების განხორციელება.

შესაბამისად, ასეთი პატარ-პატარა სადგურები, გარდა იმისა, რომ დამატებით ელექტროენერგიას გვაძლევს და იმპორტზე დამოკიდებულებას გვიმცირებს, ქმნის ეკონომიკურ აქტივობას მაღალმთიან სოფლებში, რომლებიც ფაქტობრივად უკვე დაცლილია.

საბოლოო ჯამში, ამ პროცესს რამდენიმე უმნიშვნელოვანესი მდგენელი აქვს: პირველი, ელექტროენერგია, მეორე  ჩვენი ქვეყნისა და ეკონომიკის უსაფრთხოება და მესამე  ადგილობრივი მოსახლეობის გამოცოცხლება და სოფლების დაცლისგან გადარჩენა“, - აღნიშნა გიორგი მარგებაძემ.