Lion Finance Group-ის შვილობილმა Ameriabank-მა პირველად გამოშვებული მუდმივი ობლიგაციები სრულად განათავსა , რომლის საერთო მოცულობამ 100 მილიონი აშშ დოლარი შეადგინა. ობლიგაციები ორ ტრანშად, თებერვალსა და აპრილში გამოიცა. ორივე შემთხვევაში, მთელი მოცულობა დაგეგმილ ვადამდე სრულად შეიძინეს ინვესტორებმა, რაც აღნიშნულ ფასიან ქაღალდებზე მაღალი მოთხოვნის მაჩვენებელია.

მუდმივი ობლიგაციების გამოშვებით Ameriabank დამატებით კაპიტალურ ბუფერებს ქმნის, რათა მომავალში ზრდის შესაძლებლობები ეფექტიანად გამოიყენოს და თავისი სტრატეგიული მიზნები განახორციელოს. აღსანიშნავია, რომ პირველი ტრანშის ობლიგაციები 8.5%-იანი კუპონის განაკვეთით განთავსდა, ხოლო მეორე ტრანში 8%-იანი კუპონით, რაც მათზე არსებული განსაკუთრებულად მაღალი მოთხოვნით იყო განპირობებული.

„ჩვენს მუდმივ ობლიგაციებზე დაფიქსირებული ძლიერი მოთხოვნა ნათლად ადასტურებს ბაზრის ნდობას ჩვენი საკრედიტო ისტორიისა და ბალანსის დივერსიფიცირებული მართვის მიმართ. ეს ტრანზაქცია აუმჯობესებს ჩვენი კაპიტალის ადეკვატურობის მაჩვენებლებს, გვაძლევს დამატებით შესაძლებლობას განვახორციელოთ ზრდის გეგმები და კიდევ უფრო გავაძლიეროთ ჩვენი, როგორც სომხეთის ეკონომიკის უმსხვილესი დამფინანსებლის, როლი“, - განაცხადა Ameriabank-ის ფინანსურმა დირექტორმა.

ობლიგაციებით ვაჭრობა უკვე შესაძლებელია მეორად ბაზარზე.

Ameriabank-ის მუდმივი ობლიგაციების პროგრამის პროსპექტი რეგისტრირებულია სომხეთის ცენტრალური ბანკის პრეზიდენტის 2026 წლის 21 იანვრის №1/28Ա გადაწყვეტილებით.