მარიამ ქვრივიშვილმა საქართველო-თურქმენეთის ეკონომიკური თანამშრომლობის მთავრობათაშორისი კომისიის სხდომაში მიიღო მონაწილეობა
საქართველოს ეკონომიკისა და მდგრადი განვითარების მინისტრ მარიამ ქვრივიშვილის თანათავმჯდომარეობით საქართველო-თურქმენეთის ეკონომიკური თანამშრომლობის მთავრობათაშორისი კომისიის მეხუთე სხდომა გაიმართა.
კომისიის სხდომას თურქმენეთის მხრიდან თანათავმჯდომარეობდა ვაჭრობისა და საგარეო ეკონომიკური ურთიერთობების მინისტრი ნაზარ აგაჰანოვი.
სხდომაზე ორმხრივი თანამშრომლობის გაღრმავების შესაძლებლობებსა და ეკონომიკური კავშირების კიდევ უფრო გაძლიერებაზე ისაუბრეს. აღინიშნა, რომ ცენტრალური აზიის რეგიონში საქართველო თურქმენეთს განიხილავს, როგორც მნიშვნელოვან და საიმედო პარტნიორს.
როგორც მინისტრმა განაცხადა, სტრატეგიული მდებარეობის წყალობით, საქართველო თურქმენეთისთვის ევროპისა და აზიის დამაკავშირებელი კარიბჭე და ცენტრალური აზიის რეგიონისთვის სასიცოცხლო მნიშვნელობის სატრანზიტო კვანძია.
მარიამ ქვრივიშვილმა ხაზი გაუსვა ქვეყნის მაკროეკონომიკურ მაჩვენებლებს და აღნიშნა, რომ გლობალური გამოწვევების მიუხედავად, ქვეყანაში მსოფლიოში ერთ-ერთი ყველაზე მიმზიდველი საინვესტიციო გარემოა.
მინისტრმა განსაკუთრებული ყურადღება გაამახვილა სახელმწიფო ინვესტიციაზე, რომელიც საქართველოს ძირითად სატრანსპორტო - ლოგისტიკურ სექტორში ხორციელდება და მიმართულია შუა დერეფანში ქვეყნის ფუნქციის გაზრდაზე.
სხდომაზე აღინიშნა, რომ საქართველოსა და თურქმენეთს შორის ტურიზმის სფეროში თანამშრომლობა ხელს შეუწყობს ქვეყნებს შორის პირდაპირი ავიამიმოსვლის დაწყებას.
სხდომაზე ასევე განიხილეს ენერგეტიკის სფეროში თანამშრომლობის გაფართოების საკითხი.
სხდომას ესწრებოდნენ ეკონომიკისა და მდგრადი განვითარების მინისტრის მოადგილე თამარ იოსელიანი, საგარეო საქმეთა მინისტრის მოადგილე ალექსანდრე ხვთისიაშვილი, საქართველოს მთავრობის ადმინისტრაციის უფროსის მოადგილე ილია შამუგია და საქართველოს რკინიგზის გენერალური დირექტორი ლაშა აბაშიძე.
დღის ტოპ 10 სიახლე
სხვა სიახლეები
რეგიონული სტარტაპებისთვის საქართველო ერთ-ერთი მნიშვნელოვანი მიზიდულობის წერტილი გახდა - ირაკლი ნადარეიშვილი
12.10.2026.16:11
„ქართული ეროვნული სტარტაპ ეკოსისტემა გამოირჩევა თავისი მდგრადობით და მიმზიდველობით, მათ შორის რეგიონის ჭრილში", - ამის შესახებ ეკონომიკისა და მდგრადი განვითარების მინისტრის მოადგილე ირაკლი ნადარეიშვილმა განაცხადა.
მინისტრის მოადგილემ ხაზგასმით აღნიშნა, რომ ცოდნაზე და ინოვაციებზე დაფუძნებული ეკონომიკის განვითარება საქართველოს მთავრობის ერთ-ერთი პრიორიტეტია და მის ფარგლებში ბოლო დაახლოებით 10 წლის განმავლობაში მთავრობა ძალიან აქტიურად ახორციელებს როგორც პოლიტიკის, ასევე პრაქტიკულ ნაწილში სტარტაპების მხარდაჭერას, ტექნოლოგიური სექტორის განვითარებას, გლობალური ტექ კომპანიების მოზიდვას და სხვა.
„ყველა ის ღონისძიება, ყველა ის ინიციატივა, რომელიც დაკავშირებული იყო სტარტაპის სტატუსის შემოღებასთან, მასთან დაკავშირებული მთელი რიგი საგადასახადო შეღავათები, საგრანტო პროგრამები, რომელთაც სახელმწიფო წლების განმავლობაში ახორციელებს, ასევე ჩვენს ქვეყანაში შემოსული უმსხვილესი აქსელერატორები და ვენჩურული კაპიტალი განაპირობებს იმას, რომ რეგიონული სტარტაპებისთვის საქართველო ერთ-ერთი მნიშვნელოვანი მიზიდულობის წერტილი გახდა", - აღნიშნა მინისტრის მოადგილემ.
ამასთან, ირაკლი ნადარეიშვილის შეფასებით, შედეგად, დღეს სახეზეა ტალანტის და სტარტაპების ძალიან პოზიტიური მიგრაცია რეგიონიდან საქართველოში.
„საქართველოდან რეალურად მათ ძალიან ეფექტურად ეხსნებათ წვდომა დასავლურ კაპიტალზე, საერთაშორისო ქსელებზე, მომხმარებლებზე და ასე შემდეგ", - განაცხადა ირაკლი ნადარეიშვილმა.
