საქართველოსა და არგენტინას შორის სავაჭრო ბრუნვა საგრძნობლად გაიზარდა, თუმცა აღნიშნული მატება სრულად იმპორტის ხარჯზე ფიქსირდება, მაშინ როდესაც ქართული ექსპორტი სამხრეთ ამერიკის ამ ქვეყანაში მინიმუმამდეა შემცირებული. საქსტატის მონაცემებით, 2026 წლის იანვარ-აპრილში ორ ქვეყანას შორის სავაჭრო ბრუნვამ 6 771.5 ათასი აშშ დოლარი შეადგინა, რაც გასული წლის ანალოგიურ პერიოდთან შედარებით (4 638.7 ათასი აშშ დოლარი) დაახლოებით 46%-ით მეტია.

2026 წლის პირველ ოთხ თვეში საქართველოდან არგენტინაში ექსპორტი მკვეთრად, თითქმის 95%-ით შემცირდა და მხოლოდ 20.2 ათასი დოლარი შეადგინა, მაშინ როდესაც 2025 წლის იანვარ-აპრილში ეს მაჩვენებელი 377.7 ათას დოლარს აღწევდა. საანგარიშო პერიოდში საქართველომ არგენტინულ ბაზარზე მხოლოდ ერთი დასახელების პროდუქტი გაყიდა - მზა შემკვრელი ნივთიერებები.

რაც შეეხება იმპორტს, არგენტინიდან საქართველოში პროდუქციის შემოტანა 58.4%-ით გაიზარდა. მიმდინარე წლის იანვარ-აპრილში მაჩვენებელმა 6 751.3 ათასი დოლარი შეადგინა, გასული წლის 4 261.1 ათასი დოლარის საპირისპიროდ. საქართველოში შემოსულ პროდუქტებს შორის პირველ ადგილს კოპტონი და სოიოს ზეთის ექსტრაჰირებისას მიღებული სხვა მყარი ნარჩენები იკავებს.

TOP 5 პროდუქტი, რის იმპორტსაც საქართველო არგენტინიდან ახდენს:

• კოპტონი და სხვა მყარი ნარჩენები, მიღებული სოიოს ზეთის ექსტრაჰირებისას - 2 518.2 ათასი დოლარი;
• სამკურნალო საშუალებები დაფასოებული - 1 646.8 ათასი დოლარი;
• თევზი გაყინული - 666.5 ათასი დოლარი;
• ნაღების კარაქი და რძის სხვა ცხიმები; რძის პასტები - 639.8 ათასი დოლარი;
• ღორის ქონი, მჭლე ხორცისაგან გამოცალკევებული და შინაური ფრინველის ქონი - 532.2 ათასი დოლარი;