ეკონომიკისა და მდგრადი განვითარების სამინისტროს შპს საქართველოს აეროპორტების გაერთიანება (UAG) უკვე ტრადიციულად უერთდება ყველაზე გემრიელ გასტრონომიულ ღონისძიებას - „გემო ფესტს“. 

წელს აეროპორტების გაერთიანება ფესტივალში მესტიის აეროპორტით არის წარმოდგენილი, ტურიზმის ეროვნულ ადმინისტრაციასთან ერთად ღონისძიების მთავარი პარტნიორია და დღეს, 15:00 საათიდან ორი დღის განმავლობაში სტუმრებს სეტის მოედანზე ელოდება.

ფესტივალზე დასწრების გაზრდილი ინტერესიდან გამომდინარე, მესტიის მიმართულებით აეროპორტების გაერთიანებამ 5 დამატებითი ავიარეისი დანიშნა. დამატებითი ფრენები ნატახტარი-მესტიისა და მესტია-ნატახტარის მიმართულებით შესრულდება და რეგულარულ რეისებს დაემატება, რაც სტუმრებისთვის მგზავრობას კიდევ უფრო კომფორტულსა და ხელმისაწვდომს გახდის.

საქართველოს აეროპორტების გაერთიანების გენერალური დირექტორის, ლევან მოსეშვილის განცხადებით, გადაწყვეტილება რეგიონში ტურისტული ნაკადების მხარდაჭერას ემსახურება.

„საქართველოს აეროპორტების გაერთიანება უკვე ტრადიციულად მონაწილეობს გემო ფესტში და ამჯერად, მესტიის აეროპორტით, ფესტივალის მთავარი პარტნიორია. ჩვენი მიზანია რეგიონებში ავიამიმოსვლის ხელშეწყობა და მესტიის, როგორც ტურისტული მიმართულების, კიდევ უფრო გაძლიერება. დამატებითი რეისები ხელს შეუწყობს მესტიაში როგორც შიდა, ისე საერთაშორისო ვიზიტორების რაოდენობის ზრდას და ფესტივალზე დასწრებას კიდევ უფრო მარტივსა და ხელმისაწვდომს გახდის,“ განაცხადა ლევან მოსეშვილმა.

21-22 თებერვალს, მესტიის ცენტრში გამართული „გემო ფესტი“ სტუმრებს სვანური კულინარიის გამორჩეულ გემოებსა და ტრადიციებს გააცნობს. ფესტივალის ფარგლებში წარმოდგენილი იქნება ადგილობრივი მზარეულებისა და მოწვეული შეფების მიერ სვანური სამზარეულოს თანამედროვე ინტერპრეტაციები.

პროექტის მიზანია რეგიონებში გასტრონომიული ტურიზმის ხელშეწყობა, ადგილობრივი კულინარიული მემკვიდრეობის პოპულარიზაცია, მეწარმეების მხარდაჭერა და შიდა და საერთაშორისო ტურიზმის სტიმულირება.