საქართველოს ეკონომიკური ფორუმის 32-ე დისკუსია „საქართველოს აგრარული პოლიტიკის პრიორიტეტები და ახალი შესაძლებლობები” გაიმართა.

ღონისძიება გარემოს დაცვისა და სოფლის მეურნეობის მინისტრმა დავით სონღულაშვილმა გახსნა.

ღონისძიებას მოდერატორობას უწევდა „ბიზნეს ინსაიდერი საქართველოს“ და "საქართველოს ეკონომიკური ფორუმის" დამფუძნებელი და ხელმძღვანელი გიორგი აბაშიშვილი.

ეკონომიკურ ფორუმში მონაწილეობდნენ: საქართველოს პარლამენტის სოფლის მეურნეობის კომიტეტის თავმჯდომარე გელა სამხარაული, „თეგეტა ჰოლდინგის“ მთავარი აღმასრულებელი ოფიცერი ეკატერინე ქავთარაძე, საერთაშორისო ანალიტიკური ლაბორატორიის დამფუძნებელი ნათია ცაბუტაშვილი, სადაზღვევო კომპანია ალდაგის გენერალური დირექტორი გიორგი ბარათაშვილი, საქართველოს ბანკის გენერალური დირექტორის მოადგილე ზურაბ ქოქოსაძე. 

დისკუსიის „საქართველოს აგრარული პოლიტიკის პრიორიტეტები და ახალი შესაძლებლობები“ ფარგლებში მონაწილეებმა ყურადღება გაამახვილეს საქართველოს აგრარული სექტორის განვითარების ძირითად მიმართულებებზე, სოფლის მეურნეობის პროდუქტიულობისა და კონკურენტუნარიანობის ზრდაზე, თანამედროვე ტექნოლოგიებისა და ინოვაციური მიდგომების დანერგვაზე, აგრეთვე ადგილობრივი წარმოების გაძლიერებისა და საექსპორტო პოტენციალის გაფართოების შესაძლებლობებზე. განხილვის მნიშვნელოვანი მიმართულებები იყო აგრობიზნესისთვის ფინანსურ რესურსებზე ხელმისაწვდომობა, სახელმწიფო მხარდაჭერის მექანიზმების ეფექტიანობა, საინვესტიციო შესაძლებლობები და სექტორის მდგრადი განვითარების პერსპექტივები.

„საკმაოდ საინტერესო თემა გავშალეთ დღეს ფორუმზე. სოფლის მეურნეობა ჩვენი ქვეყნისთვის საკმაოდ მნიშვნელოვანი დარგი არის, გამომდინარე იქედან, რომ საკმაოდ მოსახლეობის დიდი ნაწილი არის ჩართული სოფლის მეურნეობაში და მნიშვნელოვანია, რომ მოხდეს ამ დარგის ტექნოლოგიური განვითარება იმ კუთხით, რომ გაიზარდოს პროდუქტიულობა და უფრო მეტი პროდუქცია გამოვუშვათ და უფრო ხარისხიანი პროდუქცია გამოვუშვათ.

ამავდროულად, ეს სფერო მნიშვნელოვანია, გამომდინარე იქედან, რომ სურსათის უსაფრთხოება დღევანდელ მსოფლიოში არის საკმაოდ აქტუალური თემა. შესაბამისად, ყველა ჩართული მხარე მგონია, რომ უნდა იყოს მოწადინებული იმისკენ, რომ მოხდეს ამ დარგის სწორად განვითარება და სწორად მოხდეს ხელის შეწყობა და სახელმწიფოს როლი აქ არის უმნიშვნელოვანესი.

საქართველოს ბანკი, როგორც უნივერსალური ბანკი და დარგის ლიდერი, საკმაოდ აქტიურად აფინანსებს ამ მიმართულებას. მხოლოდ გასული წელიწადი რომ შევაჯამოთ, სააგენტოს მიერ გავრცელებული ინფორმაციით, ჯამური აგრო დაფინანსებაში, რაც იყო გაცემული გასულ წელს, 52%-მდე უკავია წილი საქართველოს ბანკს. ეს ნიშნავს იმას, რომ ჩვენ საკმაოდ დიდი წვლილი შეგვაქვს ამ სფეროს დაფინანსებაში და მიგვაჩნია, რომ კიდევ უნდა მოხდეს დახვეწა ამ საინიციატივო პროგრამების, რომ უფრო მეტად მოხდეს ხელშეწყობა ფერმერული მეურნეობის გამსხვილების, რაც საწინდარი იქნება იმისი, რომ უფრო პროდუქტიულობა ამაღლდეს ამ დარგში.

მადლობა კიდევ ერთხელ ფორუმის მონაწილეებს“, - აცხადებს ზურაბ ქოქოსაძე.

საქართველოს ეკონომიკური ფორუმის გენერალური სპონსორი - საქართველოს ბანკი

საქართველოს ეკონომიკური ფორუმის მუდმივი პარტნიორი - UGT - იუჯითი

პარტნიორები - თეგეტა ჰოლდინგი, საერთაშორისო ანალიტიკური ლაბორატორია, ალდაგი, ტასჰაბი,  Forum Ekonomiczne / Economic Forum; Coca-Cola Bottlers Georgia; წყალი მთის • Water MTIS; Chelti Winery / მეღვინეობა ჩელთი