მნიშვნელოვანია, საქართველო ჩამოყალიბდეს როგორც ციფრული ჰაბი და თავისი როლი ითამაშოს ციფრული დერეფნის კონტექსტში - თამარ იოსელიანი
საერთაშორისო ციფრული დაკავშირებადობა და ციფრული ჰაბის განვითარების პერსპექტივები, ხელოვნული ინტელექტი და საქართველოს ინოვაციური მოდერნიზაცია, ფართოზოლოვანი ინტერნეტ-ქსელის განვითარება და ინტერნეტ ხელმისაწვდომობა, - ეს არის მცირე ჩამონათვალი საკითხებისა, რომელიც საჯარო, კერძო და ტექნიკური საზოგადოების წარმომადგენლებმა ინტერნეტ-მმართველობის ფორუმზე (GeoIGF) განიხილეს.
ეკონომიკისა და მდგრადი განვითარების მინისტრის მოადგილის თამარ იოსელიანის განცხადებით, საქართველოს მთავრობის პრიორიტეტებს შორისაა ციფრული ეკონომიკის და სატელეკომუნიკაციო ინფრასტრუქტურის განვითარება. „ბოლო წლებში საინფორმაციო და საკომუნიკაციო ტექნოლოგიების სფეროში განხორციელებულმა რეფორმებმა და პროგრამებმა გადამწყვეტი როლი ითამაშეს ჩვენი ქვეყნის ციფრული სფეროს განვითარების კუთხით, რათა საქართველო ფეხდაფეხ მიჰყვეს ამ სფეროში მსოფლიოში არსებულ ტენდენციებს. სტრატეგია, რომლითაც ჩვენ ვხელმძღვანელობთ, თავსებადია ევროკავშირის შესაბამის დოკუმენტებთან," - აღნიშნა მინისტრის მოადგილემ.
თამარ იოსელიანის შეფასებით, GeoIGF ის პლატფორმაა, რომელიც აერთიანებს განსხვავებულ ხედვებსა და გამოცდილებებს და ქმნის სივრცეს ისეთი მნიშვნელოვანი საკითხების განსახილველად, როგორიც არის ციფრული ინფრასტრუქტურა და ინტერნეტზე ხელმისაწვდომობა, ციფრული ინკლუზია, კიბერუსაფრთხოება, მონაცემთა დაცვა, ხელოვნური ინტელექტი და ა.შ. „ჩვენთვის მნიშვნელოვანია, საქართველო ჩამოყალიბდეს როგორც ციფრული ჰაბი და შესაბამისად, თავისი როლი ითამაშოს ციფრული დერეფნის კონტექსტში," - აღნიშნა მინისტრის მოადგილემ.
ფორუმი 20 წელია, რაც გაეროს ეგიდით მსოფლიოს სხვადასხვა ქვეყნებში ყოველწლიურად იმართება. საქართველოში ფორუმი ეკონომიკისა და მდგრადი განვითარების სამინისტროს, კომუნიკაციების კომისიისა და სატელეკომუნიკაციო ოპერატორების ასოციაციის ორგანიზებით ჩატარდა.
სხვა სიახლეები
ჩვენ ვმუშაობთ, რათა შევქმნათ სისტემა, რომელიც იქნება უფრო უსაფრთხო, დივერსიფიცირებული, კონკურენტული, მდგრადი და, რაც მთავარია, მეტად დაკავშირებული როგორც რეგიონულ, ისე საერთაშორისო ენერგეტიკულ სივრცესთან - ინგა ფხალაძე
22.09.2026.14:20
„ჩვენ ვმუშაობთ, რათა შევქმნათ სისტემა, რომელიც იქნება უფრო უსაფრთხო, დივერსიფიცირებული, კონკურენტული, მდგრადი და, რაც მთავარია, მეტად დაკავშირებული როგორც რეგიონულ, ისე საერთაშორისო ენერგეტიკულ სივრცესთან", - განაცხადა ეკონომიკისა და მდგრადი განვითარების მინისტრის მოადგილე ინგა ფხალაძემ ენერგეტიკის რეგულირების შესახებ მე-9 მსოფლიო ფორუმის გახსნის ღონისძიებაზე სიტყვით გამოსვლისას.
როგორც მინისტრის მოადგილემ აღნიშნა, ფორუმი საქართველოში პირველად ტარდება, რაც კიდევ უფრო მნიშვნელოვანია იმ ფონზე, რომ დღეს საქართველოს წინაშე სტრატეგიული მნიშვნელობის ენერგეტიკული ამოცანები დგას. ამასთან, ინგა ფხალაძის შეფასებით, მნიშვნელოვანია, რომ ასეთი ღონისძიებები გულისხმობს არა მხოლოდ საუბარს ენერგეტიკის გამოწვევებსა და მომავალზე, არამედ საფუძველს უყრის იმ წესების, ინსტიტუტებისა და გადაწყვეტილებების ჩამოყალიბებას, რომლებიც ენერგეტიკულ მომავალს ქმნიან.
„ამ პროცესში კი, ცხადია, ფუნდამენტურია რეგულირების როლი. ენერგეტიკული ტრანსფორმაცია დღეს უკვე აღარ არის მხოლოდ ტექნოლოგიური ცვლილებების ერთობლიობა. განახლებადი ენერგიის სწრაფი განვითარება, ელექტროენერგიის ბაზრების ინტეგრაცია, ენერგიის შემნახველი სისტემები, კიბერუსაფრთხოება, კლიმატის ცვლილება და ხელოვნური ინტელექტი - ეს ყველაფერი ერთად ქმნის ახალ ტექნოლოგიურ, სოციალურ და ეკონომიკურ რეალობას", - აღნიშნა მინისტრის მოადგილემ.
სიტყვით გამოსვლისას ინგა ფხალაძემ ისაუბრა არსებულ რეალობაში მარეგულირებელი ორგანოების როლსა და ენერგეტიკის სექტორის დამოუკიდებელი და პროფესიონალური რეგულირების მნიშვნელობაზე.
„ნამდვილი ტრანსფორმაცია მხოლოდ მაშინ ხდება შესაძლებელი, როდესაც ახალი სიმძლავრეები დაკავშირებულია ძლიერ ქსელთან, ინვესტიციები - პროგნოზირებად წესებთან, ბაზრის განვითარება - სამართლიან კონკურენციასთან, ხოლო ენერგეტიკული პოლიტიკა - მომხმარებლის ინტერესებთან, რაც დამოუკიდებელი და პროფესიონალური რეგულირების გარეშე შეუძლებელია", - განაცხადა მინისტრის მოადგილემ.
ენერგეტიკის რეგულირების შესახებ მე-9 მსოფლიო ფორუმი თბილისში სემეკის ორგანიზებით იმართება - ევროპისა და სხვადასხვა ქვეყნის ენერგეტიკული გაერთიანების, ასოციაციების წევრი ქვეყნების წარმომადგენლების, სამთავრობო უწყებების, ენერგეტიკული და დონორი ორგანიზაციების პირველი პირების მონაწილეობით.
