განაკვეთის უცვლელად დატოვება ჩვენს მოლოდინებთან შესაბამისობაშია, - აღნიშნულის შესახებ თიბისი კაპიტალის მთავარმა ეკონომისტმა ოთარ ნადარაიამ ეროვნული ბანკის მონეტარული პოლიტიკის კომიტეტის დღევანდელი გადაწყვეტილების შეფასებისას განაცხადა.

,,თავისთავად, გასათვალისწინებელია, რომ მაღალია ინფლაცია, რაც პრობლემაა, თუმცა ინფლაციის პროგნოზი ამ ეტაპისთვის უფრო დამაიმედებელია. თუმცა ინფლაცია წელს მაღალ მაჩვენებლებზე დარჩება. ჩვენი ბოლო პროგნოზი დაახლოებით 5%-ზე მეტია, რაც საკმაოდ მაღალია, მაგრამ ის შოკი რამაც ეს გამოიწვია, ვგულისხმობ ახლო აღმოსავლეთის საკითხს, რაც ძალიან სამწუხაროა, ეს ამ ეტაპზე მილევადს ჰგავს - მცირდება ნავთობის ფასი. ასევე მნიშვნელოვანია, რომ მაისის ინფლაცია მართალია წლიური მაღალია, მაგრამ თვე-თვეზე თუ შევხედავთ ანუ მაისი აპრილთან სეზონური ფაქტორების გამორიცხვით, სამიზნესთან ყოველთვიური ინფლაცია ახლოს არის. ერთის მხრივ, ყოველთვიური საზომით ფასებმა დაკარგა სიძლიერე და მეორე მხრივ, რაც ახალი ინფორმაცია გვაქვს უფრო დამაიმედებელია მოლოდინები, რადგან ნავთობის ფასები მცირდება. ჩვენ ისედაც გვქონდა შემცირება ბრენტის დაახლოებით 80$-მდე წლის ბოლოს, მაგრამ ახლა ვხედავთ, რომ შესაძლოა უფრო მეტადაც შემცირდეს. იმასაც ვიტყვი ამ კუთხით რომ წამყვანი ანალიტიკოსები, ვინც საერთაშორისო ბაზრებზე მუშაობენ, მაინც ჯერ-ჯერობით პროგნოზებზე ფრთხილობენ. მართალია პროგრესია, რომ ჰორმუზის სრუტესთან დაკავშირებით შეთანხმება მიღწეულია, მაგრამ ბევრი კითხვა რჩება იმ პრობლემური საკითხების ირგვლივ თუ როგორი იქნება გადაწყვეტილება”, - აღნიშნა ოთარ ნადარაიამ.