სახელმწიფო ტენდერებში მონაწილეობის რისკების გამო რიგი სამშენებლო კომპანიები სახელმწიფო პროექტებზე მუშაობას თავს არიდებენ, - ამის შესახებ ინფრასტრუქტურის მშენებელთა ასოციაციის აღმასრულებელმა დირექტორმა, ირაკლი გიორგობიანმა განაცხადა. მისი თქმით, ასოციაცია სახელმწიფოსთან ერთად ისეთ ცვლილებებზე მუშაობს, რომლებიც რისკებს შეამცირებს და ინფრასტრუქტურულ შესყიდვებში კონკურენციას გაზრდის.

„მოხარული ვარ, რომ ყოველდღიურად იზრდება მომართვიანობა და უკვე 65-ზე მეტი კომპანია მონაწილეობს ასოციაციაში. აქ არიან არა მარტო სამშენებლო კომპანიები, არამედ სამშენებლო მასალების მწარმოებლები, სამშენებლო ტექნიკის იმპორტიორები და ოპერატორები, ფინანსური ინსტიტუტები, საზღვაო და იურიდიული კომპანიები. ფაქტობრივად, ამ ეკოსისტემაში მონაწილე ყველა სექტორის წარმომადგენელი გვყავს, რაც ჩვენ, ასოციაციას, გვაძლევს საშუალებას, კარგად დავინახოთ სექტორის მდგომარეობა, თუ რა გამოწვევები აქვს მას, და მერე მოვახდინოთ ამ გამოწვევების შესაბამისი ადრესირება და რეაგირება.

ამ ეტაპზე, მიმდინარე წელს, ჩვენთვის მნიშვნელოვანია სახელმწიფოსთან მუშაობა. მოგეხსენებათ, რომ მშენებლობის სექტორში სახელმწიფოს დიდი წვლილი უჭირავს, თუმცა კერძო სექტორიც, დეველოპერული პროექტებით, მოთხოვნის მნიშვნელოვანი მდგენელია. სახელმწიფოსთან დისკუსიაში სულ ვამბობთ, რომ დღეს კერძო სექტორი უფრო დიდი კონკურენტია სახელმწიფოსთვის ამ ნაწილში, ვიდრე აქამდე იყო. შესაბამისად, არიან ასოციაციის წევრი კომპანიები, რომლებიც სახელმწიფოსთან არ თანამშრომლობენ გარკვეული რისკების გამო.

ჩვენი მიზანი სწორედ ის არის, რომ სახელმწიფოსთან ურთიერთობის რისკიანობა შევამციროთ, რომ მათთვისაც მიმზიდველი გახდეს სახელმწიფო შესყიდვები ინფრასტრუქტურულ პროექტებში. ეს, თავის მხრივ, გაზრდის კონკურენციას და სახელმწიფო გაცილებით მაღალ ხარისხსა და ფასის უკეთეს თანაფარდობას მიიღებს. ამ ნაწილში მნიშვნელოვანია სახელშეკრულებო ურთიერთობები სახელმწიფოსთან, რომელზეც ჩვენ უკვე წარდგენილი გვაქვს ინიციატივა. ის ამჟამად დამუშავების ეტაპზეა და ვფიქრობთ, რომ აქაც მნიშვნელოვანი სიახლეები იქნება, რაც თავის მხრივ შეამცირებს რისკიანობას სახელმწიფო ტენდერებში ოპერირებისას“, - განაცხადა გიორგობიანმა.