პირველად საქართველოს ერთიან ენერგეტიკულ ქსელს მზის ხუთი ელექტროსადგური მიუერთდება, ჯამური სიმძლავრით - 10 მგვტ
საქართველოს სახელმწიფო ელექტროსისტემა" ერთიან ენერგეტიკულ ქსელს მზის ხუთ ელექტროსადგურს მიუერთებს, ჯამური სიმძლავრით - 10 მგვტ. ელექტროგადამცემ ქსელში მზის ენერგიის ინტეგრაცია საქართველოში პირველად განხორციელდება.
ეკონომიკისა და მდგრადი განვითარების სამინისტროს ენერგეტიკული პოლიტიკისა და საინვესტიციო პროექტების დეპარტამენტის უფროსის ალექსანდრე სოხაძის ინფორმაციით, „საქართველოს სახელმწიფო ელექტროსისტემამ" პროექტის განსახორციელებლად კახეთის რეგიონში, მის კუთვნილ 5 ქვესადგურში („ჯუგაანი 110", „ხირსა 110"„ გამარჯვება 110", „ქისტაური 35", „ქედი 35") 6/10 კვ ძაბვის, თანამედროვე ტიპის უჯრედების მოწყობა უკვე დაასრულა.
„გლობალური ენერგეტიკული გამოწვევების ფონზე ენერგეტიკული თვითკმარობა და ენერგოდამოუკიდებლობა კიდევ უფრო მნიშვნელოვანი ხდება. განახლებადი ენერგიების ოპტიმალური ათვისება საქართველოს მთავრობის ერთ-ერთი მნიშვნელოვანი პრიორიტეტია. მიმდინარე ჰიდროპროექტების პარალელურად, აქტიურ ფაზაშია ქარისა და მზის ელექტროსადგურების პროექტებიც. საქართველოს მთავრობის აქტიური მხარდაჭერით დასკვნით ეტაპზეა ჯამურად 10 მგვტ სიმძლავრის მზის ელექტროსადგურის პროექტები", - აღნიშნა ალექსანდრე სოხაძემ.
„საქართველოს სახელმწიფო ელექტროსისტემა" აქტიურად მუშაობს მწვანე ენერგიების ქსელთან მიერთების მიმართულებით - განახლებადი ენერგიის წყაროების სისტემაში ინტეგრაცია მნიშვნელოვან გავლენას მოახდენს ქვეყნის ენერგოდამოუკიდებლობაზე, გაზრდის ენერგოსისტემის უსაფრთხოებას და შეამცირებს გარემოზე მავნე ზემოქმედებას.
ამჟამად სამშენებლო ფაზაშია 125 მეგავატი სიმძლავრის ქარის სადგურები (ჯამური ინვესტიციით 195 მლნ.აშშ.დოლარი) რომელთა ეტაპობრივი ამოქმედება მომდევნო წლების განმავლობაში მნიშვნელოვნად გააძლიერებს ქვეყნის ენერგეტიკულ სისტემას. ასევე დაახლოებით 200 მეგავატზე (ჯამური ინვესტიცია დაახლოებით 240 მლნ. აშშ დოლარი) უკვე დასრულებულია ტექნიკურ-ეკონომიკური კვლევა და განიხილება შესაბამისი პროექტების გადაყვანა სამშენებლო ეტაპზე. რაც შეეხება მზის ელექტროსადგურებს, გარდა ნეტო-სადგურებისა, ამ ეტაპზე დასკვნით ფაზაშია 10 მეგავატამდე სიმძლავრის ელექტროსადგურების მშენებლობა. პროექტი ხორციელდება ადგილობრივი ბანკების თანამონაწილეობით, მათი ჯამური ინვესტიცია 4.75 მლნ. დოლარია, ხოლო დაახლოებით 150 მეგავატზე (ჯამური ინვესტიცია 88.45 მლნ აშშ დოლარი) უკვე დასრულებულია ტექნიკურ-ეკონომიკური კვლევა და განიხილება შესაბამისი პროექტების სამშენებლო ეტაპზე გადაყვანა.
„განახლებადი ენერგიების ოპტიმალური ათვისება გრძელვადიან პოლიტიკასთან სრულ შესაბამისობაშია, ვინაიდან აღნიშნული უზრუნველყოფს ქვეყანაში გენერაციის მომატებას, რაც საერთო ჯამში იმის საშუალებას მოგვცემს, რომ მომავალ წლებში ნეტ-ექსპორტიორი გავხდეთ", - აცხადებს ენერგეტიკული პოლიტიკისა და საინვესტიციო პროექტების დეპარტამენტის უფროსი.
ამასთან, ალექსანდრე სოხაძე ხაზგასმით აღნიშნავს ამ კონტექსტში შავი ზღვის წყალქვეშა კაბელის პროექტის მნიშვნელობას, რომელიც უახლოეს წლებში საქართველოსა და ევროპის ენერგეტიკულ ბაზრებს დააკავშირებს. პროექტის საშუალებით შესაძლებელი გახდება ადგილობრივი მწვანე ენერგიის პირდაპირ ევროპულ ბაზარზე გატანა. ეს თავის მხრივ, გააჩენს რეალურ შესაძლებლობას, რომ საქართველომ განახლებადი ენერგიების განვითარებით უზრუნველყოს როგორც საკუთარი ენერგეტიკული უსაფრთხოება, ასევე წვლილი შეიტანოს ევროპული ენერგეტიკული უსაფრთხოების გაძლიერებაში.
საქართველოდან მინერალური და მტკნარი წყლების ექსპორტი 6%-იან ზრდას აჩვენებს
საქართველოს საბანკო სისტემა მაღალი სანდოობით გამოირჩევა, რასაც დეპოზიტებისა და დანაზოგების ზრდის დინამიკაც ადასტურებს - ნათია თურნავა
22.05.2026.17:31
მარიამ ქვრივიშვილმა სტამბოლში ბუნებრივი რესურსების სამიტის ფარგლებში ენერგეტიკის მინისტრების პანელში მიიღო მონაწილეობა
22.05.2026.15:41
