EBRD საქართველოში ყველაზე დიდი მზის ელექტროსადგურის მშენებლობისთვის $19.6 მილიონის დაფინანსების გამოყოფას გეგმავს. დაფინანსება საქართველოს უმსხვილესი მასშტაბის მზის ელექტროსადგურის განვითარებას მოხმარდება, რაც ქვეყნის განახლებადი ენერგიის გენერაციის სიმძლავრეს გაზრდის.

პროექტი მოიცავს 40.6 მეგავატი სიმძლავრის ახალი მზის ფოტოელექტრული (PV) სადგურის მშენებლობის დაფინანსებას, ასევე ადგილობრივი ბანკიდან მანამდე მოზიდული ხიდური დაფინანსების რეფინანსირებას ხუთი უკვე მოქმედი მზის ფოტოელექტრული სადგურისთვის, რომელთა ჯამური დადგმული სიმძლავრე 12.2 მეგავატს შეადგენს. აღნიშნული დაფინანსება EBRD-ის მიერ კომპანიების -  შპს „კახეთის მზის“, შპს „მზის ველის“, შპს „ველის“ და შპს „ალაზნის მზის“ სასარგებლოდ შეიძლება მიიმართოს სესხის გამოყოფას სახით. აღნიშნული კომპანიები საქართველოში 52.8 მეგავატი ჯამური სიმძლავრის მზის ელექტროსადგურების (SPP) მშენებლობისა და განვითარების მიზნით არიან დაფუძნებული.

პროექტთან დაკავშირებით, Business Insider Georgia-მ ექსკლუზიურად კითხვით EBRD-ს მიმართა, რომლის საპასუხოდაც ევროპის რეკონსტრუქციისა და განვითარების ბანკისგან (EBRD) მიღებული ვადებით პროექტთან დაკავშირებით დირექტორთა საბჭოს მიერ მისი განხილვის სავარაუდო თარიღია 2026 წლის 9 სექტემბერი.

,,პროექტის მნიშვნელობასთან დაკავშირებით, დამტკიცების შემთხვევაში, პროექტის ფარგლებში საქართველოში აშენდება ქვეყნის მასშტაბით ყველაზე დიდი კომერციული დანიშნულების მზის ელექტროსადგური (Utility-scale solar power plant). დაფინანსება მოიცავს 40.6 მგვტ სიმძლავრის ახალი (Greenfield) მზის ფოტოელექტრული (PV) სადგურის მშენებლობას, ასევე უკვე მოქმედი ხუთი მზის ელექტროსადგურის (ჯამური სიმძლავრით 12.2 მგვტ) რეფინანსირებას.

პორტფელი, მთლიანობაში, წლიურად დაახლოებით 70.6 გიგავატსაათ (GWh) ელექტროენერგიას გამოიმუშავებს, რაც ყოველწლიურად დაახლოებით 16,333 ტონა CO₂-ის ემისიის თავიდან აცილებას შეუწყობს ხელს. ამასთან, პროექტი შეავსებს საქართველოს არსებულ ჰიდროენერგეტიკულ გენერაციას.

პროექტი შეესაბამება EBRD-ის ენერგეტიკის სექტორის სტრატეგიას და საქართველოსთვის განსაზღვრულ ქვეყნის სტრატეგიას, რომლებიც ენერგეტიკული წყაროების დივერსიფიკაციასა და სექტორში კერძო სექტორის მონაწილეობის გაძლიერებას ითვალისწინებს. EBRD-ის დამატებითი ღირებულება მდგომარეობს იმაში, რომ ბანკი უზრუნველყოფს გრძელვადიან, პროექტის დაფინანსების (Project finance) პრინციპზე დაფუძნებულ ფინანსურ რესურსს, ისეთი პირობებით, რომლებიც ამჟამად ადგილობრივ ბაზარზე ხელმისაწვდომი არ არის”, - აღნიშნავს EBRD Business Insider Georgia-ს კითხვის საპასუხოდ.