საერთაშორისო სარეიტინგო სააგენტო Fitch Ratings-მა „პროკრედიტ ბანკის“ (საქართველო) გრძელვადიანი ემიტენტის დეფოლტის რეიტინგების (IDR) პერსპექტივა სტაბილურიდან პოზიტიურამდე გააუმჯობესა და რეიტინგები „BB+“ დონეზე დაადასტურა.

Fitch Ratings-ის შეფასებაში განსაკუთრებული ყურადღება ეთმობა „პროკრედიტ ბანკის“ საკრედიტო პორტფელის მაღალ დოლარიზაციას, შეზღუდულ საბაზრო პოზიციებსა და მსხვილ ბანკებთან კონკურენციას.

„პროკრედიტ ბანკის საკრედიტო პორტფელი მაღალი დოლარიზაციით ხასიათდება (2026 წლის პირველი ნახევრის ბოლოს სესხების 65% უცხოურ ვალუტაში იყო დენომინირებული), რაც მცირე და საშუალო ბიზნესის დაკრედიტებაზე ფოკუსირებითა და საცალო დაკრედიტების შეზღუდული მასშტაბით არის განპირობებული. აღნიშნული მაჩვენებელი ყველაზე მაღალია საქართველოში Fitch-ის მიერ შეფასებულ ბანკებს შორის და აღემატება საბანკო სექტორის საშუალო მაჩვენებელს, რომელიც 42%-ს შეადგენს“, - აღნიშნულია Fitch Ratings-ის შეფასებაში.

სააგენტოს ინფორმაციით, „პროკრედიტ ბანკი“ საქართველოში მოქმედ 17 ბანკს შორის აქტივების მოცულობით მეშვიდე ადგილზეა და 2026 წლის პირველი ნახევრის ბოლოს საბანკო სექტორის აქტივების მხოლოდ 2%-ს ფლობდა.

Fitch Ratings-ი აღნიშნავს, რომ „პროკრედიტ ბანკის“ რეიტინგები მნიშვნელოვანწილად დამოკიდებულია მისი ერთადერთი აქციონერის, ProCredit Holding AG-ის (BBB/სტაბილური), პოტენციურ მხარდაჭერაზე.

„ეს რისკები უკიდურესი მაკროეკონომიკური და სუვერენული სტრესის შემთხვევაში შესაძლოა ზღუდავდეს „პროკრედიტ ბანკის“ შესაძლებლობას, მოემსახუროს საკუთარ ვალდებულებებს, ან მშობელი კომპანიის მზაობას, გაუწიოს მას მხარდაჭერა, ან ორივეს ერთდროულად“, - აღნიშნავს Fitch Ratings-ი.