მცირე და საშუალო ჰესების ასოციაციის ხელმძღვანელის გიორგი მარგებაძის განცხადებით, ენერგეტიკა ქვეყნისთვის მნიშვნელოვანი დარგია, რადგან ელექტროენერგიის წილი პრაქტიკულად ყველა პროდუქტსა და წარმოებაში გვხვდება. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას გიორგი მარგებაძემ აღნიშნა, საქართველოს განახლებადი ენერგიის პოტენციალი წლიურად დაახლოებით 50 მილიარდ კილოვატ საათს აღწევს, რაც ქვეყნის ამჟამინდელ მოხმარებას მნიშვნელოვნად აღემატება და სწორი დაგეგმვის პირობებში ეკონომიკური ზრდის სერიოზულ შესაძლებლობას ქმნის.

„პირველ რიგში უნდა აღვნიშნოთ, რომ ენერგეტიკის დარგი ყველაზე მნიშვნელოვანი დარგია, გამომდინარე იქიდან, რომ ელექტროენერგიის წილი აბსოლუტურად ყველა პროდუქტში გვხვდება - ნებისმიერ წარმოებაში. 

რაც შეეხება პოტენციალს, რომელიც ჩვენს ქვეყანას აქვს, რომ გადავხედოთ ნორვეგიის წყლის რესურსების მართვის სააგენტოს, რომელმაც გააკეთა კვლევა და შეაფასა ზოგადად ჩვენი ჰიდრორესურსებიც და ქარის და მზეც - ეს დაახლოებით 50 მილიარდ კილოვატ საათს ითვლის და ვიცით, რომ ჩვენი ქვეყნის მოხმარება აფხაზეთიანად არის დაახლოებით 13,5-14 მილიარდი კილოვატ საათი. შესაბამისად, რესურსი ძალიან ბევრი გვაქვს, ქარს და მზეს რომ თავი დავანებოთ, ჰიდროს ნაწილში - წყალი რომელიც მუდმივად მოედინება, ეს არის დაახლოებით 30 მილიარდ კილოვატ საათამდე, იმაზე ორჯერ მეტი რასაც ჩვენ დღეს მოვიხმართ. ამიტომ პოტენციალი ძალიან დიდია, რესურსი გვაქვს და მთავარია ახლა სწორად ავმუშაობდეთ, სწორად დავგეგმოთ, რათა მაქსიმალურად ავითვისოთ ჩვენი რესურსები“, - განაცხადა მცირე და საშუალო ჰესების ასოციაციის ხელმძღვანელმა.