„საქართველო ფინანსებისა და ტექნოლოგიების სფეროში საერთაშორისო თანამშრომლობისა და ინოვაციების განვითარების მნიშვნელოვანი პლატფორმაა", - ამის შესახებ BR Capital-ის დამფუძნებელმა რეზო შმერცმა განაცხადა.

მისი შეფასებით, „თბილისის ფინანსური სამიტი" ყოველწლიურად ვითარდება, იზრდება ღონისძიების მონაწილეთა მასშტაბი და დისკუსიების ხარისხი, რაც საქართველოს საერთაშორისო ფინანსურ საზოგადოებაში ცნობადობის ზრდას უწყობს ხელს.

რეზო შმერცმა ხაზი გაუსვა, რომ საქართველო საერთაშორისო შეხვედრებისა და ფინანსური კავშირების ჩამოყალიბებისთვის მნიშვნელოვან უპირატესობებს ფლობს. ქვეყნის სტუმართმოყვარეობა, ბუნება, კულტურა და ხელსაყრელი გარემო ქმნის წინაპირობებს, რომ საქართველო არა მხოლოდ საერთაშორისო ღონისძიებების მასპინძელი, არამედ რეგიონული ფინანსური ჰაბიც გახდეს.

BR Capital-ის დამფუძნებელმა ასევე ისაუბრა გლობალური ფინანსური ტექნოლოგიების განვითარების ტენდენციებსა და საქართველოს ფინანსური სექტორის შესაძლებლობებზე. მისი განცხადებით, ამ პროცესში განსაკუთრებული მნიშვნელობა აქვს მარეგულირებლის მზაობას, მოუსმინოს კერძო სექტორს და დროულად უპასუხოს ბაზრის საჭიროებებს.

„საქართველოს ჰყავს ძალიან მეგობრული და პროგრესული მარეგულირებელი, რომელიც ყოველთვის უსმენს ბიზნესის მოთხოვნებს და სწრაფად რეაგირებს ფინანსური სექტორიდან წამოსულ საჭიროებებზე. შესაბამისად, ფინანსური ინოვაციების განვითარება და პროცესების ოპტიმიზაცია მნიშვნელოვანია როგორც ეკონომიკური ზრდისთვის, ისე ბიზნესის სხვა სექტორებისთვის", - განაცხადა რეზო შმერცმა.

მისივე თქმით, საქართველო აქტიურად ნერგავს ახალ ტექნოლოგიებს და ქმნის ინოვაციებისთვის შესაბამის მარეგულირებელ გარემოს, მათ შორის რეგულირების ექსპერიმენტული ჩარჩოებისა და ციფრული ფინანსების განვითარების მიმართულებით. ამ კონტექსტში მან ციფრული ლარის პროექტი და ტრანსსასაზღვრო გადახდების განვითარება გამოყო.

„საქართველო ინოვაციების წინა ხაზზეა, ნერგავს ახალ ტექნოლოგიებს, ეხმარება მარეგულირებელ ლანდშაფტს, სენდბოქსებს. ყველა ეს პროცესი საქართველოში სწრაფად ვითარდება, თუმცა ამავდროულად უსაფრთხოდ და სათანადო რეგულირების პირობებში. ციფრული ფინანსების სამყაროში ბევრი მნიშვნელოვანი ცვლილება ხდება და მოხარული ვართ, რომ ერთ-ერთი ასეთი საერთაშორისო კონფერენცია სწორედ საქართველოში ტარდება. ვფიქრობ, ქვეყნისთვის ყველაფერი ძალიან კარგად ვითარდება", - აღნიშნა რეზო შმერცმა.

BR Capital-ის დამფუძნებელმა სამიტის ფარგლებში მონაწილეობა მიიღო პანელურ დისკუსიაში „ტრანსსასაზღვრო ფინანსური ინოვაციები შუა დერეფანში", რომლის ფარგლებშიც განიხილეს შუა დერეფნის ქვეყნებს შორის ფინანსური და ტექნოლოგიური თანამშრომლობის გაღრმავების შესაძლებლობები, ტრანსსასაზღვრო გადახდების განვითარება, მარეგულირებელი ჩარჩოების დაახლოება, ციფრული იდენტიფიკაციისა და ფინანსური ინფრასტრუქტურის ურთიერთთავსებადობა. დისკუსიის მონაწილეებმა ასევე იმსჯელეს საქართველოს, აზერბაიჯანის, თურქეთისა და სომხეთის თანამშრომლობის პერსპექტივებზე და იმ პრაქტიკულ მექანიზმებზე, რომლებიც კომპანიებს სხვადასხვა ქვეყანაში საქმიანობის გამარტივების შესაძლებლობას მისცემს, თითოეული ქვეყნის კანონმდებლობისა და მომხმარებელთა დაცვის პრინციპების გათვალისწინებით.

საქართველოს ეროვნული ბანკის, ეკონომიკისა და მდგრადი განვითარების სამინისტროსა და სინგაპურის გლობალური ფინანსური და ტექნოლოგიური ქსელის (GFTN) ერთობლივად ორგანიზებულმა, რიგით მეორე „თბილისის ფინანსურმა სამიტმა" წელს 60-მდე ქვეყნის 1000-მდე მონაწილეს უმასპინძლა.