რეფორმები რასაც მთავრობა ახორციელებს მიმართულია იმისკენ, რომ ქვეყანაში უფრო მყარი ფინანსური ვითარება იყოს და არსებული მაკროეკონომიკური პარამეტრები იქნას შენარჩუნებული, - აცხადებს მთავრობის ადმინისტრაციის უფროსი, რომელიც ტელეკომპანია „მაესტროს“ ეთერში გადაცემა Business Insider Georgia-ს სტუმარი იყო. 
ლევან ჟორჟოლიანის განცხადებით, საერთაშორისო სავალუტო ფონდის (IMF) მისიის შეფასებით, საქართველოში მიმდინარე ეკონომიკური და სტრუქტურული რეფორმები დადებითად ფასდება.
„ბოლოს IMF-ის მისია იყო ჩამოსული და ნამდვილად ძალიან დადებითი ასეთი დასკვნა არის მომზადებული. მანამდეც იყო ფაქტების დამდგენი მისიით ჩამოსულები, სადაც ჩვენ ვესაუბრეთ სახელმწიფო საწარმოებში თუ რა რეფორმების განხორციელება გვინდა, რა გავაკეთეთ მაგ მიმართულებით, სანამ ისინი ჩამოვიდოდნენ, რა რეფორმები გავატარეთ, რას ვაპირებთ. ისინი კმაყოფილები იყვნენ, იმიტომ რომ ის, რასაც მთავრობა ახორციელებს, რასაც იგივე ფინანსთა სამინისტრო, ეკონომიკის სამინისტრო ახორციელებენ, ეროვნული ბანკი რასაც აკეთებს, ეს მიმართულია იმისკენ, რომ სიტუაცია მათ შორის ფინანსურად იყოს მყარი ქვეყანაში და ეს მაკროეკონომიკური პარამეტრები იქნას შენარჩუნებული. კორუფციასთან ბრძოლასთან თუნდაც, ამ ყველაფერთან არის დაკავშირებული რეალურად, ამაზე უნდა აისახოს მერე ისევ. რა თქმა უნდა, ჩვენ ძალიან კარგი ურთიერთობა გვაქვს აზიის განვითარების ბანკთან, მსოფლიო ბანკთან, აბსოლუტურად ყველა იმ საერთაშორისო საფინანსო ინსტიტუტთან, რომელიც მუშაობს ქვეყანაში. შემიძლია ვთქვა, რომ ერთ-ერთი სამაგალითო თანამშრომლობა გვაქვს და ფინანსთა სამინისტროს ეს საკითხი ძალიან წარმატებულად მიჰყავს ქვეყანაში და ამის ერთ-ერთი დადასტურება არის სწორედ IMF-ის მისიის ბოლო რეპორტი“,- განაცხადა ჟორჟოლიანმა.