მსხვილი ჰესების პროექტების წინააღმდეგ მიმართულ კამპანიებს მცირე და საშუალო ჰესების ასოციაციის თავმჯდომარე გიორგი მარგებაძე პოლიტიკურად მოტივირებულ პროცესად აფასებს. მისი განცხადებით, ენერგეტიკული პროექტების შეფერხება ქვეყნის ენერგოდამოუკიდებლობას აზიანებს და ზრდის იმპორტირებულ ელექტროენერგიაზე დამოკიდებულებას, მაშინ როდესაც საქართველოს განვითარებისათვის ახალი გენერაციის ობიექტების მშენებლობა კრიტიკულად მნიშვნელოვანია.

„მე აქ მხოლოდ და მხოლოდ პოლიტიზებულ ჯგუფს ვხედავ, რომელიც ამ კონკრეტული სადგურების თემით მთავრობისა და ხელისუფლების გაშავებას ცდილობს. ისინი ჩადიან რეგიონებში, ადგილობრივ მოსახლეობას ტვინს ურევენ, სპექტაკლებს დგამენ და ქმნიან ანტურაჟს, თითქოს მოსახლეობა ამ ყველაფრის წინააღმდეგია.

ყველაზე საწყენი ის არის, რომ ჩვენს ისტორიას რომ გადავხედოთ - ვიღაცას ზვიადი არ მოსწონდა, ვიღაცას შევარდნაძე, ვიღაცას სააკაშვილი, ვიღაცას ბიძინა არ მოსწონს და ვიღაცას არ მოეწონება შემდეგი, ვინც იქნება, მაგრამ საბოლოო ჯამში, ამ ბრძოლაში ვის ვებრძვით? ვებრძვით საკუთარ ქვეყანას და საკუთარ ენერგეტიკას. როდესაც ენერგეტიკას ებრძვი იმის გამო, რომ ვიღაც პერსონალურად არ მოგწონს, საბოლოო ჯამში დარტყმას საკუთარ შვილებსა და მომავალს აყენებ, რადგან შენი დამოკიდებულება მეზობელზე იზრდება. ვინ არის ეს მეზობელი, ვისგანაც უამრავ ელექტროენერგიას ვყიდულობთ? ეს არის ჩრდილოეთი.

სწორედ ამიტომ, რაღაცები ხელშეუხებელი უნდა იყოს. უნდა ვთქვათ, რომ რაც უნდა პოლიტიკური პრეტენზიები გვქონდეს, ენერგეტიკას შევეშვათ, რადგან ეს არის მომავალი, რომელსაც ჩვენი ქვეყნის ფეხზე დაყენება შეუძლია. ხომ ვხედავთ, რა სამყაროში ვცხოვრობთ და სად ვართ? ყველაფერი ელექტროენერგიაზეა გადასული. თუნდაც ხელოვნური ინტელექტი ავიღოთ - ჩვენ ხელოვნური ინტელექტის ეპოქაში ვართ, სადაც მასზე დასმული თითოეული შეკითხვა ელექტროენერგიას მოიხმარს. სასაცილოა, ცოტა ხნის წინ OpenAI-ს ხელმძღვანელს სპეციალურად დაუსვეს კითხვა: როდესაც ხელოვნურ ინტელექტს მადლობას ვუხდით, ამაზე რა თანხა და რესურსი იხარჯებაო? გაეცინა და, თუმცა პირდაპირ არ უთქვამს, მადლობას ნუღარ გადაუხდითო, აღნიშნა, რომ ამ დროს ათობით მილიონი იხარჯება და ძალიან ბევრი ელექტროენერგია იწერება.

წარმოიდგინეთ, ამ ეპოქაში, როდესაც უაზრო ბრძოლებში ვართ ჩაბმული იმის გამო, რომ ვიღაცას ვინმე არ მოსწონს, ვებრძვით ყველაზე მნიშვნელოვან რესურსს, რომელიც ჩვენს ქვეყანას გააჩნია. ეს ხომ გრძელვადიანი პროექტებია? ვიცით, რომ ენგურჰესი უკვე 60 წელია დგას, ასევე გვაქვს ჟინვალჰესი, ლაჯანურჰესი. აი, ჟინვალჰესზე რომ ვსაუბრობთ - იქ კონკრეტულ სოფლებს გადასახლება მოუწია და ეკლესიაც კი დაიტბორა, მაგრამ აბა წარმოიდგინეთ, მაშინ ჟინვალჰესი რომ არ აშენებულიყო, დღეს ნახევარ თბილისს წყალი საერთოდ არ ექნებოდა, ელექტროენერგიაზე საუბარიც კი ზედმეტია. ელემენტარულად, წყალი არ გვექნებოდა.

შესაბამისად, ასეთი საკითხები კარგად უნდა აიწონ-დაიწონოს. მოსახლეობამ მეტი ინფორმაცია უნდა მიიღოს, თავად მოიძიოს და გადაამოწმოს ინტერნეტში. ცუდია, როდესაც ბრმად ენდობი ადამიანს, რომელიც ჩამოდის და გეუბნება, რომ აქ ტალღა გადაგივლის, ან სხვა უბედურებებს გიხატავს“, - განაცხადა გიორგი მარგებაძემ.