მთავრობა რუსთავსა და ქუთაისში თანამედროვე სტანდარტების საუნივერსიტეტო ქალაქების აშენების მიმართულებით აქტიურად მუშაობს და აღნიშნული პროექტების განხორციელებისთვის მიმდინარე წელს მოხდება მიწების გამოსყიდვა. მიმდინარე წელსვე განხორციელდება ამ ქალაქების პროექტირება. აღნიშნულის შესახებ რადიო „სივრცის“ ეთერში გადაცემა Business Insider Georgia-ში სტუმრობისას საქართველოს განათლების, მეცნიერებისა და ახალგაზრდობის მინისტრის მოადგილემ ზვიად გაბისონიამ განაცხადა. 

„რეფორმა და კონცეფცია გულისხმობს 7 გამოწვევას და შესაბამისად 7 პასუხს. ჩვენ ვფიქრობთ, რომ პირველი პასუხები უკვე წელს უნდა დაიწყოს. საქმე ის გახლავთ, რომ რეფორმის პირველი მარეგულირებელი კანონთა პაკეტი ჩვენს მიერ დაჩქარებული წესით უკვე იქნა საშემოდგომო სესიაზე წარდგენილი. ახლა მომზადებული გვაქვს მეორე პაკეტი, რომელიც უმაღლეს განათლებასთან ერთად ზოგადი განათლების რეფორმირების ნაწილსაც გულისხმობს. ასევე არის რამდენიმე თანამდევი კანონი, რომელიც შეავსებს უმაღლესი განათლების რეფორმის მიმართულებას. წელს ძალიან მნიშვნელოვანი მიმართულებები გვაქვს დაგეგმილი. მოგეხსენებათ, რომ არსებობს მოკლევადიანი მიმართულებები, არსებობს საშუალო ვადიანი და გრძელვადიანი. გრძელვადიანი გახლავთ ინფრასტრუქტურული ნაწილი. ჩვენს მიერ დაანონსებული ორი მიმართულებით - ჩვენს მიერ დაანონსებული „განათლების ქალაქებით“ სიმბოლურად რომ ვთქვათ: რუსთავის და ქუთაისის მიმართულებით. მოგეხსენებათ ამას რამდენიმე წელი სჭირდება, რაც პრემიერმა პირდაპირ ვადებში განსაზღვრა. წელს ვაპირებთ, რომ ორივე მიმართულებით მოხდეს შესაბამისი ტერიტორიების ბოლომდე გამოსყიდვა, იმისთვის, რომ დავიწყოთ სამშენებლო სამუშაოები. ინფრასტრუქტურის სამინისტროს დავალებული აქვს, რომ წელსვე მოამზადოს პროექტირება ორივე მიმართულებით. ვფიქრობთ, რომ სწრაფი ტემპით წავალთ. საუბარია 5 მლნ კვ/მ-ს ინფრასტრუქტურულ პროექტებზე .

რაც შეეხება მეორე, ყველაზე მნიშვნელოვან კომპონენტს თვითონ სწავლების საკითხთან დაკავშირებით, აქ ჩვენთვის ყველაზე მთავარი გამოწვევა არის მაინც ხარისხი. შესაბამისად თქვენ იცით, რომ პრემიერმა პირდაპირ ხაზგასმით თქვა, რომ მთავარი, რეფორმის ფუნდამენტური ნაწილი არის ხარისხობრივი პარამეტრების აწევა ევროკავშირის სტანდარტების დონეზე. შესაბამისად, ბევრს მანიკულირებენ, რომ თითქოს ბოლონიის პროცესს ვცილდებით და ასე შემდეგ. ამ დროს სრული პასუხისმგებლობით შეგვიძლია გითხრათ, რომ ჩვენ სწორედ ვმუშაობთ იმაზე, რომ იყოს ევროპული დონის განათლება. ამას ძალიან ბევრი მოწინააღმდეგე ჰყავდა წლების განმავლობაში. ჩვენი მთავარი პრობლემა მიგვაჩნია, რომ არის ის რომ უნივერსიტეტები დღეს ფორმირებულია პროფესურის სასარგებლოდ და პროფესურის ინტერესების დაცვით და არა სტუდენტების. რადგან იგივე ფუნდამენტური იდეა, რასაც ჩვენ კონცეფცია გულისხმობს - „ერთი ქალაქი ერთი ფაკულტეტი“ გულისხმობს სწორედ იმას, რომ თავიდან იყოს აცილებული გადუალება ერთი და იგივე სპეციალობების, რომელზეც შრომით ბაზარზე მოთხოვნა არ არის“, - განაცხადა ზვიად გაბისონიამ .