S&P-ის პოზიტიური შეფასება ზრდის ნდობას საქართველოს საბანკო სექტორის მიმართ, რაც ხელს უწყობს კაპიტალის შემოდინებას და რესურსის ფასის შემცირებას - დავით უტიაშვილი
საერთაშორისო სარეიტინგო სააგენტო S&P Global Ratings-მა (S&P) კავკასიისა და ცენტრალური აზიის ქვეყნების საბანკო სექტორების მორიგი მიმოხილვა გამოაქვეყნა, რომელშიც საქართველო, ყაზახეთთან ერთად, რეგიონში ყველაზე მაღალი შეფასების მქონე ქვეყნებს შორის დასახელდა.
ანგარიშში განსაკუთრებული ყურადღება ეთმობა საქართველოს ინსტიტუციურ ჩარჩოს. სარეიტინგო სააგენტო ხაზგასმით აღნიშნავს, რომ ქვეყანაში საბანკო სექტორის რეგულირება და ზედამხედველობა მოწინავეა რეგიონში. ასევე დადებითად შეფასდა აქტივების ხარისხი და საკრედიტო დანაკარგების დაბალი დონე.
ეროვნული ბანკის ფინანსური სტაბილურობის დეპარტამენტის ხელმძღვანელის, დავით უტიაშვილის განცხადებით, აღნიშნული შეფასება ასახავს როგორც პოზიტიურ მაკროეკონომიკურ გარემოს, ისე ეროვნული ბანკის თანმიმდევრულ პოლიტიკას ფინანსური სტაბილურობის განმტკიცების მიმართულებით.
მისი თქმით, სარეიტინგო სააგენტოების პოზიტიური შეფასებები მნიშვნელოვან გავლენას ახდენს სექტორზე, ვინაიდან საერთაშორისო ინვესტორები გადაწყვეტილებების მიღების პროცესში სწორედ ასეთ ანგარიშებს ეყრდნობიან.
„პოზიტიური შეფასება ზრდის ნდობას საქართველოს საბანკო სექტორის მიმართ, რაც ხელს უწყობს კაპიტალის შემოდინებას და რესურსის ფასის შემცირებას. საბოლოო ჯამში, ეს დადებითად აისახება როგორც სექტორის საქმიანობაზე, ისე საპროცენტო განაკვეთებზე", - აღნიშნა დავით უტიაშვილმა.
მისივე შეფასებით, აღნიშნული შედეგები კიდევ ერთხელ ადასტურებს, რომ საბანკო სექტორის მდგრადი განვითარება და რისკების ფრთხილი მართვა ქვეყნის ფინანსური სტაბილურობის მნიშვნელოვანი საფუძველია.
სხვა სიახლეები
ინფლაციის ზრდის მთავარი მიზეზი ნავთობპროდუქტების გაძვირებაა და არა ფულის მასის ზრდა - დავით უტიაშვილი
16.11.2026.14:27
"ფულის მასის ზრდა ეკონომიკური აქტივობის გაფართოების ბუნებრივი პროცესია და არა ეროვნული ბანკის მხრიდან ფულის ხელოვნური ემისიის შედეგი" - ამის შესახებ ეროვნული ბანკის ფინანსური სტაბილურობის დეპარტამენტის უფროსმა დავით უტიაშვილმა "ბიზნესპარტნიორის" ეთერში განაცხადა.
მისი განმარტებით, ეკონომიკის ზრდასთან ერთად იზრდება ფულზე მოთხოვნაც. ამასთან, ფულის მასის სტატისტიკური მაჩვენებლის ზრდის ერთ-ერთი მნიშვნელოვანი ფაქტორი ლარის მიმართ მოსახლეობის ნდობის გაძლიერება და დანაზოგების ეროვნულ ვალუტაში გადატანაა.
„ბოლო წლებში ლარში განთავსებული დეპოზიტების წილი დაახლოებით 8 პროცენტული პუნქტით გაუმჯობესდა. ეს მილიარდობით ლარს ნიშნავს და მიუთითებს, რომ სულ უფრო მეტი მომხმარებელი ენდობა ლარს და დანაზოგების შესანახად ეროვნულ ვალუტას ირჩევს", - განაცხადა დავით უტიაშვილმა.
მისივე განმარტებით, საქართველოში უცხოურ ვალუტაში განთავსებული დეპოზიტების მოცულობა დაახლოებით 12 მილიარდ დოლარს შეადგენს. მათი ლარში კონვერტაცია ლარის ფულის მასას მნიშვნელოვნად გაზრდიდა, თუმცა ეს არა ფულის ხელოვნური ემისიის, არამედ დოლარიზაციის შემცირებისა და ეროვნული ვალუტისადმი ნდობის ზრდის შედეგი იქნებოდა.
რაც შეეხება ინფლაციას, დავით უტიაშვილის განცხადებით, საქართველოში მიმდინარე ინფლაციური პროცესების მნიშვნელოვანი ნაწილი ნავთობპროდუქტების გაძვირებას უკავშირდება. მან ხაზი გაუსვა, რომ ახლო წარსულში განვითარებულმა სამხედრო კონფლიქტმა ნავთობის ფასების ზრდა გამოიწვია, რასაც მოჰყვა სატრანსპორტო, მიწოდებისა და სხვადასხვა მომსახურების გაძვირებაც. სწორედ აღნიშნული ფაქტორები აისახა ინფლაციის მაჩვენებელზე და განაპირობა მისი გადახრა მიზნობრივი დონიდან.
„საქართველოს ბაზარზე მიმდინარე ინფლაციის მაჩვენებლის დაახლოებით 2 პროცენტული პუნქტი ნავთობპროდუქტების გაძვირებით არის განპირობებული", - აღნიშნა მან.
უტიაშვილმა ყურადღება გაამახვილა, რომ ფულის ემისია, როგორც წესი, ეროვნული ვალუტის გაცვლით კურსზეც აისახება, თუმცა ამჟამინდელი დინამიკა საპირისპიროს აჩვენებს, ლარის კურსი მყარდება.
სებ-ის ფინანსური სტაბილურობის დეპარტამენტის უფროსის შეფასებით, ფულის მასის მაჩვენებლის ცალკე განხილვის ნაცვლად, მნიშვნელოვანია იმ ფუნდამენტური ეკონომიკური პროცესების შეფასება, რომლებიც ამ ზრდის უკან დგას.