შავი ზღვის წყალქვეშა კაბელი და მწვანე ენერგიის დერეფანი ცალსახად უზრუნველყოფს იმას, რომ საქართველოს ეძლევა შესაძლებლობა, მოახდინოს საექსპორტო ბაზრების დივერსიფიკაცია, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას GREDA-ს აღმასრულებელმა დირექტორმა, მაია მელიქიძემ განაცხადა.

„შავი ზღვის წყალქვეშა კაბელი და კიდევ ერთ პროექტსაც დავამატებდი - ეს არის მწვანე ენერგიის დერეფანი, რომელიც კიდევ უფრო მასშტაბურია, ვიდრე შავი ზღვის წყალქვეშა კაბელი. ცალსახად უზრუნველყოფს იმას, რომ საქართველოს ეძლევა შესაძლებლობა, მოახდინოს საექსპორტო ბაზრების დივერსიფიკაცია და ფასი, რომელიც შესაძლოა ჩვენი მეზობლებიდან გამომდინარე არ იყოს სახარბიელო ჩვენი ინვესტორებისთვის, ნამდვილად იქნება მისაღები ევროპული ფასი. ვგულისხმობ იმ უბრალო მიზეზის გამო, ევროპა სერიოზულად განიცდის ენერგეტიკული თვალსაზრისით დეფიციტს და ჩვენ ყველას, ეკონომიკური განათლების მქონე ხალხს, მოგვეხსენება ის, რომ ის პროდუქტი, რომელიც დეფიციტურია, მასზე ფასი საკმაოდ მაღალია. დღესაც კი სადღაც 4-ჯერ-5-ჯერ და შეიძლება უფრო მეტჯერაც საკმაოდ მაღალია ელექტროენერგიაზე ფასი ევროპულ ქვეყნებში.

ევროპა ამას უყურებს, ჩვენ ამ ეტაპზე ვჭირდებით ევროპას, იმიტომ რომ მასაც სჭირდება ელექტროენერგიის იმპორტიორთა დივერსიფიკაცია იმისათვის, რომ, ეგრეთ წოდებულად, გარანტიები ჰქონდეს და დააჰეჯიროს თავისი პოზიციონირება და არ დადგეს იმ სირთულეების წინაშე, რომლის წინაშეც დადგა, ვთქვათ, რამდენიმე წლის წინ.

ამას ისიც ემატება, რომ აქამდე რეალურად საექსპორტო ბაზარი იყო მხოლოდ და მხოლოდ თურქეთი და ისიც უნდა აღვნიშნო, რომ ნახეთ, თურქები ვერ აძლევენ საშუალებას ჩვენს ელექტროენერგიის გენერაციის მეპატრონებს, პარტნიორებს, ინვესტორებს და დამფუძნებლებს, რომ ელექტროენერგიის ექსპორტი განახორციელონ თურქეთის ტერიტორიის გამოყენებით და გაიტანონ სხვა ქვეყნებში.

თურქეთს აქვს თავისებური დათქმა, რომ მე ვიყიდი ელექტროენერგიას, სიმბოლურად რომ ვთქვათ, 0.8 დოლარ ცენტად, რაც იყო ფასი საზღვარზე, და შემდეგ ამ ელექტროენერგიას რა ფასად გავყიდი, იქეთ გაყიდი თუ არ გავყიდი, თუ საერთოდ დავტოვებ ჩემს ქვეყანაში, ეს უკვე ჩემი პრეროგატივაა.

საქართველო ასეთი პრინციპებით არ მოქმედებს, იმიტომ რომ ის მეზობლებს აძლევს შესაძლებლობას და შანსს, რომ საქართველოს ტერიტორია გამოყენებული იყოს როგორც სატრანზიტო ტერიტორია, დერეფნის როლს იღებს თავის თავზე და აძლევს მეზობლებს საშუალებას იმისას, რომ, ამ შემთხვევაში, რადგან ჩვენ ელექტროენერგიაზე ვსაუბრობთ, უზრუნველყოს ელექტროენერგიის ტრანზიტი, მეზობელ ქვეყნებს აძლევს ამის საშუალებას და მოხდეს მისი გაყიდვა თუნდაც ევროპულ ბაზარზე და ასე შემდეგ“, - აცხადებს მაია მელიქიძე.