საგარეო ვაჭრობის მიმართულებით ბოლო პერიოდში ძალიან პოზიტიური მაჩვენებლები იკვეთება, რაც ეკონომიკური ზრდის ერთ-ერთი მნიშვნელოვანი კონტრიბუტორია, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას საქსტატის აღმასრულებელმა დირექტორმა გოგიტა თოდრაძემ განაცხადა.

„საგარეო ვაჭრობის მიმართულებით ბოლო პერიოდში ძალიან პოზიტიური მაჩვენებლები იკვეთება, რაც ეკონომიკური ზრდის ერთ-ერთი მნიშვნელოვანი კონტრიბუტორია. ბოლო ცხრა თვის მონაცემებით, ექსპორტის მაჩვენებელი დაახლოებით 19.6%-ით არის გაზრდილი, იმპორტი კი დაახლოებით 5.3%-ით.
თუ ქვეყნების ჭრილში განვიხილავთ, ბოლო ცხრა თვის განმავლობაში ყველაზე მნიშვნელოვანი ზრდა ჩინეთის, თურქეთისა და სომხეთის მიმართულებით შეინიშნებოდა.

რაც შეეხება სასაქონლო ჯგუფებს, ბოლო პერიოდში განსაკუთრებით აღსანიშნავია ნავთობპროდუქტების წარმოების მოცულობის გაფართოება და შესაბამისი ექსპორტი. აქ საუბარია ნავთისა და გაზოილის, ასევე მაზუთის წარმოებაზე, რომელთა ექსპორტი გასული წლის ცხრა თვესთან შედარებით დაახლოებით 13-ჯერ არის გაზრდილი სხვადასხვა მიმართულებით.

ასევე აღსანიშნავია სპილენძის მადნებისა და კონცენტრატების, ფერადი ლითონების მადნების, აზოტოვანი სასუქებისა და მინერალური და მტკნარი წყლების ექსპორტი.
ასევე, მოგეხსენებათ, ვაქვეყნებთ ადგილობრივი ექსპორტის მონაცემებს, რომლის წილი დაახლოებით 60-61%-ს აღემატება. აღნიშნული მაჩვენებელი, ზოგადად, წინა წლის ცხრა თვის მონაცემებთან შედარებით დაახლოებით 60%-ით არის გაზრდილი, რაც ეკონომიკური ზრდის ერთ-ერთი მთავარი კონტრიბუტორია.