მცირე ეკონომიკის პირობებში, ერთის მხრივ, გვაქვს მოლოდინი, რომ ფისკალურ ეფექტს ვიღებთ, როდესაც დემპინგური ფასით ჩინური კომპანია გვიშენებს ინფრასტრუქტურას, მაგრამ, მეორეს მხრივ, არ ვადარებთ იმ პოტენციურ ეკონომიკურ ღირებულებას, რაც ქართული კომპანიების მიერ პროექტის განხორციელებით შეიქმნებოდა, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას ინფრასტრუქტურის მშენებელთა ასოციაციის აღმასრულებელმა დირექტორმა ირაკლი გიორგობიანმა განაცხადა. მისი თქმით, სახელმწიფო ადგილობრივი სამშენებლო კომპანიების მხარდაჭერის მექანიზმებზე მუშაობს, რაც მათ კონკურენტუნარიანობის გაზრდაში დაეხმარება.

„ეს მნიშვნელოვანი გამოწვევა რჩება და დიალოგი ყველაზე მნიშვნელოვანია, რადგან სწორედ ამ დროს ხდება პრობლემის იდენტიფიცირება და მერე მის გადაჭრაზე დისკუსია. ჩვენ არ გვაქვს აზრთა სხვადასხვაობა თავად პრობლემის მიმართ, არამედ ეფექტურობა სწორედ იმაში იქმნება, თუ როგორ მოვაგვარებთ მას.

რაც შეეხება ინფრასტრუქტურულ პროექტებს, განსაკუთრებით მასშტაბური გეგმები გვაქვს საგზაო მიმართულებით, სადაც ჩინური სახელმწიფო კომპანიები დომინირებენ. მათთან კონკურენცია არა თუ ქართულ კომპანიებს, არამედ მსხვილ ევროპულ საერთაშორისო მოთამაშეებსაც უჭირთ, რადგან ჩინური კომპანიები საკუთარ კაპიტალს ორჯერ თუ სამჯერ ნაკლებად აფასებენ, ვიდრე დასავლური კომპანიები. მოგეხსენებათ, ბევრი მსხვილი სამშენებლო კომპანია საჯაროდ ივაჭრება, სადაც ყველა ინვესტორი უყურებს კაპიტალზე უკუგებას. 5-6-პროცენტიანი უკუგების პირობებში მათი ღირებულება ალბათ ნულთან ახლოს იქნება, როდესაც ჩინური კომპანიები სულ სხვა კაპიტალის უკუგებაზე მუშაობენ. ეს არის ჩინეთის სახელმწიფო ექსპანსია, თუმცა ჩვენი მცირე ეკონომიკის პირობებში, ერთის მხრივ, გვაქვს მოლოდინი, რომ ფისკალურ ეფექტს ვიღებთ, როდესაც დემპინგური ფასით ჩინური კომპანია გვიშენებს ინფრასტრუქტურას, მაგრამ, მეორეს მხრივ, არ ვადარებთ იმ პოტენციურ ეკონომიკურ ღირებულებას, რაც ქართული კომპანიების მიერ პროექტის განხორციელებით შეიქმნებოდა.

მინისტრმა (რევაზ სოხაძე) აღნიშნა, რომ სახელმწიფო ამუშავებს გარკვეულ ინიციატივას და ჩვენც აქტიურად ვთანამშრომლობთ ამაზე. საერთაშორისო პრაქტიკასა და ჩვენს სამეზობლოში არსებობს ლოკალური კომპანიების ხელშეწყობის მექანიზმები, რომლებიც ფასის უპირატესობას აძლევს ადგილობრივ კომპანიას. როდესაც პროექტს ლოკალური კომპანია ახორციელებს, მისი ეკონომიკური ღირებულება ქვეყნისთვის გაცილებით მაღალია, ვიდრე საერთაშორისო ან, ამ შემთხვევაში, ჩინური სახელმწიფო კომპანიის მიერ შესრულებული სამუშაოსი. ეს ცალსახად პოზიტიური სიგნალია სექტორისთვის. გარკვეული უკმაყოფილება შეიძლება სწორედ იქიდან გამომდინარეობდეს, რომ სექტორში დიდი მოლოდინები შეიქმნა და მას მეტი და მეტი უნდა. მე ვფიქრობ, რომ ამ პოზიტიურ ინიციატივებს სახელმწიფო უზრუნველყოფს, რაც ხელს შეუწყობს ადგილობრივ კომპანიებს, გახდნენ უფრო კონკურენტუნარიანები“, - განმარტა ირაკლი გიორგობიანმა.