“საოჯახო კალათის” ცენტრალიზებული პლათფორმის შექმნით, სექტორში პროცესები სისტემურ და გამჭირვალე ხასიათს მიიღებს, რაც გააძლიერებს კონკურენციას და ხელს შეუწყობს მომხმარებლისთვის საუკეთესო შეთავაზებებს - აღნიშნულის შესახებ პარლამენტის ეკონომიკური პოლიტიკის კომიტეტის თავმჯდომარე შოთა ბერეკაშვილმა Business Insider Georgia-ს განუცხადა.

მისი შეფასებით, პლათფორმის შექმნის ფუნდამენტური მიზანი მომხმარებლების ინტერესების დაცვა და მათთვის საუკეთესო ფასების შეთავაზებაა.

„ფასების შემსწავლელი კომისიის ერთ-ერთი რეკომენდაცია იყო, რომ მოკლევადიან პერიოდში ბაზარზე ბერძნული ან ფრანგული მოდელის მსუბუქი ინტერვენცია განხორციელებულიყო. ამის ფარგლებში, ქსელებმა გამოთქვეს სურვილი, შეექმნათ საოჯახო კალათა, რომელშიც 15 საბაზისო პროდუქტი შევიდა, და საკუთარ ქსელებში საუკეთესო შეთავაზებების წარმოდგენა დაიწყეს.

აღნიშნული პროცესის პარალელურად, ჩვენ ძალიან მივესალმებით, თუ კონკურენციის სააგენტოს ფარგლებში შეიქმნება სპეციალური ციფრული პლატფორმა, სადაც ქსელები თავიანთ შეთავაზებებს ყოველკვირეულად განაახლებენ, ხოლო მომხმარებლებისთვის აღნიშნულ ინფორმაციაზე ხელმისაწვდომობა და ინფორმირებულობა კიდევ უფრო გამარტივდება. ამასთან, სექტორში უზრუნველყოფილი იქნება მეტი გამჭვირვალობა, ხოლო კონკურენცია საუკეთესო მექანიზმია იმისთვის, რომ მომხმარებელმა საუკეთესო ფასი მიიღოს.

აღნიშნული მოდელი ეფუძნება ბაზრის თავისუფლებას, კონკურენციასა და გამჭვირვალობას, რაც იყო და რჩება ჩვენი მთავარი მიზანი. საბოლოო ჯამში, მომხმარებელი იღებს საუკეთესო ფასს“, - განმარტა შოთა ბერეკაშვილმა.

მისი თქმით, აღნიშნული პლატფორმის შექმნით, ურთიერთობები სისტემურ ხასიათს მიიღებს და ეს იქნება არა ერთჯერადი, არამედ მუდმივი პროცესი. ეს ჩვენი სტრატეგიის მოკლევადიანი შედეგის მიმართულებაა.

„კომისიის ფარგლებში, ჩვენ გავეცით საშუალოვადიანი რეკომენდაციები, რომლებიც სექტორში მიწოდების ჯაჭვის ოპტიმიზაციას ეხება. ამასთან, განსაკუთრებული აქცენტი გაკეთდა ადგილობრივი წარმოების მხარდაჭერაზე.

დარწმუნებული ვარ, აღნიშნული რეკომენდაციები ეტაპობრივად შესრულდება. ჩვენ პროცესს აქტიურად მივყვებით და მიზანია, სექტორი გახდეს უფრო კონკურენტუნარიანი და ეფექტური, შემცირდეს დამატებითი ხარჯები და საბოლოოდ მომხმარებელმა საუკეთესო შედეგი მიიღოს”, - განაცხადა შოთა ბერეკაშვილმა.