საქართველო ICAO-ს გლობალური ელჩების პროგრამის ნაწილი გახდა - საქაერონავიგაციის სამეთვალყურეო საბჭოს თავმჯდომარე ლევან კარანაძე იმ 24 რჩეულ პროფესიონალს შორისაა, რომლებიც მსოფლიო მასშტაბით ავიაციის სექტორის განვითარებაზე იზრუნებენ.

როგორც გადაცემა „იმედის დილაში“ რუბრიკა Business Insider Georgia-ში სტუმრობისას ლევან კარანაძემ აღნიშნა, გლობალური ავიაციისთვის ახალი სტრატეგია შემუშავდა, რომელიც 2050 წლისთვის საჰაერო ტრანსპორტის სრულ ხელმისაწვდომობას, ნულოვან ფატალურ შემთხვევებსა და გარემოზე ნეგატიური ზეგავლენის განულებას ისახავს მიზნად. მისივე თქმით, სტრატეგიის ფარგლებში დაიწყო ICAO-ს გლობალური პროგრამა, რომლის პირველი საინაუგურაციო სესია უკვე გაიმართა.

„დიდი პატივია ჩვენთვის, პირადად ჩემთვის და ჩვენი ქვეყნისთვის. ICAO-მ ეს არის სამოქალაქო ავიაციის საერთაშორისო ორგანიზაცია, ეს არის გაეროს სპეციალიზებული სააგენტო, რომელიც არეგულირებს ავიაციას უკვე 1944 წლიდან, 80 წელზე მეტია. ძალიან გავლენიანი ორგანიზაცია არის ამ სფეროში, ავიაციაში.

გასულ წელს ICAO-ს გენმდივანს ინიციატივა ჰქონდა, რომ ახალი სტრატეგია შეემუშავებინა. სტრატეგიის ფარგლებში არის გლობალური სწრაფვა, რომ 2050 წლისთვის ავიაცია, საჰაერო ტრანსპორტი ხელმისაწვდომი იყოს ყველა ქვეყნისთვის, ყველა მოქალაქისთვის, ნულოვანი ფატალობით, ანუ საავიაციო შემთხვევით გამოწვეული რისკი უნდა იყოს ნული, უსაფრთხო ავიაცია და ასევე გარემოსდაცვითი თვალსაზრისით ნულოვანი ზეგავლენა და ნეგატიური ზეგავლენა გარემოზე.  ამ მიზნის მისაღწევად სტრატეგიული გეგმა შემუშავებულია. წლევანდელი წლიდან დაიწყო ელჩების გლობალური პროგრამა, ეს არის პირველი საინაუგურაციო სესია.

ICAO-ს წევრი 193 ქვეყანაა, რომელთაგან, სხვადასხვა კრიტერიუმის საფუძველზე, 17 ქვეყნის 24 ელჩი შეირჩა. პროგრამის მიზანია, რომ მოვახდინოთ ავიაციის პოპულარიზაცია ფართო მასებში და გარდა ამისა, რაც მთავარია, მოვიზიდოთ ახალი თაობა, ახალი ნაკადები, ახალგაზრდები დავაინტერესოთ ავიაციით.

ICAO-მ ჩაატარა კვლევა და 2050 წლისთვის თუ დღევანდელი მდგომარეობით 4,5 მლრდ მგზავრი არის წლიურ ჭრილში, 2050 წლისთვის მოსალოდნელია დაახლოებით 300%-იანი ზრდა და იქნება 12 მილიარდზე მეტი მგზავრი. შესაბამისად, ამას სჭირდება შესაბამისი ინფრასტრუქტურა, ტექნოლოგიები, მაგრამ რაც მთავარია, ადამიანური რესურსი. მიუხედავად ტექნოლოგიის განვითარებისა, AI-ს და ასე შემდეგ სხვადასხვა კომპონენტის შემოსვლისა, ადამიანი დარჩება სისტემის მთავარი კომპონენტი“, - აღნიშნა ლევან კარანაძემ.

ლევან კარანაძის განცხადებით, 2037 წლისთვის ავიაციის სექტორს მნიშვნელოვნად გაზრდილი ადამიანური რესურსი დასჭირდება.

„კვლევის თანახმად, 2037 წლისთვის ახალი დამატებითი მფრინავების და ინჟინრების და მეთვალყურეების საჭიროებაა -  2037 წლისთვის დარგს დასჭირდება 660 000-ზე მეტი ინჟინერი და ტექნიკური პერსონალი დასჭირდება 550 000 მფრინავი, 110 000 საჰაერო მოძრაობის მეთვალყურე. ანუ ძალიან მოთხოვნადი პროფესიაა“, - აღნიშნა ლევან კარანაძემ.

ლევან კარანაძის განცხადებით, რობოტი პილოტის პროგრამების დანერგვა ახლო მომავალში არ განიხილება. მისი თქმით, მიუხედავად იმისა, რომ სხვადასხვა დემო ვერსიები და ტექნოლოგიური გადაწყვეტები არსებობს, პერსპექტივაში ადამიანი კვლავ დარჩება სისტემის მთავარ კომპონენტად და საყრდენ ძალად.

მისივე განცხადებით, გლობალური ტენდენციები პირდაპირ აისახება საქართველოზეც, სადაც ბოლო წლებში ავიაციის სექტორი დინამიურად ვითარდება.

„ბოლო წლების განმავლობაში ქვეყანაში ავიაცია ვითარდება, ციფრები არის ძალიან შთამბეჭდავი, ზრდა გვაქვს სერიოზული, დიდი მგზავრთნაკადი არის, ინფრასტრუქტურული პროექტები მაღალია და თავისთავად საქართველოზეც გადმოითარგმნება. ზრდისთვის, რა თქმა უნდა, მიწოდებაც აუცილებელია, ხოლო ამ მოთხოვნის დასაკმაყოფილებლად საჭიროა ახალგაზრდა კადრების მომზადება“, - აღნიშნა კარანაძემ.