საქართველოს ეკონომიკა ინარჩუნებს მაღალი ზრდის ტემპს, - ამის შესახებ გადაცემა „იმედის დილაში“ რუბრიკა Business Insider Georgia-ში სტუმრობისას ეკონომიკისა და მდგრადი განვითარების მინისტრის მოადგილემ, თამარ იოსელიანმა განაცხადა.

„ნამდვილად, საქართველოს ეკონომიკა აჩვენებს მაღალი ზრდის ტემპს და იანვარ-აგვისტოს მონაცემებს თუ მოვიყვანთ, 7.6% შეადგინა აღნიშნულმა ზრდამ. ამას ასევე ამყარებს, როგორც თქვენ აღნიშნეთ, საერთაშორისო საფინანსო ინსტიტუტების ანგარიშებიც და, შესაბამისად, მსოფლიო ბანკის ბოლო კვლევის მიხედვით, პროგნოზი 2 პროცენტული პუნქტით გაიზარდა 5%-დან 7%-მდე.

აქედან გამომდინარე, ამ მიმართულებით ტრანსპორტისა და ლოგისტიკის სექტორს მნიშვნელოვანი ადგილი უკავია. უნდა ითქვას, რომ 2026 წლის პირველი ნახევრის განმავლობაში სექტორი დაახლოებით 19%-ით გაიზარდა და, ზოგადად, მთლიან შიდა პროდუქტში ტრანსპორტისა და ლოგისტიკის სექტორს 6%-იანი წილი უკავია.

აქედან გამომდინარე, ჩვენთვის ძალიან მნიშვნელოვანია ამ დარგის განვითარება და, ზოგადად, მსგავსი ტიპის ტენდენციის შენარჩუნება, რაც, რა თქმა უნდა, სწორი ეკონომიკური პოლიტიკის, მაკროეკონომიკური სტაბილურობის, ინვესტიციების მოზიდვისა და ეკონომიკის დივერსიფიკაციის შედეგია.

ზოგადად, ჩვენი მიდგომა სატრანსპორტო სექტორის მიმართ არის ის, რომ ჩვენ ვავითარებთ როგორც ინფრასტრუქტურას, ასევე შესაბამის სერვისებს. გვაქვს 10-წლიანი სამოქმედო გეგმა, თუ როგორ უნდა განვითარდეს ტრანსპორტისა და ლოგისტიკის სექტორი. ეს მოიცავს ყველა ტიპის ტრანსპორტს, როგორც ავიაციას, ასევე საავტომობილო, სახმელეთო-სარკინიგზო და საზღვაო ტრანსპორტს.

ამ მიმართულებით მსოფლიო ბანკის ის ანგარიში, რომელიც თქვენ აღნიშნეთ შუა დერეფანთან დაკავშირებით, სწორედ ამ პროექტების ერთობლიობას გულისხმობს. მსოფლიო ბანკის ანგარიშშიც აღნიშნულია 16 უმნიშვნელოვანესი პროექტი, რომელთაგან 12 უკვე დაწყებულია.

მსოფლიო ბანკი იმასაც აღნიშნავს, რომ 2040 წლისთვის დერეფანში ტვირთბრუნვა დაახლოებით ოთხჯერ გაიზრდება. ქვეყნის ტვირთის გადაზიდვის დრო დაახლოებით ორი მესამედით შემცირდება, შეიქმნება ახალი სამუშაო ადგილები, რაც შუა დერეფნის მასპინძელი ქვეყნებისთვის დაახლოებით 2 მილიონი დამატებითი სამუშაო ადგილის შექმნის შესაძლებლობას იძლევა. ამ ანგარიშით ასევე დაანონსებულია დამატებითი ეკონომიკური ზრდა მასპინძელ ქვეყნებში დაახლოებით 3,3%, ხოლო საქართველოში 3,6%.

ჩვენი პოლიტიკაც სწორედ ამ მიმართულებითაა მიმართული. სტრატეგიულ პარტნიორებთან, მეზობელ ქვეყნებსა და შუა დერეფნის მასპინძელ ქვეყნებთან სრული კოორდინაციით ვმუშაობთ. საინვესტიციო პროგრამა, რომელსაც ყველა სატრანსპორტო სექტორის მიმართულებით ვახორციელებთ, თანხვედრაშია ამ მიზანთან, რათა ერთმანეთისთვის გამოწვევებად არ დავრჩეთ.

ამისთვის ვითარდება როგორც საქართველოს რკინიგზა იცით, რომ საქართველოს რკინიგზაში ისტორიული განახლება მიმდინარეობს, ასევე საქართველოს აეროპორტები, სადაც მსხვილი ინფრასტრუქტურული პროექტები გვაქვს.

თბილისის საერთაშორისო აეროპორტში ინფრასტრუქტურას ვაფართოებთ და მომდევნო ორი წლის განმავლობაში მგზავრთა გამტარუნარიანობას 5 მილიონიდან 10 მილიონ მგზავრამდე გავზრდით. ქუთაისის საერთაშორისო აეროპორტში ვასრულებთ ახალი ასაფრენ-დასაფრენი ზოლის მშენებლობას და ასევე ვავითარებთ ტერმინალის ინფრასტრუქტურას.

საზღვაო ნავსადგურებშიც, რა თქმა უნდა, კერძო სექტორთან ვთანამშრომლობთ, რათა გავზარდოთ გამტარუნარიანობა. ანაკლიის ღრმაწყლოვანი ნავსადგური კი არა მხოლოდ საქართველოსთვის, არამედ შავი ზღვის რეგიონისა და შუა დერეფნის ქვეყნებისთვისაც მნიშვნელოვანი პროექტია“, - აცხადებს თამარ იოსელიანი.