საქართველოს ეროვნული ბანკი სარეზოლუციო ფონდის ფინანსურ ანგარიშგებას აქვეყნებს
სებ-ი საბანკო სექტორის რეზოლუციის ჩარჩოს განვითარებას განაგრძობს და სარეზოლუციო ფონდის 2025 წლის ფინანსურ ანგარიშგებას აქვეყნებს. აღსანიშნავია, რომ ეროვნულმა ბანკმა სარეზოლუციო ფონდის შესახებ ფინანსური ინფორმაცია პირველად მოამზადა და ის სებ-ის ფინანსური ანგარიშგებისგან სრულად დამოუკიდებელი დოკუმენტია.
სარეზოლუციო ფონდი კომერციული ბანკების გაჯანსაღებისა და რეზოლუციის ჩარჩოს ერთ-ერთი მნიშვნელოვანი კომპონენტია, რომელიც 2020 წელს ბანკის რეზოლუციის პროცესის დაფინანსებისთვის შეიქმნა და მისი მიზანია კანონით განსაზღვრული შესაბამისი საფუძვლების არსებობისას აუცილებელი ფინანსური რესურსის მობილიზება ისე განახორციელოს, რომ შემცირდეს სისტემური რისკები და გადასახადის გადამხდელთა რესურსების გამოყენების საჭიროება.
2023 წლის დეკემბრამდე სარეზოლუციო ფონდი წარმოადგენდა მხოლოდ ე.წ. ex-post მექანიზმს, რაც გულისხმობდა რეზოლუციის საჭიროების შემთხვევაში დროებითი სახელმწიფო დაფინანსების ფარგლებში გამოყოფილი სახსრების ფონდში ჩარიცხვას. 2023 წლის დეკემბერში განხორციელებული საკანონმდებლო ცვლილებების შედეგად, 2025 წლიდან სარეზოლუციო ფონდში კომერციული ბანკების მიერ ე.წ. ex-ante, ანუ წინასწარი შენატანების განხორციელება დაიწყო.
სარეზოლუციო ფონდი წარმოადგენს საქართველოს ეროვნულ ბანკში გახსნილ მიმდინარე ანგარიშს და არ არის დამოუკიდებელი იურიდიული პირი. ფონდის სამიზნე ნიშნული დაზღვეული დეპოზიტების მთლიანი მოცულობის 3%-ს შეადგენს, რომლის მიღწევაც 8-წლიანი პერიოდის განმავლობაში, 2033 წლამდეა განსაზღვრული.
კომერციული ბანკებისთვის სარეზოლუციო ფონდში ყოველწლიური შენატანის ოდენობა განისაზღვრება წლის ბოლოს არსებულ მონაცემებზე დაყრდნობით, ბანკების აქტივების წილისა და ინდივიდუალური რისკის პროფილის გათვალისწინებით.
სარეზოლუციო ფონდს ადმინისტრირებას უწევს საქართველოს ეროვნული ბანკი, ხოლო ფონდის სახსრების ინვესტირების პროცესს, საქართველოს კანონმდებლობისა და ეროვნულ ბანკსა და დეპოზიტების დაზღვევის სააგენტოს შორის გაფორმებული შეთანხმების საფუძველზე, დაცულობისა და ლიკვიდურობის პრინციპების შესაბამისად, დეპოზიტების დაზღვევის სააგენტო ახორციელებს.
აღსანიშნავია, რომ საქართველოს საბანკო სექტორი სტაბილურია, კარგადაა კაპიტალიზირებული და ინარჩუნებს ლიკვიდურობის მყარ ბუფერებსა და მომგებიანობას.
სხვა სიახლეები
მაისის თვის, ასევე იანვარ-მაისის ეკონომიკური მაჩვენებლები კიდევ ერთხელ ადასტურებს, რომ საქართველო, გეოპოლიტიკური შოკების მიუხედავად, ინარჩუნებს მდგრადობას და სწრაფი ეკონომიკური ზრდის ტრაექტორიას l ვახტანგ ცინცაძე
30.06.2026.15:41
„მაისის თვეში რეალურმა ეკონომიკურმა ზრდამ 6.4% შეადგინა, ხოლო იანვარ-მაისის საშუალო ეკონომიკური ზრდა 7.8%-ით განისაზღვრა. აღნიშნული მაჩვენებლები კიდევ ერთხელ ადასტურებს, რომ საქართველო გეოპოლიტიკური შოკების მიუხედავად, ინარჩუნებს მდგრადობას და სწრაფი ეკონომიკური ზრდის ტრაექტორიას", - განაცხადა ეკონომიკისა და მდგრადი განვითარების მინისტრის მოადგილე ვახტანგ ცინცაძემ დღეს გამოქვეყნებული ეკონომიკური ზრდის მაჩვენებლებისა და ეკონომიკური ზრდის არსებული ტენდენციების შეფასებისას.
მაისის თვის ეკონომიკურ ზრდის მაჩვენებლებზე საუბრისას მინისტრის მოადგილე ხაზს უსვამს, რომ აღნიშნული ზრდა სექტორების მიხედვით საკმაოდ დივერსიფიცირებულია. აღსანიშნავია, რომ მაისის ეკონომიკურ ზრდაში მნიშვნელოვანი წვლილი შეიტანა ეკონომიკური აქტივობის ზრდამ შემდეგ სექტორებში: ინფორმაცია და კომუნიკაცია, საფინანსო და სადაზღვევო საქმიანობა, დამამუშავებელი მრეწველობა, ტრანსპორტი და დასაწყობება, ჯანდაცვა და უძრავ ქონებასთან დაკავშირებული საქმიანობები.
„ეკონომიკური ზრდის ხელშემწყობია ის ტენდენციები, რომლებიც ფიქსირდება, მათ შორის საგარეო ვაჭრობის კუთხით. აღსანიშნავია, რომ იანვარ-მაისის მონაცემებით, ექსპორტის დაახლოებით 20%-იანი ზრდა ფიქსირდება, ხოლო ადგილობრივი ექსპორტის ზრდის მაჩვენებელი 66%-ს აჭარბებს. ამასთან, სხვა სექტორული მიმართულებებითაც წინასწარი მაჩვენებლები საკმაოდ პოზიტიურია" - განაცხადა ვახტანგ ცინცაძემ.
ეკონომიკის მინისტრის მოადგილის შეფასებით, ყოველივე ზემოაღნიშნული იმის პროგნოზირების საშუალებას იძლევა, რომ საქართველოს ეკონომიკაში არსებული პოზიტიური ტენდენციები და, შესაბამისად, ქვეყნის ეკონომიკური მდგრადობა მომავალ თვეებშიც შენარჩუნდება.
„მოლოდინი გვაქვს, რომ ეკონომიკური ზრდა მომდევნო თვეებში იმაზე გაცილებით უფრო მაღალი იქნება, ვიდრე ამას სხვადასხვა საერთაშორისო თუ საფინანსო ინსტიტუტები პროგნოზირებენ"- აღნიშნა მინისტრის მოადგილემ.
ბოლო წლების მონაცემებით, მიმდინარე ანგარიშის დეფიციტი პირველ კვარტალში ისტორიულ მინიმუმს წარმოადგენს
30.06.2026.15:28
თამარ იოსელიანი უზბეკეთის რესპუბლიკის ტრანსპორტის მინისტრის პირველ მოადგილეს მამანბი ომაროვს შეხვდა
30.06.2026.09:53
ყაზახეთთან სტრატეგიული პარტნიორობის შესახებ შეთანხმება უპირობოდ გაზრდის ქვეყნებს შორის სავაჭრო-ეკონომიკურ ურთიერთობებსა და კავშირებს - მარიამ ქვრივიშვილი
29.06.2026.19:32
