საქართველოს მოდერნიზაციის დღის წესრიგი, მის სტრატეგიულ როლთან ერთად, როგორც რეგიონული სატრანზიტო ჰაბი, ქმნის ხელსაყრელ გარემოს იტალიური კომპანიებისთვის - მასიმილიანო დ'ანტუონო
საქართველოს მოდერნიზაციის დღის წესრიგი, მის სტრატეგიულ როლთან ერთად, ქმნის ხელსაყრელ გარემოს იტალიური კომპანიებისთვის, - ამბობს Business Insider Georgia-სთან ექსკლუზიურ ინტერვიუში საქართველოში იტალიის ელჩი მასიმილიანო დ'ანტუონო. მისი თქმით, საქართველოს ინფრასტრუქტურულ განვითარებაში იტალიური მონაწილეობის გაფართოების მნიშვნელოვანი შესაძლებლობები არსებობს, განსაკუთრებით სატრანსპორტო ინფრასტრუქტურაში, ენერგეტიკულ ქსელებში, ურბანულ განვითარებაში და საჯარო-კერძო პარტნიორობებში (PPP).
„საქართველოს მოდერნიზაციის დღის წესრიგი, მის სტრატეგიულ როლთან ერთად როგორც რეგიონული სატრანზიტო ჰაბის, ქმნის ხელსაყრელ გარემოს იტალიური კომპანიებისთვის, რომელთაც გააჩნიათ ძლიერი გამოცდილება ინჟინერიის, სამშენებლო პროექტების მართვისა და ინტეგრირებული ინფრასტრუქტურული გადაწყვეტილებების სფეროში.
ეს შესაძლებლობები მკაფიოდ გამოიკვეთა ახლანდელ ინფრასტრუქტურულ ღონისძიებაზე, რომელიც თბილისში გაიმართა იტალიის საელჩოსა და იტალიური სავაჭრო სააგენტოს ერთობლივი ორგანიზებით. აღნიშნულ ინიციატივას ესწრებოდა 16 იტალიური კომპანია, ძირითადად მცირე და საშუალო ფირმები, რომლებიც სპეციალიზებულნი არიან ინფრასტრუქტურაში, ინჟინერიაში და დაკავშირებულ ტექნოლოგიებში. ღონისძიების დროს დილის სესიაზე წარმოდგენილ იქნა საქართველოს ინფრასტრუქტურული პრიორიტეტები, რეგულატორული ჩარჩო და ინვესტიციური შესაძლებლობები, რის შემდეგაც მონაწილე კომპანიებმა პირდაპირი B2B შეხვედრები გამართეს პოტენციურ ქართულ პარტნიორებთან როგორც საჯარო, ისე კერძო სექტორიდან ასევე საერთაშორისო დაინტერესებულ მხარეებთან, მათ შორის მრავალმხრივი განვითარების ბანკებთან.
იტალიური კომპანიებისა და საქართველოს პარტნიორების გამოხატული ენთუზიაზმი ადასტურებს, რომ არსებობს კონკრეტული შესაძლებლობები თანამშრომლობის გაფართოებისათვის, არა მხოლოდ მასშტაბური პროექტების გზით, არამედ მოდულური, მოქნილი გადაწყვეტილებების მეშვეობით, სადაც იტალიური კომპანიები განსაკუთრებით ძლიერი არიან. ამ კონტექსტში, იტალიის ძალა დიზაინში, ინჟინერიის ხარისხში, პროექტის განხორციელებასა და ადაპტირებაში სრულად ემთხვევა საქართველოს მოთხოვნებს მდგრადი, რეზილენტური და ტექნიკურად დახვეწილი ინფრასტრუქტურის განვითარებისათვის.
ინსტიტუციური მხარდაჭერა იტალიური საელჩოსა და იტალიური სავაჭრო სააგენტოს (ICE) მხრიდან კიდევ უფრო ამაღლებს ამ პერსპექტივებს, ხელს უწყობს დიალოგს, ამცირებს ბაზარზე შესვლის ბარიერებს და ხელს უწყობს სტრუქტურირებული პარტნიორობების ჩამოყალიბებას, რაც ინტერესს გარდაქმნის რეალურ პროექტებად და გრძელვადიან თანამშრომლობად“, - აცხადებს ელჩი.
სხვა სიახლეები
ჩინეთს ცენტრალური ადგილი უკავია საქართველოსთვის, როგორც საექსპორტო ბაზარს - ის ძალიან მნიშვნელოვანი პარტნიორია, თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება | ირაკლი ნადარეიშვილი CGTN-თან ინტერვიუში
11.09.2026.18:29
„ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს - შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - ამის შესახებ ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა ჩინურ ტელეარხ CGTN-ისთვის (China Global Television Network) მიცემულ ინტერვიუში განაცხადა, სადაც საქართველოს ჩინეთის მომსახურებით ვაჭრობის საერთაშორისო გამოფენაში CIFTIS-ში მონაწილეობასა და ფორუმის მნიშვნელობაზე ისაუბრა.
ირაკლი ნადარეიშვილმა აღნიშნა, რომ CIFTIS-ში მონაწილეობა მნიშვნელოვანია არა მხოლოდ გამოცდილების გაზიარებისთვის, არამედ კონტაქტების დამყარებისა და ახალი პარტნიორობების ჩამოყალიბებისთვისაც.
„მოუთმენლად ველოდებით, რომ ქართული ბიზნესი და კერძო სექტორი ახალ პარტნიორებს შეხვდება. მაგალითად, IT და ტექნოლოგიების სექტორს თუ ავიღებთ, ბოლო ხუთი წლის განმავლობაში ეს საქართველოსთვის ძალიან საინტერესო წარმატების ისტორიად იქცა, ვინაიდან თითქმის ნულოვანი ნიშნულიდან განვითარდა და დღეს საქართველოს მშპ-ის (GDP) თითქმის 10%-ს შეადგენს. ტექნოლოგიური კომპანიებისთვის გვაქვს სპეციალური მარეგულირებელი და საგადასახადო რეჟიმი, რისგანაც მრავალი საერთაშორისო კომპანია უკვე იღებს სარგებელს. შესაბამისად, ველოდებით ქართული ტექნოლოგიური კომპანიების შეხვედრას ჩინელ კოლეგებთან", - აღნიშნა ირაკლი ნადარეიშვილმა.
მინისტრის მოადგილემ CGTN-თან ინტერვიუში განმარტა, რომ საქართველო CIFTIS-ში მონაწილეობას პირველად იღებს. მანვე იმ შესაძლებლობებზე გაამახვილა ყურადღება, რომელსაც ეს პლატფორმა მონაწილე კომპანიებსა და ქვეყნებს სთავაზობს.
ირაკლი ნადარეიშვილმა ყურადღება გაამახვილა საქართველო-ჩინეთის ურთიერთობებზე და აღნიშნა, რომ ჩინეთს, როგორც საექსპორტო ბაზარს, საქართველოსთვის ცენტრალური ადგილი უკავია.
„უპირველეს ყოვლისა, ეს ერთ-ერთი უდიდესი ბაზარია, საქართველოს კი ნამდვილად სჭირდება ბაზრების დივერსიფიკაცია ერთი კონკრეტული რეგიონიდან უფრო ფართო გეოგრაფიაზე. ჩინეთი ძალიან მნიშვნელოვანი პარტნიორია. თავისუფალი ვაჭრობის შეთანხმების ამოქმედების შემდეგ, სავაჭრო ბრუნვა გასულ წელს 2,3 მილიარდ აშშ დოლარამდე გაიზარდა და ახლაც სწრაფად იზრდება. როდესაც CIFTIS-სა და მომსახურების სექტორზე ვსაუბრობთ, ვფიქრობ, ეს ჩვენს ორმხრივ თანამშრომლობას კიდევ ერთ ახალ განზომილებას შემატებს, რათა ანალოგიურად ვიმუშაოთ მომსახურების სფეროს განვითარებაზე, ექსპორტსა და ინვესტიციებზე. სწორედ ამის მიღწევას ველით ამ ღონისძიებიდან და ზოგადად, ჩვენი ორმხრივი ურთიერთობების დღის წესრიგიდან", - განაცხადა ირაკლი ნადარეიშვილმა ჩინურ ტელეარხთან საუბრისას.
