საქართველოს რკინიგზამ, აზიის განვითარების ბანკის (ADB) მხარდაჭერით, 10 ახალი სამგზავრო ელექტრომატარებლის შეძენის მიზნით საერთაშორისო ბაზრის კვლევა გამოაცხადა

ეკონომიკა

საქართველოს რკინიგზამ, აზიის განვითარების ბანკის (ADB) მხარდაჭერით, 10 ახალი სამგზავრო ელექტრომატარებლის შეძენის მიზნით საერთაშორისო ბაზრის კვლევა გამოაცხადა

31.07.2026.22:32

საქართველოს რკინიგზამ, აზიის განვითარების ბანკის (ADB) მხარდაჭერით, 10 ახალი სამგზავრო ელექტრომატარებლის შეძენის მიზნით საერთაშორისო ბაზრის კვლევა გამოაცხადა.

პროექტის ფარგლებში დაგეგმილია 10 თანამედროვე ელექტრომატარებლის შეძენა და ექსპლუატაციაში გაშვება.

ბაზრის კვლევაში მონაწილეობის მისაღებად მოწვეული არიან აზიის განვითარების ბანკის წევრი ქვეყნებიდან მოძრავი შემადგენლობის მწარმოებელი დაინტერესებული ადგილობრივი და საერთაშორისო კომპანიები.

კვლევის მიზანია პოტენციური მიმწოდებლებისთვის პროექტის მასშტაბისა და შესყიდვის სავარაუდო სტრატეგიის გაცნობა, ასევე ბაზრის შესაძლებლობების, ტექნიკური და საკვალიფიკაციო მოთხოვნების, მიწოდების ვადებისა და შესყიდვის პირობების შესახებ დარგის წარმომადგენელთა მოსაზრებების მიღება. მიღებული ინფორმაცია გამოყენებული იქნება შესყიდვის სტრატეგიისა და სატენდერო პირობების საბოლოოდ ჩამოსაყალიბებლად.

ახალი ელექტრომატარებლების შეძენა ხელს შეუწყობს მგზავრთა მომსახურების ხარისხის, საიმედოობისა და ხელმისაწვდომობის გაუმჯობესებას, საქართველოს რკინიგზის საოპერაციო ეფექტიანობის გაზრდასა და ტექნიკური მომსახურებისა და ექსპლუატაციის ხარჯების შემცირებას.

ბაზრის კვლევის დასრულების შემდეგ საქართველოს რკინიგზა, აზიის განვითარების ბანკთან თანამშრომლობით, 10 ახალი სამგზავრო ელექტრომატარებლის შესყიდვის საერთაშორისო პროცედურას დაიწყებს. შესყიდვა აზიის განვითარების ბანკის შესყიდვების პოლიტიკისა და შესაბამისი პროცედურების დაცვით განხორციელდება.