Moody's-მა საქართველოს რეიტინგი Ba2 შეინარჩუნა და პერსპექტივა ნეგატიურიდან სტაბილურამდე გააუმჯობესა. ანგარიშის თანახმად, სააგენტომ საქართველოს 2026 წლის ეკონომიკური ზრდის პროგნოზი 6%-დან 6.4%-მდე გააუმჯობესა.

,,საქართველოს Ba2 საკრედიტო რეიტინგის დადასტურება ასახავს ქვეყნის ძლიერ ეკონომიკურ და ფისკალურ მდგომარეობას, რაც ინსტიტუციური გამოწვევებით არის დაბალანსებული. ჩვენ ველოდებით, რომ საქართველოს ეკონომიკური ზრდა კვლავ ძლიერი იქნება, რასაც ხელს შეუწყობს ეკონომიკური აქტივობის ფართო ბაზა, კერძო მოხმარება და ინვესტიციები. მაღალი ეკონომიკური ზრდა და სახელმწიფო ვალის გონივრული მართვა კვლავაც მნიშვნელოვან წვლილს შეიტანს ქვეყნის ფისკალური მდგომარეობის მდგრადობაში. საქართველოს სტრატეგიული მდებარეობა შუა დერეფანში ხელს შეუწყობს როგორც რეგიონული, ისე რეგიონის ფარგლებს გარეთ არსებული სავაჭრო და საინვესტიციო ნაკადების მოზიდვას. ამ ძლიერ მხარეებს დამატებით ამყარებს ეფექტიანი ფისკალური და მონეტარული პოლიტიკა”, - წერს Moody's-ი.

Moody's-ის პროგნოზით, ეკონომიკური ზრდა 2027 წელს 5.5%-ს მიაღწევს.

,,საქართველოს ფისკალური მდგომარეობა ბოლო წლებში მნიშვნელოვნად გამყარდა. მთავრობის ვალი 2020 წელს მთლიანი შიდა პროდუქტის (მშპ) თითქმის 60%-დან 2025 წელს დაახლოებით 34%-მდე შემცირდა, რასაც ხელი შეუწყო როგორც ძლიერი ნომინალური ეკონომიკური ზრდა, ისე ფისკალურმა დისციპლინამ. ჩვენი პროგნოზით, საშუალოვადიან პერიოდში სახელმწიფო ვალი განაგრძობს ეტაპობრივ კლებას და მშპ-ის დაბალი 30%-იანი მაჩვენებლის ფარგლებში ჩამოყალიბდება. სახელმწიფო ვალის მომსახურების შესაძლებლობა კვლავ ძლიერია და მყარ საფუძველს ეყრდნობა, რასაც განაპირობებს შეღავათიანი დაფინანსების მაღალი წილი, ვალდებულებების გონივრული მართვა და კომერციული დაფინანსების საჭიროებების დასაკმაყოფილებლად ფინანსურ ბაზრებზე ხელმისაწვდომობა”, - აღნიშნულია ანგარიშში.

Moody's-ის ანგარიშის თანახმად, რეიტინგის დადასტურება ასევე ასახავს შეფასებას, რომ საქართველოს შედარებით დინამიკური წარმოებისა და მომსახურების სექტორები, ქვეყნის სტრატეგიულად მნიშვნელოვანი გეოგრაფიული მდებარეობის პარალელურად, მომავალშიც გააგრძელებს საინვესტიციო ნაკადების მოზიდვას.

,,საქართველოს მდებარეობა შუა დერეფანში მას მნიშვნელოვან ლოგისტიკურ და სატრანსპორტო კვანძად აქცევს, რაც ხელს შეუწყობს როგორც ქვეყნის საგარეო ვაჭრობის შემდგომ დივერსიფიკაციას, ისე სავაჭრო საქონლის სტრუქტურის და საერთაშორისო კავშირების გაძლიერებას. შუა დერეფნის განვითარებასთან დაკავშირებულია არაერთი მსხვილი ინფრასტრუქტურული პროექტი, მათ შორის, ფოთის პორტის გაფართოება, ანაკლიის ღრმაწყლოვანი პორტის პროექტი, ვაზიანში ახალი აეროპორტის მშენებლობა და განახლებული ბაქო–თბილისი–ყარსის რკინიგზა, რომელიც სრული გამტარუნარიანობით 2026 წლის ივნისში ამოქმედდა. აღნიშნული პროექტები მნიშვნელოვნად გააძლიერებს საქართველოს, როგორც რეგიონული სატრანზიტო და ლოგისტიკური ჰაბის როლს, რომელიც ჩინეთსა და ცენტრალურ აზიას ევროპასთან აკავშირებს”, - წერს Moody's-ი.

ამასთან, ანგარიშის ნაწილი ეთმობა საქართველოს ეროვნულ ბანკს.

,,მონეტარული პოლიტიკის მიმართულებით, International Monetary Fund-ის მიერ რეკომენდებული რამდენიმე ღონისძიება უკვე განხორციელდა. მათ შორისაა ეროვნული ბანკის საბჭოში არააღმასრულეებლი წევრების უმრავლესობის უზრუნველყოფა, მთავრობისთვის დისკრეციული ფინანსური გადარიცხვების შეზღუდვა და ორგანიზაციული სტრუქტურის ცვლილება. ამასთან, სებ-ი ამჟამად მუშაობს კოლეგიური გადაწყვეტილების მიღების მოდელის სამართლებრივი ჩარჩოს შემუშავებასა და საბჭოს წევრების კვალიფიკაციის გაძლიერებაზე, International Monetary Fund-ის რეკომენდაციების შესაბამისად”, - აღნიშნულია ანგარიშში.