შემოსავლების სამსახურში განმარტავენ, რომ მოგების გადასახადის დეკლარირების წესი განსხვავდება კომპანიების საქმიანობის მიხედვით. როგორც ტელეკომპანია „მაესტროს“ ეთერში გადაცემა Business Insider Georgia-ში სტუმრობისას შემოსავლების სამსახურის მეთოდოლოგიის დეპარტამენტის უფროსმა, ლევან დგებუაძემ განაცხადა, საფინანსო სექტორის წარმომადგენლები წლიურ დეკლარაციას 31 მარტის ჩათვლით წარადგენენ, ხოლო სხვა კომპანიები, რომლებიც გადასახადს განაწილებული მოგების მიხედვით იხდიან, ყოველთვიურ დეკლარირებაზე არიან. მისივე თქმით, ბიზნესისთვის გათვალისწინებულია სხვადასხვა საგადასახადო შეღავათიც, მათ შორის საერთაშორისო კომპანიის სტატუსის მქონეებისთვის 5%-იანი განაკვეთი და გარკვეული სექტორების სრული გათავისუფლება მოგების გადასახადისგან.
„იურიდიული პირები მოგების გადასახადს განაწილებული მოგების მიხედვით იხდიან, რის გამოც შესაბამისი დეკლარირების ვალდებულება მათ ყოველთვიურად წარმოეშვებათ. აქ უნდა გამოვყოთ საფინანსო სექტორი - ეს არის ბანკები, სადაზღვევო კომპანიები, ლომბარდები, ასე სხვადასხვა საფინანსო ინსტიტუტები, რომლებიც წლიურად წარადგენენ მოგების გადასახადს და იხდიან და ადეკლარირებენ ასევე 31 მარტის ჩათვლით. 
დანარჩენი, რომლებიც მოგების გადასახადს იხდიან განაწილებული მოგების მიხედვით, ყოველთვიურ დეკლარირებაზე არიან და უწევთ ყოველთვიურად წარადგინონ მოგების გადასახადის დეკლარაცია. შეღავათები რა თქმა უნდა ამ სფეროშიც არის და შეღავათიანი დაბეგვრის რეჟიმები აქაც არის. მაგალითად, თუ ჩვეულებრივად საფინანსო ინსტიტუტები მოგების გადასახადს 20%-ის ოდენობით იხდიან, გვაქვს მოგების გადასახადის შეღავათიანი დაბეგვრის განაკვეთი - 5%, თუ საერთაშორისო კომპანიის სტატუსით სარგებლობს კომპანია, მოგების გადასახადს მხოლოდ 5%-ს იხდის. საერთაშორისო კომპანიის სტატუსი კი ენიჭებათ იმათ, ვინც IT მომსახურებას ეწევა საზღვარგარეთ არარეზიდენტებისათვის. მოგების გადასახადისაგან განთავისუფლებული არის აქაც მაგალითად კოოპერატივები, რომლებიც სასოფლო-სამეურნეო საქმიანობაში არიან დასაქმებულები, მათ მიერ მიღებული მოგება განთავისუფლებულია საერთოდ მოგების გადასახადისაგან. ასევე თავისუფალი ინდუსტრიული ზონის საწარმოები დაშვებული საქმიანობის ნაწილში მოგების გადასახადისაგან არიან განთავისუფლებულები. შეღავათები მრავალმხრივია და ბუნებრივია რეჟიმებიც შესაბამისად ადაპტირებულია იმისათვის, რომ ბიზნესმა მარტივად აკეთოს საქმიანობა და ზოგადად მოგეხსენებათ საგადასახადო ტვირთიც მძიმე არ არის საქართველოში, არამედ ერთ-ერთი გამორჩეული ქვეყანა ვართ მსუბუქი ტვირთის მხრივ“, - აცხადებს ლევან დგებუაძე.