საქართველოსთვის CARTIF-ი მნიშვნელოვანი შესაძლებლობაა, რადგან შეთანხმება ხელს შეუწყობს ქვეყნის, როგორც რეგიონული სატრანზიტო და სავაჭრო ჰაბის, პოზიციის გაძლიერებას - გენადი არველაძე
ცენტრალური აზიის რეგიონული ეკონომიკური თანამშრომლობის (CAREC) პროგრამის ქვეყნებმა ვაჭრობისა და ინვესტიციების ხელშეწყობის პარტნიორობის შეთანხმების (CARTIF) შესახებ მოლაპარაკების ნულოვანი რაუნდი გამართეს, რომელიც მონღოლეთის დედაქალაქ ულან-ბატორში ჩატარდა.
საქართველოს დელეგაციას ეკონომიკისა და მდგრადი განვითარების მინისტრის მოადგილე გენადი არველაძე ხელმძღვანელობდა. CARTIF-ი CAREC-ის ფარგლებში შემუშავებული პირველი შეთანხმებაა, რომლის მიზანია ქვეყნებს შორის ვაჭრობისა და ინვესტიციების ხელშეწყობა, არასატარიფო ბარიერების შემცირება, ციფრული ვაჭრობის განვითარება და ეკონომიკური თანამშრომლობის გაძლიერება.
CAREC-ის წევრ სახელმწიფოებს წარმომადგენელთა შეხვედრაზე განიხილეს მოლაპარაკებების ფორმატი, სტრუქტურა, პრიორიტეტები და სამომავლო გეგმები.
„საქართველოსთვის CARTIF-ი მნიშვნელოვანი შესაძლებლობაა, რადგან შეთანხმება ხელს შეუწყობს ქართული ექსპორტის დივერსიფიცირებას, ინვესტიციების მოზიდვასა და ქვეყნის, როგორც რეგიონული სატრანზიტო და სავაჭრო ჰაბის პოზიციის გაძლიერებას. ასევე მოსალოდნელია ვაჭრობის პროცედურების გამარტივება და ბიზნესისთვის უფრო პროგნოზირებადი და კონკურენტული გარემოს შექმნა“, - განაცხადა საქართველოს დელეგაციის ხელმძღვანელმა.
გენადი არველაძის თქმით, საქართველო, როგორც ევროპისა და აზიის გზაჯვარედინზე მყოფი ქვეყანა, დიდი ხანია, ასრულებს ბუნებრივი ხიდის როლს ვაჭრობისა და ტრანზიტისათვის.
„თავისუფალი ვაჭრობის შეთანხმებების ფართო ქსელით, მათ შორის, ევროკავშირთან, ჩინეთთან და რეგიონულ პარტნიორებთან და ჩვენი მზარდი როლით, როგორც ლოგისტიკური და სატრანსპორტო ჰაბის, ჩვენ CARTIF-ს განვიხილავთ, როგორც მნიშვნელოვან ინსტრუმენტს რეგიონის პოტენციალის კიდევ უფრო მეტად გასააქტიურებლად. ეს პირდაპირ ეხმიანება ჩვენს ხედვას, გავხდეთ ბაზრებს შორის დამაკავშირებელი კარიბჭე და ხელი შევუწყოთ საზღვრებზე საქონლის უფრო სწრაფ, ეფექტურ და საიმედო გადაადგილებას“, - აღნიშნა მინისტრის მოადგილემ.
როგორც გენადი არველაძემ განაცხადა, საქართველო მზადაა, აქტიური მონაწილეობა მიიღოს მოლაპარაკებებში.
„ჩვენ გვჯერა, რომ ეს პროცესი კიდევ უფრო განამტკიცებს რეგიონის ქვეყნებს შორის თანამშრომლობას, უფრო მეტად განავითარებს ეკონომიკურ შესაძლებლობებს და ხელს შეუწყობს დაკავშირებადობას“, - აღნიშნა მინისტრის მოადგილემ.
დღის ტოპ 10 სიახლე
სხვა სიახლეები
ინგა ფხალაძემ UNESCAP-ის ენერგეტიკის დეპარტამენტის დირექტორთან ენერგოეფექტურობისა და განახლებადი ენერგიების განვითარების საკითხები განიხილა
04.06.2026.17:46
საქართველოს ეკონომიკისა და მდგრადი განვითარების მინისტრის მოადგილე, ინგა ფხალაძე გაეროს აზიისა და წყნარი ოკეანის ეკონომიკური და სოციალური კომისიის (UNESCAP) ენერგეტიკის დეპარტამენტის დირექტორს, ჰონგპენგ ლიუს შეხვდა. მხარეებმა ენერგოეფექტურობისა და განახლებადი ენერგიების განვითარების საკითხები, საქართველოსა და UNESCAP-ს შორის თანამშრომლობის არსებული და სამომავლო მიმართულებები, მდგრადი განვითარების დღის წესრიგი და ენერგეტიკის სექტორში მიმდინარე რეფორმები განიხილეს.
შეხვედრისას ყურადღება გამახვილდა რეგიონული თანამშრომლობის გაღრმავების მნიშვნელობაზე, მწვანე ეკონომიკის განვითარების ხელშეწყობასა და სუფთა ენერგეტიკული გარდაქმნის პროცესში საერთაშორისო პარტნიორობის როლზე. მხარეებმა ასევე ისაუბრეს ინოვაციური მიდგომებისა და თანამედროვე ტექნოლოგიების დანერგვის შესაძლებლობებზე ენერგეტიკის სექტორში.
ეკონომიკისა და მდგრადი განვითარების სამინისტროში გამართულ შეხვედრას ასევე ესწრებოდნენ სამინისტროს ენერგოეფექტურობის, განახლებადი ენერგიების პოლიტიკისა და მდგრადი განვითარების დეპარტამენტის უფროსი მარგალიტა არაბიძე და ამავე დეპარტამენტის უფროსის მოადგილე ომარ წერეთელი.
