საგადახდო მომსახურებისა და დეპოზიტების ტარიფების შედარების ახალი პლატფორმახელს შეუწყობს მომხმარებელს ინფორმირებულ არჩევანზე დაყრდნობით  სწორი გადაწყვეტილება მიიღოს, - ამის შესახებ საქართველოს ეროვნული ბანკის  პრეზინდეტმა ნათია თურნავამ სებ-ის ახალი პლატფორმის პრეზენტაციისას განაცხადა.  

მისი თქმით, ახალი პლატფორმა კიდევ ერთი ნაბიჯია ფინანსური სექტორის გამჭვირვალობის, მომხმარებელთა უფლებებისდაცვის და ჯანსაღი კონკურენტული გარემოს განვითარების მიმართულებით, რაც ეროვნული ბანკის პრიორიტეტია.

„სწორედ ამ მიზანს ემსახურება ჩვენი ინიციატივაც - საგადახდო მომსახურების ტარიფებისა და დეპოზიტების საპროცენტო განაკვეთების შედარების ახალი პლატფორმა, რომელიც მომხმარებელს პირველად აძლევს შესაძლებლობას, ერთიან სივრცეში, საქართველოს ეროვნული ბანკის ოფიციალურ ვებგვერდზე მოიძიოს, შეადაროს და შეაფასოს ბაზარზე მოქმედი საგადახდო მომსახურების პროვაიდერების ტარიფები და საკომისიოები, ასევე სხვადასხვა ბანკში დეპოზიტებზე შეთავაზებული საპროცენტო სარგებლიდან შეარჩიოს დანაზოგის განთავსების ყველაზე ხელსაყრელი შესაძლებლობა", - განაცხადა ნათია თურნავამ. 

მისივე თქმით, პლატფორმა მნიშვნელოვან როლს შეასრულებს კონკურენტული გარემოს გაძლიერებაში, რაც საბოლოოდ, ხელს შეუწყობს როგორც მომსახურების ხარისხის გაუმჯობესებას, ისე სამართლიანი და ეფექტიანი ბაზრის განვითარებას.

სებ-ის პრეზიდენტის თქმით, ახალი პლატფორმა, რომელზეც მუშაობა ორი წლის წინ ევროკავშირის დირექტივების შესრულების პროცესში დაიწყო,  სხვადასხვა ევროპულქვეყნებში მოქმედი მსგავსი პლატფორმები შესწავლისა და საუკეთესო პრაქტიკების გამოცდილების გაზიარებით შეიქმნა.

„გვჯერა, რომ ეს იქნება პრაქტიკული და ძალიან სასარგებლო ინსტრუმენტი მომხმარებლებისა და ფინანსური ბაზრის მონაწილეებისთვის, კიდევ ერთი მნიშვნელოვანი ნაბიჯი უფრო ღია, გამჭვირვალე და კონკურენტული ფინანსური ეკოსისტემის ჩამოყალიბებისკენ, სადაც ნებისმიერ ადამიანს აქვს შესაძლებლობა, ფინანსური გადაწყვეტილებები სრულყოფილ და ობიექტურ ინფორმაციაზე დაყრდნობით მიიღოს", - აღნიშნა ნათია თურნავამ.

სებ-ის ახალი პლატფორმის საშუალებით მომხმარებელს შესაძლებლობა  ექნება:

• შეადაროს სხვადასხვა კომერციული ბანკის საგადახდო ანგარიშებთან დაკავშირებული მომსახურების ტარიფები;

• სხვადასხვა ფილტრის გამოყენებით შეარჩიოს მომსახურებები მისთვის საინტერესო კრიტერიუმებით და მარტივად შეადაროს სხვადასხვა ბანკის შეთავაზებები;

• მიიღოს განახლებული ინფორმაცია კომერციული ბანკების მიმდინარე გაცვლითი კურსების შესახებ;

• გამოიყენოს მარტივი, რთული, საბარათე და ვალუტის გაცვლის კალკულატორები სხვადასხვა მომსახურებით სარგებლობასთან დაკავშირებული ხარჯების წინასწარ შესაფასებლად;

• ასევე, შეადაროს კომერციულ ბანკებში მოქმედი დეპოზიტების ეფექტური საპროცენტო განაკვეთები და აირჩიოს ფულის დაზოგვის მისთვის საუკეთესო ალტერნატივა.