შავი ზღვის წყალქვეშა კაბელი ელექტროენერგიის ევროპულ ბაზარზე გატანის შესაძლებლობას შექმნის, - ამის შესახებ Galt & Taggart-ის უფროსმა ანალიტიკოსმა, ანა ჯეჯელავამ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„დაახლოებით, ჩვენი გათვლებით, ნახევარი ტერავატსაათი ელექტროენერგია დაიღვარა, ელექტროენერგიის ეკვივალენტი დაიღვარა წყლის სახით.

ასევე უნდა აღინიშნოს, რომ არამხოლოდ ელექტროენერგიის შეზღუდვა მოხდა ჰიდროელექტროსადგურებზე, ასევე ეს გავრცელდა მზის და ქარის სადგურებზეც. ანუ ყველა ჩვენი განახლებადი რესურსი იყო მოზღვავებული ენერგიით და შესაძლებლობა ნამდვილად იყო მეტი ექსპორტის.

უნდა აღვნიშნო, რომ ზოგადად წლევანდელ ექსპორტს თუ შევხედავთ, 30% ამ ექსპორტის იყო ტექნიკური მიმოცვლა აზერბაიჯანთან. მეთოდოლოგია შეიცვალა, წინა წლებში ეს არ ჩანდა სტატისტიკაში და აწი სულ გამოჩნდება და ეს ტექნიკური მიმოცვლებიც იქნება.

მესამედი იყო უშუალოდ ეს კომერციული ექსპორტი, რაც წარმოადგენს კომპანიების მიერ ბიზნესდაინტერესებით გატანილ ელექტროენერგიას, და კიდევ ერთი მესამედი იყო სახელმწიფოს მიერ გატანილი ბარტერი.

რა არის ეს ბარტერი? ანუ, როდესაც გამოიკვეთა ამ სიჭარბის პრობლემა და ის, რომ იქნებოდა ჭარბი გენერაცია, საქართველოს მთავრობამ შეიმუშავა ასეთი მიდგომა, რომ შეისყიდიდა ადგილობრივ გენერაციას ენგურის ფასად, ანუ 4 თეთრად, და გაყიდიდა ამ ელექტროენერგიას თურქეთში, ხოლო სანაცვლოდ თურქეთისგან მიიღებდა ელექტროენერგიას ზამთრის დეფიციტურ პერიოდში. რეალურად გაცვლას ექნება ადგილი.

ჩვენ ვიცით, რომ 85 მილიონი, დაახლოებით, კილოვატსაათი გავიდა ამ ბარტერის შეთანხმებით საქართველოდან და, ნუ, რაღაც ეკვივალენტი უნდა დაბრუნდეს საქართველოში.

გამომდინარე აქედან, ეს ბარტერი განმეორდება თუ არა მომავალ წელს, იქნება თუ არა რაიმე სხვა მიდგომები დაღვრებთან დაკავშირებით, ჩვენი ინფორმაციით, მიმდინარეობს ამაზე მუშაობა. თუმცა მთლიანობაში რომ შევხედოთ, სექტორმა, დაახლოებით, ჩვენი შეფასებებით, 25-დან 80 მილიონ ლარამდე იზარალა ამ ჭარბი გენერაციის ვერ რეალიზაციის გამო.

და როდესაც ვსაუბრობთ, რა გამოსავალი შეიძლება არსებობდეს, აქ ძირითად შესაძლებლობად, ალბათ, დამატებითი დერეფნების შექმნას დავასახელებდი და, პირველ რიგში, ხაზს გავუსვამდი შავი ზღვის წყალქვეშა კაბელს, რომელიც არის სამთავრობო გეგმაში. ვიცით ამის შესახებ, დაგეგმილია, რომ ეს აშენდეს 2032 წლისთვის და ამ კაბელისა და ამ პროექტის საშუალებით შესაძლებელი იქნება, რომ გავიტანოთ ელექტროენერგია უშუალოდ საქართველოდან ევროპულ ბაზარზე, პირდაპირ“, - აცხადებს ანა ჯეჯელავა.