სოფლის მეურნეობის განვითარების ინდექსს მნიშვნელოვანი პრაქტიკული მნიშვნელობა აქვს, რადგან ის სექტორის აგრეგირებულ სურათს გვაძლევს, ხოლო ინდექსთან ერთად მომზადებული მიმოხილვები დეტალური ანალიზის საშუალებას ქმნის. ამის შესახებ Galt & Taggart-ის მთავარმა ეკონომისტმა ლაშა ქავთარაძემ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა. მისი განმარტებით, ინდექსი წარმოადგენს პრაქტიკულ ინსტრუმენტს როგორც ზოგადი შეფასებისთვის, ისე კონკრეტული ეკონომიკური პოლიტიკის დაგეგმვისთვის.

„ინდექსის საშუალებით შეგვიძლია ძალიან მკაფიოდ დავინახოთ სექტორის საერთო სურათი. ამასთან, ინდექსს ყოველთვის თან ახლავს დეტალური მიმოხილვა, სადაც უკვე ვაანალიზებთ დარგის სხვადასხვა მიმართულებასა და პროდუქტებს. თუ ინდექსი გვაძლევს აგრეგირებულ სურათს, მიმოხილვის ნაწილი გვაძლევს შესაძლებლობას ჩავუღრმავდეთ დეტალებს. მაგალითად, ვაკვირდებით კონკრეტული პროდუქტების მოსავლიანობას, მათ შორის მარცვლოვანი კულტურების მიხედვით, ვადარებთ სხვა ქვეყნებს და ვაანალიზებთ, რატომ გვასწრებენ ისინი გარკვეულ მიმართულებებში, მათ შორის მაშინაც კი, როდესაც საწყისი პირობები შეიძლება მსგავსი იყოს. ასეთი ანალიზი საშუალებას გვაძლევს გამოვავლინოთ კონკრეტული გამოწვევები და შესაძლებლობები.

შედეგად, ინდექსი და მისი თანმხლები ანალიზი გვაძლევს საფუძველს მივიღოთ უფრო სწორი და დასაბუთებული გადაწყვეტილებები. სწორედ ამ პრაქტიკული გამოყენების თვალსაზრისით არის ეს ინსტრუმენტი განსაკუთრებით მნიშვნელოვანი“, - განმარტავს ლაშა ქავთარაძე.

მისივე თქმით, ინდექსის ფარგლებში უკვე განხორციელდა რიგი პროდუქტების დეტალური ანალიზი და მომავალში მისი გაფართოება იგეგმება, რაც შესაძლებლობას შექმნის პერიოდულად გამოქვეყნდეს ისეთი მიმართულებები, სადაც ბიზნესის ჩართულობის პოტენციალი განსაკუთრებით მაღალია.