Galt & Taggart-ის მთავარმა ეკონომისტი ლაშა ქავთარაძე ტელეკომპანია „მასეტროს“ ეთერში გადაცემა Business Insider Georgia-ში სტუმრობისას აცხადებს, სოფლის მეურნეობის განვითარების ინდექსი ეფექტიანი პოლიტიკის დაგეგმვასა და მონიტორინგს ამარტივებს, რადგან ცხრა ძირითადი ინდიკატორის მიხედვით შესაძლებელი ხდება პროგრესის, გამოწვევებისა და როგორც სახელმწიფო, ისე ბიზნესის როლის შეფასება.

მისი თქმით, ინდექსი უზრუნველყოფს მონაცემებზე დაფუძნებულ გადაწყვეტილებებს და სექტორის შედარებას როგორც დროში, ისე საერთაშორისო ჭრილში.

„ინდექსი იძლევა შესაძლებლობას კარგი მონიტორინგი გავაკეთოთ. პირდაპირ შევხედოთ კომპონენტებს, რომელ კომპონენტებში რა პროგრესი გვაქვს. ეს პროგრესი დამაკმაყოფილებელია თუ არ არის დამაკმაყოფილებელი. უფრო მეტად არის სახელმწიფოს როლის გაზრდა თუ ბიზნესის მიმართულებით უფრო მეტი აქტივობა არის საჭირო იმისათვის, რომ პროდუქტიულობა კიდევ უფრო გაიზარდოს და მერე შევადაროთ სხვა ქვეყნებს - მაგალითად ერთწლიანი კულტურების მოსავლიანობის გაუმჯობესება ჩვენთან რამდენად უფრო სწრაფად ხდება, ვიდრე სხვა ქვეყნებში. ამ კუთხითაც არის გამოყენებადი ეს ინდექსი. ასევე, რომ შევხედოთ მაგალითად საქონლის შუალედური დანახარჯებს, რომლითაც უნდა იწარმოოს ესა თუ ის პროდუქცია - როგორ არის საერთაშორისო ბაზრებზე მათი ფასები, არის თუ არა მიმართულებები, სადაც შეიძლება უფრო ეფექტურად იყოს გამოყენებული როგორც მოსავლიანობის, ისე წარმადობის კუთხით და ასე შემდეგ. ამ თითოეულ ინდიკატორს შეიძლება დავაკვირდეთ სიღრმისეულად. დავაკვირდეთ, მაგალითად, სახელმწიფო პროგრამების მიმდინარეობას. ეს პროგრამები  შენელდა, რატომ შენელდა? გაჯერდა ეს მიმართულება თუ სხვა პრობლემები არის. მოკლედ, ინდექსი თვითონ შინაარსობრივად ძალიან მარტივი არის - ცხრა ძირითადი ინდიკატორისგან შედგება. პოლიტიკის გამტარებლებს, ასევე კერძო ბიზნესის წარმომადგენლებს თითოეული ინდიკატორის მიხედვით გარკვეული შეფასებები და გადაწყვეტილებები მიიღონ. ამასთან, მოგეხსენებათ დროული და მაღალხარისხიანი მონაცემები რაოდენ მნიშვნელოვანი არის ზოგადად არა მარტო ამ დარგის წარმომადგენლებისთვის, არამედ სხვა სფეროებისთვის. ამიტომაც ვისურვებდით, სოფლის მეურნეობის სექტორის მონაცემები კიდევ უფრო გაუმჯობესდეს და დაიხვეწოს, რასაც ავსახავთ ინდექსშიც. ასევე არ გამოვრიცხავთ, რომ მეთოდოლოგიის გაუმჯობესებაც ვიხილოთ, უფრო მეტი ინდიკატორები მოვიცვათ - ეს ყველაფერი გამომდინარეობს თუ რა ტიპის მონაცემებზე გვექნება ხელმისაწვდომობა“, - აღნიშნა ლაშა ქავთარაძემ.