სომხეთი გაზის მიწოდების წყაროების დივერსიფიცირების პოლიტიკას გააგრძელებს, ბუნებრივი აირის ფასის შესაძლო ცვლილებების მიუხედავად, - განაცხადა სომხეთის პრემიერ-მინისტრმა ნიკოლ ფაშინიანმა.

პრესკონფერენციაზე ფაშინიანმა განაცხადა, რომ თუ სომხეთს გაზის მეორე ან მესამე წყაროდან მიღების შესაძლებლობა ექნება, ქვეყანა ამ მიმართულებით იმოქმედებს. ამასთან, TRIPP-ის პროექტის ფარგლებში შესაძლო გაზსადენის ამოქმედებამ შესაძლოა სომხეთს სატრანზიტო შემოსავლების მიღების შესაძლებლობაც მისცეს.

„სომხეთში გაზი იაფი არ არის. საზღვრიდან მომხმარებლამდე, სხვა ქვეყნებთან შედარებით, ფასის ფორმირების პროცესში ყველაზე დიდი ზრდა სომხეთში ხდება“, - განაცხადა ფაშინიანმა შესაძლო გაძვირების შემთხვევაში მოქალაქეებისთვის დამატებითი ტვირთის გავლენის შესახებ დასმული კითხვის პასუხად.

პრემიერმა ასევე აღნიშნა, რომ „გაზპრომ არმენია“ მომგებიანი კომპანიაა.

„მინდა ვთქვა, რომ „გაზპრომ არმენია“ მომგებიანი კომპანიაა. ეს კომპანია დიდ მოგებას იღებს. ესეც ფაქტია, რომელიც უნდა აღვნიშნოთ“, - განაცხადა მან.

ფაშინიანის თქმით, მთავრობა დივერსიფიცირების პოლიტიკას არა მხოლოდ გაზის, არამედ სხვა სექტორების მიმართულებითაც გაატარებს.

„არ არსებობს სექტორი, რომელშიც დივერსიფიკაციის პოლიტიკას არ გავატარებთ. ასეთი სექტორი არ არსებობს. ჩვენი პოლიტიკური გადაწყვეტილებაა, განვავითაროთ ჩვენი დამოუკიდებლობა და სახელმწიფოებრიობა. დანარჩენი მიმდინარე საკითხებია და კონკრეტულ სიტუაციებს კონკრეტული პასუხები შეიძლება ჰქონდეს“, - განაცხადა პრემიერმა.

გაზის შესაძლო გაძვირების შემთხვევაში მთავრობის ნაბიჯებზე საუბრისას ფაშინიანმა აღნიშნა, რომ გადაწყვეტილებები კონკრეტულ ვითარებაზე იქნება დამოკიდებული.

„თუ ასეთი ვითარება შეიქმნება ფასები გაიზრდება - ჩვენ ასევე ვნახავთ, რისი ფასის გაზრდა შეგვიძლია, ან რა არის ის, რაც აქამდე უფასო იყო და რომლისთვისაც შესაძლოა პროპორციული ფასი დაწესდეს. ამიტომ ამას ნორმალურად ვუდგებით; საკითხი ჩვეულებრივ, სამუშაო გარემოში უნდა და შეიძლება განიხილებოდეს“, - განაცხადა მან.

პრემიერმა ხაზი გაუსვა, რომ გაზის ფასის შემდგომი ცვლილებების მიუხედავად, მთავრობა მიწოდების შესაძლებლობების გაფართოებას შეეცდება.

„ჩვენ დივერსიფიკაციას გავაგრძელებთ, რაც არ უნდა მოხდეს. გაძვირდება თუ არა გაზი, როგორიც არ უნდა იყოს ვითარება, ჩვენ დივერსიფიკაციას გავაგრძელებთ. თუ მეორე წყაროდან გაზის შემოტანის შესაძლებლობა იქნება, ამ გზას გავყვებით. თუ მესამე წყაროდან შემოტანის შესაძლებლობა იქნება, იმ მიმართულებითაც ვიმოქმედებთ“, - განაცხადა ფაშინიანმა.