Starbucks-ის და Alshaya Group-ის შემოსვლა საქართველოში კიდევ ერთი მნიშვნელოვანი ნდობის გამოცხადებაა ჩვენი ქვეყნის, ქართული ეკონომიკის მიმართ - იმ ეკონომიკური განვითარების და მაჩვენებლის მიმართ, რაც საქართველოს ბოლო 5 წლის განმავლობაში აქვს, - აღნიშნული განცხადება ეკონომიკისა და მდგრადი განვითარების მინისტრის მოადგილემ, ირაკლი ნადარეიშვილმა საქართველოში გლობალური ბრენდის, Starbucks-ის შემოსვლასთან დაკავშირებით გააკეთა, რომლის პირველი ობიექტიც დღეს თბილისის ცენტრში გაიხსნა.

ირაკლი ნადარეიშვილის თქმით, Starbucks-ი არ არის ჩვეულებრივი კომპანია, ის 80 ქვეყანაში დაახლოებით 40,000 ობიექტით არის წარმოდგენილი.

„ეს არის ნდობის გამოცხადება იმ საინვესტიციო და ბიზნესგარემოს მიმართ, რომელსაც საქართველოს მთავრობა წლიდან წლამდე უზრუნველყოფს. ბოლო 10 წლის განმავლობაში საქართველო სტაბილურად ლიდერობს იმ წამყვან საერთაშორისო რეიტინგებში, რომლებიც ბიზნესისა და ინვესტიციების თვალსაზრისით ქვეყნების მიმზიდველობას განსაზღვრავენ. Starbucks-ი არ არის ჩვეულებრივი კომპანია, ეს არის გლობალური ბრენდი, რომელიც დაახლოებით 40,000 ობიექტით არის წარმოდგენილი მსოფლიოს 80 ქვეყანაში და მისი შემოსვლა საქართველოში არის, თავის მხრივ, კიდევ ერთი გზავნილი საერთაშორისო ბიზნეს საზოგადოებისთვის, საერთაშორისო გლობალური ბრენდებისთვის და ინვესტორებისთვის, რომ საქართველოში არის მიმზიდველი საინვესტიციო და ბიზნესის კეთების გარემო",- აღნიშნა ირაკლი ნადარეიშვილმა.

საქართველოში Starbucks-ის შემოსვლა ეკონომიკისა და მდგრადი განვითარების სამინისტროს ინვესტიციების სააგენტოს, საქართველოს საგარეო საქმეთა სამინისტროს და ქუვეითში საქართველოს საელჩოს ჩართულობით განხორციელდა.

ბრენდი საქართველოში Alshaya Group-მა შემოიყვანა, რომელიც Starbucks-ის ფრენჩაიზის მფლობელია ევრაზიისა და ახლო აღმოსავლეთის ბაზრებზე.