საქართველოს ეკონომიკური ფორუმის 30-ე დისკუსია „სამშენებლო-ინფრასტრუქტურული და სამშენებლო-დეველოპერული პროექტების გავლენა ეკონომიკურ განვითარებაზე” გაიმართა. ეკონომიკურ ფორუმში მონაწილეობდნენ: რევაზ სოხაძე, საქართველოს ინფრასტრუქტურის მინისტრი; შოთა ბერეკაშვილი, პარლამენტის ეკონომიკური პოლიტიკის კომიტეტის თავმჯდომარე; დავით ჯუღაშვილი, „ჰანიველ ცემენტის“ გენერალური დირექტორი; გიორგი კუპრაშვილი, „გალტ & თაგარტის" გენერალური დირექტორი; ირაკლი კვერღელიძე - „ორბი ჯგუფის” გენერალური დირექტორი; ირაკლი გიორგობიანი - ინფრასტრუქტურის მშენებელთა ასოციაციის (ICCA) აღმასრულებელი დირექტორი.

ღონისძიებას მოდერატორობას უწევდა „ბიზნეს ინსაიდერი საქართველოს“ და "საქართველოს ეკონომიკური ფორუმის" დამფუძნებელი და ხელმძღვანელი გიორგი აბაშიშვილი.

,,ჩვენ როგორც „ჰანიველ ცემენტი“ მუდმივად ვზრუნავთ ხარისხზე, ჩვენ ვართ ინოვატორები არამარტო საქართველოში, არამედ ვმუშაობთ პატენტებზე, რომელიც მთელი მსოფლიოს მასშტაბით პირველი იქნება ინოვაციებში, ეს ჩვენს პროდუქციას აუმჯობესებს, როგორც დანახარჯების მხრივ ანუ უფრო იაფს ხდის მას, ასევე ხარისხის მხრივაც. ასე რომ ჩვენ ამაზე მუდმივად ვფიქრობთ და მუდმივად ვმუშაობთ. ახლა, ცოტა ხნის წინ გამოვაცხადეთ, რომ განვახორციელებთ საკმაოდ დიდ ინვესტიციას, 70 მილიონიან ინვესტიციას ვაკეთებთ, რომ დავამატოთ კიდევ კლინკერის წარმოება, პირველადი პროდუქტი ცემენტისთვის და შემდეგში უკვე ბეტონისთვის და ასევე, ვაგრძელებთ ინვესტიციებს ცემენტის საფქვავებში და ამას გადავანაწილებთ უფრო კარგად მთელი საქართველოს მასშტაბით, რომ უფრო კარგად მოვემსახუროთ ჩვენს კლიენტებს და ასევე, გავაგრძელებთ ბეტონის ქარხნებში ინვესტიციასაც, ასევე მთელი საქართველოს მასშტაბით, რომ უკეთესად მოვემსახუროთ ჩვენს კლიენტებს. ძალიან მნიშვნელოვანია რომ ინფრასტრუქტურის სამინისტრო, რაც მოვისმინეთ რომ გააგრძელებენ იმ პროექტებს, რომელსაც აკეთებდნენ და მნიშვნელოვანი ეს სწრაფად მოხდეს. მესმის რომ ბევრი პრობლემა დახვდათ იქ და დღეს ძალიან კარგად აგვიხსნა მინისტმა რა პრობლემებს ეჭიდებიან ისინი, მაგრამ ასევე ძალიან მნიშვნელოვანია რომ ეს პრობლემები დროულად გადაწყდეს და გაგრძელდეს ინფრასტრუქტურის მშენებლობა იმიტომ რომ ინფრასტრუქტურა არის ის, რაც გვაძლევს საშუალებას თითქმის მთელ დანარჩენ ეკონომიკასთან ნორმალურად ვიმუშაოთ იქნება ეს  გზა თუ აეროპორტი თუ რაღა ამდაგვარი და მესამე მინდა ვთქვა რომ ძაან მნიშვნელოვანია ჩვენ ვისწავლოთ ფულის შემოტანა საქართველოში. სამშენებლო დარგს ეხებოდა ეს კონფერენცია და დავამატებ, რომ თუ ჩვენ დღეს ვაშენებთ უძრავ ქონებას და ვეძახით უძრავ ქონებას ეს არის რესტორნები, სასტუმროები, ბინები და ეს არის ძირითადი ბირთვი კერძო სექტორი როგორ მონაწილეობს მშენებლობაში და  დეველოპენტში ძალიან მნიშვნელოვანია რომ ჩვენ ვისწავლოთ პორტების, ჰიდროელექტროსადგურების, დატა ცენტრების და ესეთი სამშენებლო პროექტების კეთება, რომლებსაც ბევრად უფრო მეტი ფული ჭირდება მაგრამ ასევე ბევრად უფრო მეტ ღირებულებას შექმნიან ამ ქვეყნისთვის, სადაც საქართველოს  აქვს სამივე რაც მე დავასახელე წარმოდგენილი უპირატესობა თავისი მდებარეობით, თავისი მაღალმთიანი კლიმატის და 26 000 მდინარის გამო, რომელიც ჩვენ გვაქვს და ეს არის სიმდიდრე, რაც ამ  ქვეყანას აქვს ამიტომ უნდა ვისწავლოთ  როგორ შემოვიტანოთ კერძო ფული რომ ამ კერძო ფულით დიდი პროექტები ვაკეთოთ”, განაცხადა კომპანია „ჰანიველ პარტნერსის“ მმართველმა პარტნიორმა ირაკლი რუხაძემ.

დისკუსიაში ფორუმის ფორმატში ერთობლივად მონაწილეობდნენ საკანონმდებლო და აღმასრულებელი ხელისუფლების წარმომადგენლები, ბიზნეს სექტორი, ცალკეული კომპანიების ხელმძღვანელები, მფლობელები და პარტნიორები, აკადემიური და ანალიტიკური სექტორის წარმომადგენლები.