TBC Group-მა უზბეკეთის OLX-ის საკონტროლო წილი შეიძინა. გარიგების ფარგლებში წილების გადაცემის რეგისტრაცია უზბეკეთში უახლოეს პერიოდში დასრულდება, როგორც ტრანზაქციის შემდგომი განხორციელების პროცესის ნაწილი.

გარიგების დასრულებას წინ უძღოდა უზბეკეთის კონკურენციის განვითარების და მომხმარებელთა უფლებების დაცვის კომიტეტისგან აუცილებელი მარეგულირებელი თანხმობის მიღება.

ამ გარიგების განსახორციელებლად TBC Group-მა ერთობლივი საწარმო შექმნა Titan Investments-თან საერთაშორისო საინვესტიციო ჰოლდინგთან, რომელსაც მხარს უჭერენ წამყვანი საერთაშორისო ინსტიტუციური ინვესტორები, საოჯახო საინვესტიციო ოფისები და ახლო აღმოსავლეთის სუვერენული საინვესტიციო ფონდები.

ერთობლივმა საწარმომ OLX Uzbekistan-ის 100%-იანი წილი შეიძინა. აქედან TBC Group ფლობს 50% + 1 აქციას, ხოლო დარჩენილი წილი Titan Investments-ის საკუთრებაშია.

OLX Uzbekistan უზბეკეთის ერთ-ერთი ყველაზე პოპულარული ონლაინ პლატფორმაა. პლატფორმას ყოველთვიურად 5 მილიონზე მეტი აქტიური მომხმარებელი ჰყავს, მასზე განთავსებულია 2 მილიონი აქტიური განცხადება მომსახურების, სამომხმარებლო საქონლის, ავტომობილებისა და უძრავი ქონების კატეგორიებში, ხოლო ის ქვეყნის აქტიური ინტერნეტმომხმარებლების 17%-ზე მეტს ემსახურება.

OLX Uzbekistan საქმიანობას OLX-ის ბრენდის ქვეშ გააგრძელებს და დამოუკიდებელი, ღია განცხადებების პლატფორმის სტატუსს შეინარჩუნებს. სამომავლოდ TBC Uzbekistan გეგმავს, OLX Uzbekistan-ის მეშვეობით მომხმარებლებს ფინანსური და გადახდის სერვისებიც შესთავაზოს, რაც როგორც საცალო, ისე ბიზნესსეგმენტთან ურთიერთობის კიდევ უფრო გაღრმავებას შეუწყობს ხელს.

ნიკა ქურდიანი, TBC Uzbekistan-ის აღმასრულებელი დირექტორი: ,,მოხარული ვართ, რომ გარიგება წარმატებით დასრულდა. ეს კიდევ ერთი მნიშვნელოვანი ნაბიჯია ჩვენი ბიზნესის დივერსიფიკაციის სტრატეგიის განხორციელების მიმართულებით.

აღნიშნულ TBC-ს შესაძლებლობას აძლევს, შევიდეს მაღალი ზრდის პოტენციალის მქონე ახალ სექტორში, მოიზიდოს მილიონობით ახალი მომხმარებელი, გაზარდოს მომხმარებელთა ჩართულობა და შექმნას დამატებითი სინერგია, რომელიც გრძელვადიან პერსპექტივაში მომხმარებელთა ლოიალურობასა და აქტიურობას კიდევ უფრო გააძლიერებს.

ჩვენ შევინარჩუნებთ იმ ღირებულებებს, რაც OLX-ს უნიკალურ და სანდო პლატფორმად აქცევს - მის ღია და დამოუკიდებელ მოდელს, ამავდროულად კი მომხმარებლებს ახალ პროდუქტებსა და სერვისებს შევთავაზებთ.

მოხარული ვართ, რომ ამ პროექტში Titan Investments-თან ვთანამშრომლობთ და გვჯერა, რომ ჩვენი ერთობლივი გამოცდილება OLX Uzbekistan-ის შემდგომ ზრდასა და განვითარებას მნიშვნელოვნად შეუწყობს ხელს.“