თბილისის საერთაშორისო აეროპორტს გაფართოების შედეგად დაემატება ახალი საჰაერო ხომალდების სადგომები, ასევე ჩასხდომის ხიდები, ახალი სამიმოსვლო ბილიკები - ამის შესახებ, საქართველოს აეროპორტების გაერთიანების გენერალურმა დირექტორმა ლევან მოსეშვილმა ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„ნამდვილად უპრეცენდენტო ინვესტიცია განხორციელდება თბილისის საერთაშორისო აეროპორტში. მივიღეთ გადაწყვეტილება რომ თბილისის საერთაშორისო აეროპორტში ოპერატორმა კომპანიამ TAV Georgia-მ რომელიც ოპერირებს ერთ-ერთ მსხვილი ფრანგული კომპანიის ADB Group-ის ქვეშ განახორციელოს 150 მილიონ დოლარზე მეტი ინვესტირება, რაც იმას ნიშნავს რომ გაფართოვდება ინფრასტრუქტურა, მომსახურების ხარისხიც თავისთავად უფრო გაუმჯობესდება მგზავრებისთვის, დაინერგება თანამედროვე ტექნოლოგიები, შესაძლებელი იქნება რომ თბილისის საერთაშორისო აეროპორტი ჯამში 10 მილიონ მგზავრს მოემსახუროს, რაც ფეხდაფეხ მიჰყვება იმ პროგნოზს, რომელიც მგზავრთნაკადისთვის გვაქვს. უახლოესი ორი წლის განმავლობაში ეს ინვესტიცია სულად იქნება ათვისებული. თბილისის საერთაშორისო აეროპორტის ფართობი 50%-ზე მეტით გაიზრდება, დაემატება როგორც ახალი საჰაერო ხომალდების სადგომები, ასევე ჩასხდომის ხიდები, დაემატება ახალი სამიმოსვლო ბილიკები. ეს იმას ნიშნავს რომ საქართველოს საავიაციო ბაზარი ფეხდაფეხ მიყვება იმ ტრენდს, რაც მსოფლიო ავიაციის განვითარებაში არის. საქართველო მომხიბვლელი ავიაბაზარია არა მხოლოდ აზიური ბაზრისთვის, არამედ ევროპული ავიაკომპანიებისთვისაც.

ავიაციის რუკაზე საქართველო ერთ-ერთ მნიშვნელოვანი წერტილს წარმოადგენს და ეს ინვესტიცია, რომელიც განხორციელდება მკაფიოდ მჯერა რომ გაამართლებს ამ იმედებს და გაამართლებს იმ მოლოდინებს, რომელიც ჩვენ თბილისის დედაქალაქის აეროპორტის განვითარებისთვის გვაქვს. 2032 წლამდე სრულად იქნება უზრუნველყოფილი რომ 10 მილიონ მგზავრს გაატარებს თბილისის საერთაშორისო აეროპორტი, უმაღლესი სერვისებით და უფრო მეტი კომფორტით რაც შეიძლება რომ ჩვენ მგზავრებს შევთავაზოთ", - აცხადებს ლევან მოსეშვილი.