კონკურენციისა და მომხმარებლის დაცვის სააგენტომ თხილისა და მოცვის საექსპორტო ბაზრების მონიტორინგი ფერმერების ინიციატივით დაიწყო. როგორც ტელეკომპანია „მაესტროს“ ეთერში, გადაცემა Business Insider Georgia-ში სტუმრობისას კონკურენციისა და მომხმარებლის დაცვის სააგენტოს თავმჯდომარემ ირაკლი ლექვინაძემ აღნიშნა, ფერმერებს ჰქონდათ განცდა, რომ სეზონზე მათგან პროდუქციის შესყიდვის ფასი დაბალია, მაშინ როდესაც საექსპორტო ფასები მნიშვნელოვნად განსხვავდება.

ლეკვინაძის განმარტებით, კვლევის მიზანი იყო შეფასებულიყო, არსებობდა თუ არა ბაზარზე დომინანტი კომპანიები ან მცირე ჯგუფი, რომელსაც ფერმერებთან მოლაპარაკებებში განსაკუთრებული გავლენა ექნებოდა. თუმცა, როგორც აღმოჩნდა, ორივე მიმართულებით ბაზარი საკმაოდ დივერსიფიცირებულია და დაახლოებით 50-მდე ექსპორტიორი კომპანია ოპერირებს, რის გამოც არცერთი მსხვილი მოთამაშის წილი დომინანტობის ნიშნულს არ უახლოვდება. მისი თქმით, ფასებს შორის სხვაობა ძირითადად ტექნიკური და ხარისხობრივი პარამეტრებით არის განპირობებული და არა კონკურენციის პრობლემით.

„ეს ძალიან საინტერესო ბაზარია, ძირითადად ჩვენ შევაფასეთ აქ საექსპორტო ბაზრები, რადგანაც ორივე სფერო ძალიან დინამიურია და თავის დროზე ფერმერებმა მოგვმართეს ჩვენ ამ მონიტორინგის დაწყების ინიციატივით, იმიტომ რომ მათ ჰქონდათ განცდა და აღქმა, რომ სეზონზე ფასები არის შესასყიდი ფასები მათთგან ძალიან დაბალი და საექსპორტო ფასები შემდგომ განსხვავდებოდა ამ დინამიკისგან. ამიტომ ჩვენი მიზანი იყო შეგვეფასებინა - არის თუ არა ამ ბაზარზე ან დომინანტები ან გარკვეული კომპანიების მცირე ჯგუფი, რომლებსაც გააჩნიათ მოლაპარაკებებში ძალაუფლება ფერმერებთან მიმართებაში. თუმცა აღმოჩნდა, რომ როგორც ერთ ასევე მეორე მიმართულებით საკმაოდ ბევრი ექსპორტიორი კომპანია გვყავს - იქ დაახლოებით 50-მდეა ორივე შემთხვევაში და ეს დინამიკა სულ იცვლება. საკმაოდ დივერსიფიცირებულია და ყველაზე მსხვილი კომპანიების წილიც ახლოს არა არის დომინანტობის მაჩვენებელთან. და ფასთა შორის სხვაობები ძირითადად განპირობებულია სხვადასხვა ტექნიკური თუ ხარისხობრივი პარამეტრებით. ამიტომ აქაც ამ პროცესთან გვაქვს საქმე - არა კონკურენციაშია პრობლემა, არამედ უფრო სხვა ასე რომ ვთქვათ არსებულ საოპერაციო საკითხებთან.

ამიტომ ჩვენ ამ ბაზრის დაკვირვებას ვაგრძელებთ, იმიტომ რომ განსაკუთრებით მოცვის ბაზარი ძალიან დინამიურად მზარდია და მუდმივად ფერმერებს და ყველა დაინტერესებულ მხარეს გავუზიარებთ ინფორმაციას თუ რა ხდება ამ ნაწილში კონკურენციის კუთხით. მართლაც დინამიურია ამ კუთხით მოცვის ბაზარიც და კიდევ ერთხელ მნიშვნელოვანია, რომ პროცესს ასე აკვირდებით, ვინაიდან არის საშუალება უფრო კვალიფიციური შეფასების ვითარების. აი დავაზუსტებ ერთ რამეს - აი თხილის ბაზარი გასული წელი ძალიან მნიშვნელოვანი იყო იმიტომ რომ საექსპორტო ღირებულება როგორც რაოდენობრივად ასევე ღირებულებით ჭრილში ძალიან გაზრდილია. და მოცვის ნაწილს თუ შევხედავთ - აქ ბოლო სამ-ოთხ წელიწადში თითქმის გაორმაგებასთან გვაქვს საქმე იმდენად უკვე ეს დინამიურად მზარდი სექტორია. ამიტომ ვფიქრობ რომ ამ დინამიური განვითარების ფონზე ალბათ ჩვენი შეფასებებიც მიეხმარება დაინტერესებულ მხარეებს გადაწყვეტილებების მიღებაში“, - აცხადებს ირაკლი ლექვინაძე.