ცალსახად სწორი გადაწყვეტილებაა - ასე აფასებს, სემეკის წევრი გივი სანიკიძე უკანონო კრიპტომაინინგის პრობლემის აღმოსაფხვრელად, მესტიაში გამრიცხველიანების პროცესის დაწყებას. 

,,ძალიან მნიშვნელოვანი გადაწყვეტილება მიიღო საქართველოს მთავრობამ, აუცილებელი იყო, სახელმწიფო სტრუქტურების ჩართულობა რომ ეს პროცესი დაწყებულიყო და ეს პრობლემა მოგვარებულიყო. ძალიან მნიშვნელოვანია, რომ ელექტოენერგიის მოხმარება მესტიაში სრულად აღირიცხება, ეს გამოიწვევს იმას რომ მომხმარებლები მიეჩვევიან ელექტროენერგიის გადასახადის გადახდას  და ,,ენერგო-პრო ჯორჯიას“ ექნება შესაძლებლობა რეაბილიტაცია ჩაუტაროს ქსელს - მოგვარდება პრობლემა ქსელების გადატვირთვასთან დაკავშირებით და შესაბამისად, ეს დადებითად აისახება ქსელის მდგომარეობაზე", - ამბობს გივი სანიკიძე.

მისი თქმით, როდესაც არ ხდება ელექტროენერგიის გადასახადის გადახდა, რა თქმა უნდა ეს უარყოფითად აისახება კომპანიაზე და ის დანახარჯები რაც კომპანიამ აუცილებლად უნდა აინაზღაუროს წინააღმდეგ შემთხვევაში ვერ მოემსახურება მომხმარებელს.

,,დღეს გაჟღერდა, რომ დაწესდება გარკვეული ლიმიტები და ტარიფები შენარჩუნდება - ეს ჩვენი შეფასებით გამომდინარეობს იქედან, რომ საქართველოს მთავრობას აქვს უფლებამოსილება სუბსიდირება მოახდინოს გარკვეული მომხმარბელების და შესაბამისად, როდესაც დასრულდება აღრიცვიანობა, მოწესრიგდება მესტიის მუნიციპალიტეტში აღრიცხვის პროცესი ენერგოპროჯორჯიას შესაძლებლობა ექნება ქსელის რეაბილიტაცია ჩაატაროს, რადგან როცა გადატვირთვით მუშაობს ქსელი ეს აჩერებს რეაბილიტაციას. ამასთან, შემცირდება მოხმარება, მოხმარების შემცირება ნიშნავს ნაკლები ელექტროენერგიის შესყიდვის საჭიროებას, შემცირდება დანაკარგები ქსელში როდესაც გაუმჯობესდება მდგომარეობა", - აცხადებს გივი სანიკიძე.

სემეკის წევრის თქმით, მისი მოლოდინია რომ პროცესი წარმატებით განხორციელდება. 

,,მივესალმებით მთავრობის გადაწყვეტილებას და ყველა მომხმარებელი უნდა დაექვემდებაროს იმ გადაწყვეტილებას, რაც დღეს იქნა მიღებული, ხოლო გადასახადის გადახდა უნდა მოხდეს აღრიცხვის შესაბამისად იმ შეღავათების გათვალისწინებით რაც დღეს გაჟღერდა, შესაბამისად იმედი გვაქვს რომ ეს პროცესი განხორციელდება წარმატებით", - ამბობს გივი სანიკიძე.