წელს საქართველოს ეკონომიკა 5,2%-ის ნაცვლად 6%-ით გაიზრდება - გიორგი კაკაურიძე
ფინანსთა მინისტრის მოადგილემ, გიორგი კაკაურიძემ პარლამენტში წარადგინა ცვლილებების პაკეტი, რომლის თანახმადაც მთავრობა ეკონომიკური ზრდის პროგნოზს ცვლის.
„ეკონომიკური ზრდის ტენდენცია უფრო მაღალი გვაქვს ვიდრე დაგეგმილი იყო. შესაბამისად ველოდებით, რომ ნაცვლად 5,2%-ისა ეკონომიკა საბაზისო სცენარით 6%-მდე გაიზრდება.თუმცა როგორც ყოველთვის შედარებით კონსერვატიულად ვფიქრობთ წლის მეორე ნახევარზე, რადგან არ გვინდა ზედმეტად ოპტიმისტური გამოვიდეს. თუმცა წარმოდგენილია ოპტიმისტური სცენარიც, სადაც უკვე ეკონომიკური ზრდის მაჩვენებელი 7,3% გამოდის“, - განაცხადა გიორგი კაკაურიძემ.
ფინანსთა მინისტრის შეფასებით, აქციების ნაწილი დიდად ვერ მოქმედებს ეკონომიკურ ზრდაზე, თუმცა ეს უფრო მეტად მოქმედებს ტურისტულ სექტორზე.
„ვისაც მცირე ზომის სასტუმროები აქვთ, მსგავს ბიზნესებზე აქციები მოქმედებს. თუმცა მათი წილი ეკონომიკაში დიდი არ არის და მსგავსი თემა მოკლევადიანია და დიდ რღვევებს ვერ მოიტანს, მაგრამ თუ ეს იქნება გრძელვადიანი, თავისი ეფექტი ექნება“, - აღნიშნა კაკაურიძემ.
შეგახსენებთ, რომ აქამდე ბიუჯეტით განსაზღვრული იყო 5.2%-იანი ეკონომიკური ზრდა და საქართველოს მთლიანი შიდა პროდუქტს 86 მილიარდი ლარისთვის უნდა მიეღწია
ფინანსთა სამინისტროს მიერ წარდგენილი განახლებული პროგნოზით, 2024 წელს საქართველოს ეკონომიკა 6%-ით გაიზრდება, მთლიანი შიდა პროდუქტის მოცულობა კი 87.7 მილიარდი ლარი იქნება.
დღის ტოპ 10 სიახლე
სხვა სიახლეები
„ლენდლორდის” მოდელით საქართველოს აქვს შესაძლებლობა ანაკლიის ღრმაწყლოვანი პორტის განვითარებაში ერთდროულად ჩართოს რამდენიმე საერთაშორისო პარტნიორი, რომელთაც გააჩნიათ როგორც მსგავსი ტიპის ნავსადგურების ოპერირების გამოცდილება, ასევე შეუძლიათ დამატებითი ტვირთნაკადები მოიზიდონ - თამარ იოსელიანი
06.07.2026.20:28
"ლენდლორდის" მოდელით საქართველოს აქვს შესაძლებლობა ანაკლიის ღრმაწყლოვანი პორტის განვითარებაში ერთდროულად ჩართოს რამდენიმე საერთაშორისო პარტნიორი, რომელთაც გააჩნიათ როგორც მსგავსი ტიპის ნავსადგურების ოპერირების გამოცდილება, ასევე შეუძლიათ დამატებითი ტვირთნაკადები მოიზიდონ, - აცხადებს ეკონომიკისა და მდგრადი განვითარების მინისტრის მოადგილე, თამარ იოსელიანი.
მინისტრის მოადგილის განმარტებით, საქართველოს მთავრობამ ანაკლიის ღრმაწყლოვანი ნავსადგურის განვითარებასთან დაკავშირებით უმნიშვნელოვანესი გადაწყვეტილება მიიღო.
„ჩვენ გადავდივართ განვითარების ახალ მოდელზე, რომელიც არის ფართოდ აპრობირებული მსოფლიოში. ეს არის "ლენდლორდის" მოდელი, რომელიც ითვალისწინებს იმას, რომ სახელმწიფო ააშენებს ძირითად ფუნდამენტურ ინფრასტრუქტურას და დარჩება ნავსადგურის ძირითადი საზღვაო და საპორტო ინფრასტრუქტურის 100%-იანი წილის მესაკუთრედ. ამასთან, პორტში განთავსებული სპეციალიზებული ტერმინალები გრძელვადიანი იჯარით გადაეცემა საერთაშორისო ოპერატორებს და ინვესტორებს. ეს არის ძალიან მნიშვნელოვანი გადაწყვეტილება. ამ ახალი მოდელით საქართველოს აქვს შესაძლებლობა პორტის განვითარებაში ერთდროულად ჩართოს რამდენიმე საერთაშორისო პარტნიორი, რომელთაც გააჩნიათ როგორც მსგავსი ტიპის ნავსადგურების ოპერირების გამოცდილება, ასევე აქვთ შესაძლებლობა, მოიზიდონ დამატებითი ტვირთნაკადები, რაც, რა თქმა უნდა, მოგვცემს შესაძლებლობას, რომ გადანაწილდეს როგორც რისკები, ასევე მოხდეს ყველა ჩართული ქვეყნისა თუ კომპანიის ინტერესების გათვალისწინება ", - აღნიშნა თამარ იოსელიანმა.
