წყლის რესურსებთან დაკავშირებული კანონი პირდაპირ კავშირშია ენერგეტიკის განვითარებისთვის, - ამის შესახებ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას GREDA-ს აღმასრულებელმა დირექტორმა, მაია მელიქიძემ განაცხადა.

„მადლობა მინდა გადაგიხადოთ, იმიტომ რომ ჩვენი სიძლიერე თქვენი დამსახურებაც არის, ვინაიდან თქვენ ხართ ის გამტარი საშუალება, რომლითაც ფართო საზოგადოებას ვეკონტაქტებით და ინფორმაციას ვაწვდით.

ნამდვილად, გეგმები საკმაოდ ამბიციურია იმ უბრალო მიზეზის გამო, რომ ზოგადად სექტორი საკმაოდ დინამიკური და აქტიურია. პირველ ეტაპზე, რაც გვაქვს დღის წესრიგში, არის აქტიური კომუნიკაცია GREDA-ს კანონპროექტთან დაკავშირებით. მართალია, გამოწვევები საკმაოდ დიდია, მაგრამ ამ კანონპროექტის გარეშე, მისი მიღების გარეშე, ჰიდროენერგეტიკას ზოგადად განვითარება ძალიან გაუჭირდება და ეს არაერთგზის დამტკიცდა.

ხაზგასმით მინდა აღვნიშნო, რომ ჩვენთვის, ბუნებრივია, გასაკვირი არ იყო, მაგრამ ამის მტკიცებულებაა ის ვიდეოჩანაწერები, სადაც ჩანს ადგილობრივი მოსახლეობის მხრიდან ენერგეტიკის სექტორისადმი ძალიან სერიოზული პოზიტიური დამოკიდებულება. ადრე ნამდვილად ასე არ იყო და ხშირი იყო პროტესტი ამ სექტორის მიმართ, მაგრამ ახლა უკვე ყველაფერი იცვლება.

ამასთანავე, ემატება, რა თქმა უნდა, ჩვენი გააქტიურება სამეცნიერო თვალსაზრისით, კომუნიკაციის მიმართულებით. ყოველ წელს დავდივართ რეგიონებსა და რაიონებში და ვცდილობთ, აქტიურად გავააქტიუროთ მომავალი თაობა, განსაკუთრებით, რათა დაინტერესდნენ ენერგეტიკის სექტორით.

ჩვენთვის ძალიან სასიხარულოა, რომ ტექნიკურ უნივერსიტეტთან კომუნიკაცია გვქონდა და ვნახეთ, რომ პირველ შემოხაზვაზე მაჩვენებელი საკმაოდ მაღალია. ეს პირველი წელია, როდესაც ასე ხდება და, რა თქმა უნდა, ჩვენთვის ეს ძალიან სასიხარულოა. ამაში GREDA-ს წვლილიც არის.

ბოლო ორი წლის განმავლობაში ჩვენ აქტიურად ვხვდებოდით 11-ივე რეგიონში სკოლის მოსწავლეებს - მეათე, მეთერთმეტე და მეთორმეტე კლასელებს. ვარწმუნებდით იმაში, თუ რამდენად მნიშვნელოვანი დარგია ენერგეტიკა და რას უზრუნველყოფს ის არამხოლოდ მათთვის, არამედ მათი რეგიონისთვის, რაიონისთვის და ზოგადად განვითარებისთვის.

მნიშვნელოვანია ის საკანონმდებლო ცვლილებებიც, რომლებიც მიმდინარეობს. 2027 წელს უკვე მიღებული იქნება წყლის რესურსებთან დაკავშირებული კანონი, რაც ასევე პირდაპირ კავშირშია ენერგეტიკის განვითარებასთან. ჩვენ კი ვცდილობთ, შევინარჩუნოთ ის მნიშვნელოვანი პოზიცია, რომელიც გვიკავია, და კიდევ უფრო გავაძლიეროთ.