წლის დასაწყისში ჩვენ ვხედავდით, რომ 60%-ს გასცდა იმპორტდამოკიდებულება ელექტროენერგეტიკაში, - ამის შესახებ Galt & Taggart-ის უფროსმა ანალიტიკოსმა, ანა ჯეჯელავამ ტელეკომპანია „მაესტროს“ ეთერში გადაცემა Business Insider Georgia-ში სტუმრობისას განაცხადა.

„Galt & Taggart-მა გამოაქვეყნა 8 თვის შეჯამება, რომლითაც იკვეთება სეზონური გამოწვევები საქართველოს ელექტროენერგეტიკულ ბაზარზე.

ძირითადში ეს გამოისახება ზამთარში გაზრდილ იმპორტდამოკიდებულებაში. მარტივი ენით რომ ვთქვათ, გვჭირდება მეტი ელექტროენერგიის იმპორტი და მეტი ბუნებრივი გაზის იმპორტი იმისათვის, რომ ვამუშაოთ თბოელექტროსადგურები. თბოელექტროსადგურები, ზოგადად, ჩვენი სისტემისთვის მნიშვნელოვანია არამხოლოდ გენერაციის კუთხით, არამედ რეზერვების კუთხით და, ამავდროულად, სისტემური საიმედოობის კუთხით.

აქვე ვისაუბრებ დასავლეთ-აღმოსავლეთის კავშირზე, ანუ, კერძოდ, ჩვენი ჰიდრორესურსების უმრავლესობა არის დასავლეთში და მოხმარების ცენტრი კი თბილისი აღმოსავლეთშია. აქედან გამომდინარე, ზოგჯერ ხდება გადატვირთვები ამ ხაზზე და ერთ-ერთი ხერხი, ასე ვთქვათ, იმისათვის, რომ თავიდან ავირიდოთ რაიმე შეფერხებები, არის თბოსადგურების ამუშავება.

წლის დასაწყისში ჩვენ ვხედავდით, რომ 60%-ს გასცდა იმპორტდამოკიდებულება ელექტროენერგეტიკაში. ეს დამახასიათებელია იმიტომ, რომ მეტი ელექტროენერგია შემოგვაქვს, მეტი ბუნებრივი გაზი შემოგვაქვს, თუმცა ზაფხულში უკვე ვნახეთ, რომ სიჭარბეს ჰქონდა ადგილი და, პირიქით, გვქონდა ექსპორტის პოტენციალი, რომელიც ბოლომდე ვერ განვახორციელეთ და ამაზეც ალბათ მოგვიანებით ვისაუბრებთ.

ჯამში კი მოხმარება იზრდება წლიურად. საქართველოში მოხმარება გაიზარდა 2.7%-ით, თუმცა ჩვენი გათვლებით, ეს მოხმარება კიდევ უფრო დიდად არის გაზრდილი და, კერძოდ, 4,4%-ს შეადგენს.

მიზეზი, რატომაც სტატისტიკაში არ ჩანს ეს, არის მიკრო სიმძლავრის ელექტროსადგურები, ანუ ეს არის ის პროგრამა, რომელსაც ასევე იცნობთ ნეტო აღრიცხვის სახელით და, ზოგადად, განაცხადების სახით, წლების მანძილზე ჯამურად შევიდა 350 მეგავატ მზის სადგურებზე განაცხადები.

ჩვენ ველოდებით სემეკის შეფასებას, თუ რამდენი აშენდა და შევიდა ექსპლუატაციაში. წლის ბოლოს დაახლოებით გავიგებთ ამ ციფრებს, თუმცა მანამდე ჩვენი ვარაუდით, სადღაც 70% უკვე გამოიმუშავებს ელექტროენერგიას.

რას ნიშნავს ეს? ანუ მომხმარებლები თავად, საკუთარი მოხმარებისთვის, გამოიმუშავებენ მზის სადგურებით ელექტროენერგიას და უშუალოდ ქვითარში ხვდება მხოლოდ იმ ელექტროენერგიის ნაწილი, რომელსაც ქსელიდან ყიდულობენ. შესაბამისად, ეს სხვაობა, გენერაციით დაფარული მოხმარების, არ ჩანს სტატისტიკაში.

და ისევ და ისევ გავუსვამ ხაზს იმას, რომ 4.4% იყო, ჩვენი გათვლებით, ზრდა მოხმარების და ვფიქრობთ, რომ ეს მზის სადგურების, მიკრო სიმძლავრის სადგურების გავლენა, ზოგადად, ახალი კომპონენტია და შესასწავლია უფრო დეტალურად და მნიშვნელოვანი გავლენა აქვს მთლიანად ქვეყნის ენერგომოხმარებაში“, - აცხადებს ანა ჯეჯელავა.