ცოდნაზე დაფუძნებული ეკონომიკა - ეს არის ის პრიორიტეტი, რომელსაც საქართველოს მთავრობა ახორციელებს ბოლო ათწლეულის განმავლობაში l ირაკლი ნადარეიშვილი
„დღეს არის ისტორიული დღე, ისტორიული მოვლენა არა მხოლოდ ქუთაისისთვის, იმერეთისთვის, არამედ მთლიანად საქართველოსთვის და ინოვაციური სტარტაპ ეკოსისტემის განვითარებისთვის, რაც საქართველოს მთავრობის ერთ-ერთი გაცხადებული ამოცანა და მიზანია", - განაცხადა ეკონომიკისა და მდგრადი განვითარების მინისტრის მოადგილე ირაკლი ნადარეიშვილმა ქუთაისის ტექნოლოგიური ჰაბის პროექტზე საუბრისას.
ირაკლი ნადარეიშვილის განცხადებით, ცოდნაზე დაფუძნებული ეკონომიკა არის ის პრიორიტეტი, რომელსაც საქართველოს მთავრობა ახორციელებს ბოლო ათწლეულის განმავლობაში.
„ქუთაისის ტექნოლოგიური ჰაბი წარმოადგენს მრავალფუნქციურ სივრცეს, სადაც, ერთი მხრივ, არის ტექნოლოგიური და სამეცნიერო მუზეუმი, სადაც როგორც ბავშვებს, ასევე სტუმრებს ექნებათ საშუალება, რომ საბუნებისმეტყველო მეცნიერებებს, ტექნოლოგიებს ხელით შეეხონ, პირდაპირი გაგებით, წვდომა ჰქონდეთ უშუალოდ ტექნოლოგიების გამოყენებასთან", - განაცხადა მინისტრის მოადგილემ.
ამასთან, როგორც ირაკლი ნადარეიშვილმა აღნიშნა, ყველაზე მასშტაბური ტექნოპარკი ქუთაისის ტექნოლოგიურ ჰაბშია განთავსებული, სადაც 10-ზე მეტი ულტრათანამედროვე ტექნოლოგიით აღჭურვილი ლაბორატორია არის, რომლებიც, ხელმისაწვდომი იქნება სხვადასხვა პროექტებზე სამუშაოდ სტუდენტებისთვის, ასევე მეცნიერებისა და სტარტაპერებისთვის.
„აქ არის უამრავი სივრცე სხვადასხვა პროექტების გასაკეთებლად, ჯგუფური სამუშაოების ჩასატარებლად. განათლება არის ერთ-ერთი ის ფუნდამენტი, რომელზეც ზოგადად ტექნოლოგიური მიმართულება არის დაფუძნებული და მეორე სართული მთლიანად ეთმობა საერთაშორისო ტექნოლოგიურ სკოლას - ეს არის TUMO-ს ბრენდის ქვეშ გაერთიანებული პლატფორმა, სადაც 12-დან 18 წლამდე ასაკის სკოლის მოსწავლეებს ექნებათ აბსოლუტურად უფასო და თავისუფალი წვდომა ძალიან საინტერესო პროგრამებზე, რომლებიც, დარწმუნებული ვარ, ჩამოაყალიბებს და შექმნის მათ მომავალს ტექნოლოგიურ სამყაროში", - განაცხადა მინისტრის მოადგილემ.
ქუთაისის ტექნოლოგიური ჰაბი საქართველოს პრემიერ-მინისტრმა ირაკლი კობახიძემ, ეკონომიკისა და მდგრადი განვითარების მინისტრ მარიამ ქვრივიშვილთან ერთად გახსნა. ღონისძიებას სახელმწიფო და კერძო სექტორის წარმომადგენლები დაესწრნენ.
სხვა სიახლეები
საქართველო და ჩინეთი შეთანხმდნენ საქართველო-ჩინეთის საინვესტიციო დიალოგის სპეციალური მექანიზმის შექმნაზე, რომლის მიზანია ჩინური ინვესტიციების ხელშეწყობა ისეთ სტრატეგიულ სფეროებში, როგორებიცაა ინფრასტრუქტურა და ენერგეტიკა საქართველოში - ირაკლი ნადარეიშვილი
12.09.2026.14:38
საქართველოს ურთიერთობებს ჩინეთთან განსაკუთრებულად მნიშვნელოვანი და სპეციფიკური ადგილი უკავია, - განაცხადა საქართველოს ეკონომიკისა და მდგრადი განვითარების მინისტრის მოადგილემ ირაკლი ნადარეიშვილმა პეკინში გამართულ მომსახურებით ვაჭრობის გლობალურ სამიტზე სიტყვით გამოსვლისას.
როგორც მინისტრის მოადგილემ აღნიშნა, ჩინეთთან თავისუფალი ვაჭრობის შეთანხმება ძალაში 2018 წელს შევიდა, 2023 წელს კი აღნიშნული ურთიერთობები სტრატეგიულ პარტნიორობამდე ამაღლდა, რასაც თან ახლდა თანამშრომლობის გაღრმავება „სარტყლისა და გზის“ ინიციატივისა და ციფრული ეკონომიკის ფარგლებში.
„წელს ჩვენ ასევე შევთანხმდით თავისუფალი ვაჭრობის შეთანხმების განახლებაზე, რაც ითვალისწინებს თანამედროვე დებულებების დანერგვას ელექტრონული კომერციის, ინვესტიციების წახალისებისა და ინფორმაციაზე წვდომის მიმართულებით. ჩვენ ასევე გავდივართ უბრალო ვაჭრობის ფარგლებიდან უფრო მტკიცე საინვესტიციო პარტნიორობისკენ. საქართველო და ჩინეთი შეთანხმდნენ საქართველო-ჩინეთის საინვესტიციო დიალოგის სპეციალური მექანიზმის შექმნაზე, რომლის მიზანია ჩინური ინვესტიციების ხელშეწყობა ისეთ სტრატეგიულ სფეროებში, როგორებიცაა ინფრასტრუქტურა და ენერგეტიკა საქართველოში“, - განაცხადა ირაკლი ნადარეიშვილმა.
მისივე თქმით, საქართველო-ჩინეთის თანამშრომლობის შემდეგი ეტაპი ტრადიციული ვაჭრობის ფარგლებს სცილდება.
„ჩვენ დიდ პოტენციალს ვხედავთ ციფრულ სერვისებში, ტექნოლოგიებში, ლოგისტიკურ გადაწყვეტებში, ფინანსურ და პროფესიულ მომსახურებასა და ელექტრონულ კომერციაში. მონაცემთა ტრანსსასაზღვრო ნაკადების ჩარჩოების შემუშავებაში ჩინეთის გამოცდილება ძალზე რელევანტურია, რადგან საიმედო და ეფექტიანი ციფრული კავშირები სულ უფრო მნიშვნელოვანი ხდება მომსახურებით საერთაშორისო ვაჭრობისთვის.
ჩინური კომპანიებისთვის საქართველოს შეუძლია შესთავაზოს ეფექტიანი ბაზა რეგიონული ოპერაციებისა და ევროპასა და აზიას შორის მომსახურების მიწოდებისთვის. ქართული კომპანიებისთვის კი ჩინეთი იძლევა წვდომას მსოფლიოში ერთ-ერთ ყველაზე დიდ და მიმზიდველ ბაზარზე.
ჩვენი მიზანი ამ ძლიერი მხარეების დაკავშირება უნდა იყოს“, - აღნიშნა ეკონომიკისა და მდგრადი განვითარების მინისტრის მოადგილემ.
მომსახურებით ვაჭრობის გლობალურ სამიტი ჩინეთში CIFTIS-ის ფარგლებში ჩატარდა, სადაც საქართველომ წელს პირველად მიიღო მონაწილეობა.
