აშშ-ის ფედერალური სარეზერვო სისტემის (Fed) თავმჯდომარემ, კევინ უორშმა, პარასკევს ოპტიმიზმი გამოხატა ამერიკის ეკონომიკის სიძლიერესთან დაკავშირებით. ამასთან, მან აღნიშნა, რომ გაკვირვებულია იმით, თუ რამდენად კარგად ინარჩუნებენ მსოფლიო ეკონომიკები მდგრადობას ენერგეტიკული შოკებისა და ინფლაციასთან საბრძოლველად გამკაცრებული მონეტარული პოლიტიკის პირობებში.

მისი განცხადებით, აშშ-ისა და მრავალი სხვა ქვეყნის ეკონომიკა სარგებელს იღებს ინვესტიციების მკვეთრი ზრდისგან, რომელსაც თავდაპირველად ხელოვნური ინტელექტის განვითარება განაპირობებდა, თუმცა ეს ტენდენცია თანდათან სხვა სექტორებზეც ვრცელდება. აღნიშნული მოკლევადიან პერიოდში მოთხოვნის მკვეთრ ზრდას იწვევს, რაც ინფლაციაზე ზრდის მიმართულებით ზეწოლას აძლიერებს.

„გუშინ და დღეს გამართული შეხვედრების შემდეგ რთულია ცენტრალური ბანკების ხელმძღვანელებთან საუბარი ისე, რომ ერთმანეთს გამოცდილება არ გავუზიაროთ და ფასების მკვეთრი ზრდის შესახებ ერთი და იგივე არ მოვისმინოთ“, - განაცხადა უორშმა ბანგკოკში, საერთაშორისო სავალუტო ფონდისა (IMF) და მსოფლიო ბანკის ყოველწლიურ შეხვედრებზე.

უორშის განცხადებით, ინფლაცია „საერთო გამოწვევას“ წარმოადგენს, რის გამოც მსოფლიოს ცენტრალურმა ბანკებმა მონეტარული პოლიტიკის სინქრონული გამკაცრება განახორციელეს.

„მსოფლიოს უმეტეს ნაწილში ცენტრალურმა ბანკებმა მონეტარული პოლიტიკა ერთდროულად გაამკაცრეს“, - აღნიშნა მან.

რაც შეეხება აშშ-ს, უორშის განცხადებით, ფედერალურმა რეზერვმა მკაფიოდ დაადასტურა ფასების სტაბილურობის უზრუნველყოფის ვალდებულება.

„ჩვენ მკაფიოდ განვაცხადეთ, რომ ფასების სტაბილურობას უზრუნველვყოფდით და დაახლოებით ერთი თვის წინ მონეტარული პოლიტიკის შერბილების გარკვეული მიდგომები გავაუქმეთ“, - განაცხადა მან, რითაც ფედერალური რეზერვის მიერ სექტემბერში საპროცენტო განაკვეთის გაზრდაზე მიუთითა.