საქართველოს ეკონომიკის განვითარების კორპორაციის გენერალური დირექტორის, ირაკლი გაბრიაძის განმარტებით, კორპორაცია კაპიტალის ბაზრების განვითარების მიმართულებით საინვესტიციო ფონდებისა და კორპორაციული ობლიგაციების მხარდაჭერაზე გააკეთებს აქცენტს. მისი თქმით, კორპორაცია თავადაც იქნება საინვესტიციო ფონდების ინვესტორი და გეგმავს, რომ მომდევნო 10 წლის განმავლობაში წილობრივი თანამონაწილეობის პრინციპზე დაფუძნებული ფონდების აქტივების მოცულობა 1 მილიარდ ლარამდე გაიზარდოს. ამასთან, გაბრიაძის განცხადებით, კორპორაციის მხარდაჭერით გამოშვებული ობლიგაციების მოცულობამ უახლოესი ათწლეულის განმავლობაში 10 მილიარდ ლარს უნდა გადააჭარბოს.

„როგორც აღვნიშნე, სამი ძირითადი მიმართულება - ეს არის კაპიტალის ბაზრების განვითარება, ეს არის ექსპორტის მხარდაჭერის მიმართულება, ეს არის ახალი სასესხო ინსტრუმენტების მხარდაჭერა, რომელიც გვინდა, რომ შევთავაზოთ ბაზარს.

რაც შეეხება კაპიტალის ბაზრების მხარდაჭერის მიმართულებას - ეს არის ფონდების მხარდაჭერა და საინვესტიციო ფონდებს სააგენტო მხარს დაუჭერს იმით, რომ ჩვენ ვიქნებით ინვესტორები. და მომდევნო 10 წლის განმავლობაში გეგმა გვაქვს, რომ 1 მილიარდ ლარამდე გაიზარდოს საინვესტიციო ფონდების აქტივების რაოდენობა. 1 მილიარდ ლარამდე ზრდა საინვესტიციო ფონდების. ოღონდ ისეთი ფონდების, რომლებიც კომპანიების წილ კომპანიებში წილობრივი მონაწილეობით შევლენ, წილობრივი თანამონაწილეობით და არა სასესხო ინსტრუმენტებით. ეს ძალიან ამბიციური გეგმაა, თუმცა საკმაოდ რეალისტურად გვესახება.

ასევე უნდა ვახსენოთ, რადგან კაპიტალის ბაზარს ვახსენებთ, ბონდების მიმართულებით, ანუ კორპორაციის გეგმები საკმაოდ ამბიციურია და აქაც ველოდებით, რომ 10 მილიარდ ლარს გასცდება ჩვენი მხარდაჭერით გამოშვებული ბონდების მოცულობა მომდევნო 10 წლის განმავლობაში“, - განაცხადა ირაკლი გაბრიაძემ.